ដោយ​៖​សុវណ្ណ​កុម្ភៈ​/​ភ្នំពេញ​៖ កីឡា​ហុក​គី ត្រូវបាន​សហព័ន្ធ​កីឡា​អាស៊ីអាគ្នេយ៍​សម្រេច​​ដាក់បញ្ចូល​ក្នុង​ព្រឹត្តិការណ៍​ស៊ី​ហ្គេម​ឆ្នាំ​២០២៣ ដែល​កម្ពុជា​ធ្វើជា​ម្ចាស់ផ្ទះ​ហើយ ។​

​លោក កាំ​ង សុធា អគ្គលេខាធិការ​សហព័ន្ធ​ហុក​គី​កម្ពុជា​បាន​ជម្រាបជូន​អំពី​ទិដ្ឋភាព​នានា ការត្រៀមខ្លួន និង​ការកំណត់​ស​ន្ទ​ស្សន៍​មេដាយ ក្នុង​ដំណើរ​ឆ្ពោះទៅ​ការប្រកួត​កីឡា​ស៊ី​ហ្គេម លើក​ទី​៣២ ឆ្នាំ​២០២៣ នាម​ជា​ម្ចាស់ផ្ទះ​។​

​ក្រុម​ហុក​គី​នារី​កម្ពុជា នឹង​ចេញទៅ​ប្រកួត​ជើងឯក​នារី​អាស៊ី​ក្នុង​សាល (Women’s Indoor Asia Cup 2022) គឺ​លើ​វិញ្ញាសា​ហុក​គី​ក្នុង​សាល (Indoor Hockey) នៅ​ប្រទេស​ថៃ​ដែល​គ្រោង​ប្រ​​កួត​ពី​ថ្ងៃទី​០៨ ដល់​ថ្ងៃទី​១៥ ខែសីហា ឆ្នាំ​២០២២​។​

​លោក​អគ្គលេខាធិការ​បា​ន​និយាយថា​ការចូលរួម​ព្រឹត្តិការណ៍​ខាងលើនេះ ការប្រកួត Asia Cup នៅ​ប្រទេស​ថៃ គឺមាន​សារសំខាន់​ណាស់​។ វា​ក៏​ជា​កត្តា​ជម្រុញ​ឲ្យ​ហុក​គី​កម្ពុជា បាន​ត្រៀមខ្លួន​ត្រៀមលក្ខណៈ​ការធ្វើ​តេស្ត​អំពី​សមត្ថភាព​របស់ខ្លួន​សម្រាប់​ការត្រៀមខ្លួន​ចូល​ប្រកួត​ស៊ី​ហ្គេម ឆ្នាំ​២០២៣ ដែល​ប្រទេស​យើង​ធ្វើជា​ម្ចាស់ផ្ទះ ក្នុងនោះ​ក៏មាន​កីឡា​ហុក​គី យើង​ផង​។​​បើសិនជា​យើង​មិន​មានការ​ចេញទៅ​ប្រកួត​ក្រៅប្រទេស យើង​មិនដឹង​ពី​សមត្ថភាព​របស់​យើង​កម្រិតណា​ទេ​។ អគ្គលេខាធិការ​ដដែល​រូបនេះ បាន​បន្ថែម​។​

​កាលពី​ខែមិថុនា​កន្លងទៅ ទើបតែ​បានបញ្ចប់​ការប្រកួត​ជម្រុះ​ព្រឹត្តិការណ៍​កីឡា​អាស៊ី (Women’s Asian Games Qualifier) វិញ្ញាសា​ក្រៅ​សាល (Field Hockey) នៅ​ប្រទេស​ឥណ្ឌូនេស៊ី ដោយ​ប្រកួត​តតាំង​ជាមួយ​ប្រទេស​ខ្លាំង​ដូចជា ហុងកុង​, អ៊ូ​ស​បេ​គី​ស្ថាន​, ស្រីលង្កា​, សិង្ហ​បុរី និង​ឥណ្ឌូនេស៊ី ជា​លទ្ធផល​បាន​រង​បរាជ័យ​ទាំង ៥​ប្រកួត ជាមួយ​លទ្ធផល​​៖​ ហុងកុង​ឈ្នះ​កម្ពុជា ៥​ទល់​០, ស្រីលង្កា​ឈ្នះ​កម្ពុជា ៥​ទល់​០, សិង្ហ​បុរី​ឈ្នះ​កម្ពុជា ១០​ទល់​០, កម្ពុជា​ចាញ់​អ៊ូ​បេ​គី​ស្ថាន​០​ទល់​៨, កម្ពុជា​ចាញ់​ឥណ្ឌូនេស៊ី ០​ទល់​៤ ។​

​សម្រាប់​ពេលខាងមុខ​អគ្គលេខាធិការ​រូបនេះ​បាន​បញ្ជាក់ថា​សហព័ន្ធ​ត្រៀម​ស្នើសុំ​គណៈកម្មាធិការ​ជាតិ​រៀបចំ​ការប្រកួត​ស៊ី​ហ្គេម (CAMSOC) និង​ក្រសួង​អប់រំ យុវជន និង​កីឡា ដើម្បី​ចេញទៅ​ហ្វឹកហាត់ និង​ប្រកួត​នៅក្រៅ​ប្រទេស ដើម្បី​បង្កើន​សមត្ថភាព​។​

​បន្ទាប់ពី​បញ្ចប់​ការប្រកួត​នៅ​សហព័ន្ធ មាន​ផែនការ​ថា​ស្នើសុំ​ការជួយជ្រោមជ្រែង​ពី CAMSOC ក៏ដូចជា​ក្រសួង​អប់រំ យុវជន និង​កីឡា និង​ប្រទេស​ដែលជា​សមាជិក​កីឡា​ហុក​គី សុំ​ទៅ​ហ្វឹកហាត់​ឬ​ជាការ​ផ្ដល់​ជា​សម្ភារ​ជា​មធ្យោបាយ​ឬ​ការបណ្ដុះបណ្ដាល​ដល់​មន្ត្រី​រៀបចំ​ការប្រកួត ឬក៏​ទៅ​ប្រកួត​មិត្តភាព​ផ្សេងៗ​នៅ​បណ្ដា​ប្រទេស​ផ្សេងៗ​ដែល​ខ្លាំង​ខាង​កីឡា​ហុក​គី ដូចជា​នៅ​ឥណ្ឌា ប៉ា​គី​ស្ថាន ឬក៏​បើ​មានឱកាស​នៅ​អឺរ៉ុប ព្រោះ​កីឡា​គេ​នៅ​ទីនោះ គឺ​ខ្លាំង​។ ដោយឡែក​នៅ​តំបន់​អាស៊ាន​របស់​យើង​នេះ​វិញ​គឺមាន​ថៃ​ចាំតែ​ផ្ដល់ឱកាស​ឲ្យ​យើង​ទៅ​ហ្វឹកហាត់​ទេ គេ​ផ្ដល់​ទីតាំង​ហ្វឹកហាត់​ជាដើម​ហើយ​យើង​ក៏បាន​ដាក់​មុខសញ្ញា​ថា​ទៅកាន់​ទីនោះ​ដែរ​។​

​នៅ​ស៊ី​ហ្គេម ឆ្នាំ​២០២៣ ហុក​គី នឹងមាន​វិញ្ញាសា​ចំនួន​២ ត្រូវដាក់​ឲ្យ​ប្រកួត គឺ​វិញ្ញាសា​នារី​ក្រៅ​សាល (Field Hockey) និង​វិញ្ញាសា​នារី​ក្នុង​សាល (Indoor Hockey) ស្រប​ពេលដែល​វិញ្ញាសា​បុរស ពុំ​ត្រូវបាន​ដាក់បញ្ចូល​ឡើយ​។

​លោក​អគ្គលេខាធិការ ក៏បាន​បញ្ជាក់ថា សហព័ន្ធ​មាន​ចេតនា​ចង់​ឈ្នះ​មេដាយមាស ឲ្យ​បាន ១​គ្រឿង ក្នុងចំណោម​២​វិញ្ញាសា​ខាងលើ​។ ជុំវិញ​ស​ន្ទ​ស្សន៍​មេដាយ​សហព័ន្ធ​កំណត់​ហើយ​ថា​យ៉ាងហោច​ក៏​យើង​មានឱកាស​ទៅរក​មេដាយ​ណាមួយ ក្នុងចំណោម​មេដាយ​ទាំង ៣​ប្រភេទ (​មាស ប្រាក់ សំរឹទ្ធ​)​។

​ហុក​គី ធ្លាប់​ត្រូវបាន​ដាក់បញ្ចូល​ទៅក្នុង​ការប្រកួត​ព្រឹត្តិការណ៍​កីឡា​ស៊ី​ហ្គេម ចំនួន ២​លើក រួចមកហើយ ពោលគឺ​ក្នុង​ស៊ី​ហ្គេម លើក​ទី​២៩ ឆ្នាំ​២០១៧ នៅ​ប្រទេស​ម៉ាឡេស៊ី មាន ៣​វិញ្ញាសា (​ក្នុង​សាល ក្រៅ​សាល និង​លើ​ទឹកកក​) ខណៈ​លើក​ទី​៣០ ឆ្នាំ​២០១៩ នៅ​ប្រទេស​ហ្វីលីពីន មាន ២​វិញ្ញ​សា (​ក្នុង​សាល និង​លើ​ទឹកកក​)​។ ចំពោះ​កម្ពុជា ចូលរួម​លើកដំបូង នៅ​ឆ្នាំ​២០១៩ លើ​វិញ្ញាសា​នារី​ក្នុង​សាល ក្នុងចំណោម ៥​ប្រទេស ប្រកួត​បញ្ចប់​ទៅដោយ​ឈរ​នៅ​លេខ​៥ ក្រោយ​ប្រកួត មិនដែល​ឈ្នះ ស្មើ​១ និង​ចាញ់​៣៕​