​ប្រែ​សម្រួលៈ​បំណង​(​ស្ពុ​ត​និច​)៖ ប្រធានសភា​អាម៉េរិក​លោកស្រី ណាន់​ស៊ី ផេ​ឡូ​ស៊ី អាច​ទៅ​ដល់​កោះ​តៃវ៉ាន់​នៅ​ថ្ងៃ​០២​សីហា​ស្អែក និង​ជួប​មេដឹកនាំ​កោះ​នេះ​លោកស្រី សាយ អ៊ីង​-​វិន​(Tsai Ing-wen)​នៅ​ថ្ងៃ​បន្ទាប់ នេះ​បើ​តាម​កាសែត​China Times​បាន​រាយការណ៍​ដោយយោង​តាម​ប្រភព​ការទូត​កាលពី​ថ្ងៃ​ចន្ទ​ទី​០១​សីហា ។​

កាសែតតៃវ៉ាន់យ៉ាងតិចចំនួនពីរក៏បានអះអាងអំពីដំណើរទស្សនកិច្ចរបស់ផេឡូស៊ីនៅទីក្រុងតៃប៉ិនៅយប់ថ្ងៃអង្គារ។

​កាសែត​បាន​បន្តទៀតថា មន្ត្រី​អាម៉េរិក​រូបនេះ​ក៏​ត្រូវ​រំពឹងថា​នឹង​ជួ​បប្រជុំ​ជាមួយ​មន្ត្រី​ថ្នាក់ខ្ពស់​ផ្សេងទៀត​នៅ​តៃវ៉ាន់ ហើយ​នឹង​ចាកចេញ​ពី​កោះ​ដែល​ចិន​អះអាងថា​ជា​របស់​ខ្លួន​នេះ​នៅ​ថ្ងៃ​ពុធ​។​

ទោះជាយ៉ាងណា ក្រសួងការបរទេស​តៃវ៉ាន់​មិន​បាន​បញ្ជាក់​អំពី​ផែនការ​ទស្សនកិច្ច​នេះ​ទេ ។​

​លោកស្រី​ផេ​ឡូ​ស៊ី បានចាប់ផ្តើម​ដំណើរ​ទស្សនកិច្ច​មក​កាន់​តំបន់​ឥណ្ឌូ​ប៉ាស៊ីហ្វិក ដែល​រួម​មាន​ការ​ទៅកាន់​ប្រទេស​សិង្ហ​បុរី ម៉ាឡេស៊ី ជប៉ុន​និង​កូរ៉េខាងត្បូង​។​លោកស្រី​មិន​បាន​បញ្ជាក់ថា​នឹង​ទៅ​កាន់​កោះ​​តៃវ៉ាន់​ដែរ​ឬ​អត់​ទេ ចំ​ពេល​អាម៉េរិក​និង​ចិន​ត្រៀម​កម្លាំងយោធា​និង​ព្រមាន​គ្នា​។​ចិន​បាន​និយាយថា ដំណើរ​របស់​មន្ត្រី​ជាន់ខ្ពស់​របស់​អាម៉េរិក​ទៅកាន់​កោះ​តៃវ៉ាន់​ជាការ​បង្ករឿង​ដោយ​វា​រំលោភ​«​គោល​ការ​​ណ៍​ចិន​មួយ​»​ហើយ​អាម៉េរិក​នឹង​ទទួល​ផលវិបាក​អវិជ្ជមាន​ទាំងអស់​ចេញ​ពី​ទង្វើ​បែបនេះ​។​

​នៅ​ទី​ក្រុង​ប៉េកាំង​នៅ​ថ្ងៃ​ចន្ទ​ទី០​១​សីហា​នេះ អ្នកនាំពាក្យ​ក្រសួងការបរទេស​ចិន​លោក​ចាវ លី​ជៀន បានបញ្ជាក់​អះអាង​ឡើងវិញ​ការព្រមាន​ពី​មុន​ដែល​ថា «​នឹង​មាន​ផលវិបាក​ធ្ងន់ធ្ងរ​បើសិនជា​ផេ​ឡូ​ស៊ី​នៅ​​តែ​ចចេស​ទៅ​ទស្សនកិច្ច​តៃវ៉ាន់​»​។​

​លោក​បាន​និយាយ​ដូច្នេះ​ថា​«​យើង​ត្រៀម​ខ្លួន​ពេញលេញ​អស់​ហើយ​សំរាប់​យថាភាព​ណាមួយ​។​កងទ័ព​រំដោះប្រជាជន​(​ចិន​)​នឹង​មិន​អង្គុយ​នៅ​ស្ងៀម​ទេ​។ចិន​នឹង​ចាត់វិធានការ​ដាច់ខាត​និង​ខ្លាំងក្លា​ដើម្បី​ការ​​ពារ​អធិបតេយ្យភាព​និង​បូរណភាព​ទឹកដី​របស់​ខ្លួន​»​។​

​សូមបញ្ជាក់​ថា កងទ័ព​រំដោះប្រជាជន​ចិន​បាន​ចាប់ផ្តើម​ធ្វើ​សមយុទ្ធ​បាញ់​គ្រាប់​ពិត​នៅ​ច្រក​សមុទ្រ​តៃវ៉ាន់​ចាប់តាំងពី​ថ្ងៃ​សៅរ៍​មក ។​មាន​សេចក្តីរាយការណ៍​ពី​តៃវ៉ាន់​មក​ថា យន្តហោះ​ប្រយុទ្ធ​ចិន​ធុន J-16​ចំនួន​បួន​គ្រឿង​បាន​ហោះចូល​ក្នុង​តំបន់​កំណត់​អត្តសញ្ញាណ​ការពារ​ដែនអាកាស​តៃវ៉ាន់​កាលពី​ថ្ងៃ​ចន្ទ​។​

​ក្នុងពេល​ជាមួយគ្នា​សារព័ត៌មាន​ជប៉ុន​Nikkei Asia​បាន​និយាយថា យោធា​អាម៉េរិក​បាន​បញ្ជូន​នាវា​ដឹក​យន្តហោះ​និង​យន្តហោះ​ក្នុង​ចំនួន​ដ៏​ច្រើន​ទៅ​កៀក​នឹង​កោះ​តៃវ៉ាន់ ចំ​ពេល​លោក​ស្រី​ផេ​ឡូ​ស៊ី​​ធ្វើ​ទស្សនកិច្ច​អាស៊ី និង​អាច​កោះ​តៃវ៉ាន់​ផង​។​

​ក្នុងពេល​ចាប់ផ្តើម​ដំណើរ​ទស្សនកិច្ច​អាស៊ី​កាលពី​ថ្ងៃ​ចន្ទ ប្រធានសភា​អាម៉េរិក​បាន​ជួបពិភាក្សា​ជាមួយ​មន្ត្រី​សិង្ហ​បុរី រួម​មាន​នាយក​រដ្ឋមន្ត្រី លី សៀន​ឡុង ប្រធានាធិបតី ហា​លី​ម៉ា យ៉ា​កុប​(Halimah Yacob)​និង​សមាជិក​គណៈរដ្ឋមន្ត្រី​សិង្ហបុរីដទៃទៀត​។​

​លោក​លី​បាន​ស្វាគមន៍​ការប្តេជ្ញា​ចិត្ត​របស់​អាម៉េរិក​ក្នុង​ការចូលរួម​ពាក់ព័ន្ធ​ដ៏​រឹងមាំ​ជាមួយ​តំបន់ និង​ភាគី​ទាំងពីរ​បាន​ពិភាក្សា​រក​វិធី​ពង្រឹង​ការចូលរួម​ផ្នែក​សេដ្ឋកិច្ច​អាម៉េរិក​តាមរយៈ​គំនិត​ផ្តួចផ្តើម​​ដូចជា​អង្គការ​ក្រប​ខណ្ឌ​សេដ្ឋកិច្ច​ឥណ្ឌូ​ប៉ាស៊ីហ្វិក​(Indo-Pacific Economic Framework)​។​

​លោក​លី​និង​លោកស្រី​ផេ​ឡូ​ស៊ី ក៏​បាន​ពិភាក្សា​អំពី​សង្គ្រាម​នៅ​អ៊ុ​យក្រែន ភាព​តានតឹង​ជុំវិញ​បញ្ហា​តៃវ៉ាន់និង​ចិនដីគោក ព្រមទាំង​ការប្រែប្រួល​អាកាសធាតុ​៕