​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អនុ​ប្រធានាធិបតី​អាម៉េរិក​លោកស្រី កា​ម៉ា​ឡា ហារី​ស បាន​ហៅ​ការប្រែប្រួល​អាកាសធាតុ​ថា​ជា​វិបត្តិ “​បន្ទាន់​” និង “​អាសន្ន​” កាលពី​ថ្ងៃ​ចន្ទ​ទី​១​សីហា​ខណៈ​លោក​​ស្រី​បាន​រៀបរាប់​លម្អិត​អំពី​ការចំណាយ​សហព័ន្ធ​ជាង​១​ពាន់​លាន​ដុល្លារ ដើម្បី​ឆ្លើយតប​នឹង​គ្រោះមហន្តរាយ​ដូចជា​ទឹក​ជំនន់​ដ៏​សាហាវ​នៅ​រដ្ឋ​ខិន​ថាក់​គី​និង​ភ្លើង​ឆេះ​ព្រៃ​ដែល​កំពុង​បំផ្លាញ​រដ្ឋ​កំណើត​របស់​​លោកស្រី គឺ រដ្ឋ​កាលីហ្វ័​រញ៉ា​។​

​ក្នុង​ដំណើរ​ចុះ​ទៅ​កាន់​ទីក្រុង​ម៉ៃ​អា​មី លោក​ហារី​ស​បាន​ប្រកាស​ឱ្យ​ដាក់​ប្រើប្រាស់​ជំនួយ​ជាបន្ទាន់​សម្រាប់​រដ្ឋ​នានា​ដើម្បី​ជួយ​សហគមន៍​ទូទាំង​ប្រទេស​ត្រៀម​ខ្លួន​និង​ឆ្លើយតប​ទៅនឹង​គ្រោះមហន្តរាយ​ទាក់ទង​​នឹង​អាកាសធាតុ​។​

​ដោយ​ធ្វើដំណើរ​ទៅ​កាន់​មជ្ឈមណ្ឌល​ព្យុះសង្ឃរា​ជាតិ មុនពេល​ចេញ​សេចក្តីប្រកាស​ផ្តល់​ជំនួយ​នេះ លោក​ហារី​ស​បាន​និយាយថា​គ្រោះមហន្តរាយ​ដូចជា​ទឹក​ជំនន់​នៅ​រដ្ឋ​ខិន​ថាក់​គី​និង​ភ្លើង​ឆេះ​ព្រៃ​នៅ​រដ្ឋ​​កាលីហ្វ័​រញ៉ា បង្ហាញឱ្យឃើញថា “​តើ​វា​មាន​ភាព​បន្ទាន់​កម្រិតណា មាន​ភាពចាំបាច់​ឥឡូវ​កម្រិតណា និង​មាន​ភាពអាសន្ន​កម្រិតណា​”​ដើម្បី​ដោះស្រាយ​អាកាសធាតុ​ធ្ងន់ធ្ងរ​ដែល​កំពុង​ជួបប្រទះ​នៅក្នុង​សហ​​រដ្ឋ​អាម៉េរិក​និង​ជុំវិញ​ពិភពលោក​។​

​លោកស្រី​បាន​និយាយ​នៅក្នុង​សុន្ទរកថា​នៅ​សាកលវិទ្យាល័យ​អន្តរជាតិ​ផ្លរីដា ថា “​ការប្រែប្រួល​អាកាសធាតុ​បាន​ក្លាយទៅជា​វិបត្តិ​អាកាសធាតុ ហើយ​ការគំរាមកំហែង​បាន​ក្លាយជា​ការពិត​”​។​

​លោកស្រី​ហារី​ស​បាន​លើកឡើង​អំពី​ទឹកជំនន់​ដ៏​សាហាវ​ដែល​បាន​វាយប្រហារ​រដ្ឋ​ន​ថា​ខិក់​គី​និងរ​ដ្ឋ​មីស​សួរី (Missouri) ដោយ “​បាន​បំផ្លាញ​សង្កាត់​ទាំងមូលៗ​”​ដែល​បណ្តាលឱ្យ​មនុស្ស​ស្លាប់​យ៉ាង​ហោច​​ណាស់ ៣៨ នាក់​រួម​ទាំង​កុមារ​ផងដែរ​។ យ៉ាងហោច​ណាស់​មនុស្ស​ពីរ​នាក់​បាន​ស្លាប់​នៅក្នុង​ភ្លើង​ឆេះ​ព្រៃ​នៅ​ភាគ​ខាងជើង​រដ្ឋ​កាលីហ្វ័រ​ញ៉ា​ដែល​ស្ថិត​ក្នុងចំណោម​ភ្លើង​ឆេះ​ព្រៃ​ជា​ច្រើន​ដែល​គំរាមកំហែង​ដល់​​ផ្ទះ​រាប់ពាន់​ខ្នង​នៅ​ភាគ​ខាងលិច​នៃ​សហរដ្ឋ​អាម៉េរិក​។ អាកាសធាតុ​ក្តៅ​និង​ខ្យល់​ខ្លាំង​ព្រមទាំង​រន្ទះបាញ់​បាន​គំរាមកំហែង​បង្កើន​គ្រោះថ្នាក់​ដែលថា ភ្លើង​នឹង​បន្ត​កើនឡើង​។​

​លោកស្រី​បាន​និយាយថា “​ការបំផ្លិចបំផ្លាញ​គឺជា​ការពិត​។ គ្រោះ​ថ្នាក់​គឺ​ជា​ការពិត​។ ផលប៉ះពាល់​គឺជា​ការពិត​។ ហើយ​យើង​កំពុង​ឃើញ​វា​ទាន់​ហេតុការណ៍​ជាក់ស្តែង​”៕

​អនុ​ប្រធានាធិបតី​អាម៉េរិក​លោកស្រី កា​ម៉ា​ឡា ហារី​ស