​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ កូនភ្លោះ​ជាប់​គ្នា​កើត​ក្នុង​ប្រទេសប្រេ​ស៊ីល​ដែល​មាន​ក្បាល​និង​ខួរក្បាល​រួម​បញ្ចូល​គ្នា​ត្រូវបាន​បំបែក​ចេញ​ពី​គ្នា​នៅក្នុង​អ្វីដែល​វេជ្ជបណ្ឌិត​ពណ៌នា​កាលពី​ថ្ងៃ​ចន្ទ ទី​០១​សីហា​ថា​ជា​ការវះកាត់​ដ៏​ស្មុគស្មាញ​បំផុត​នៃ​ប្រភេទ​វះកាត់​បែបនេះ ដែល​ពួកគេ​បាន​រៀបចំឡើង​ដោយ​ប្រើ​បច្ចេកវិជ្ជា Virtual Reality (VR)​។​

​អា​ធឺ (Arthur)​និង បឺ​ណា​ដូ លី​ម៉ា (Bernardo Lima) បាន​កើត​នៅ​ឆ្នាំ ២០១៨ នៅ​រដ្ឋ​រ៉ូរ៉ៃ​ម៉ា (Roraima) ភាគ​ខាងជើង​ប្រទេសប្រេ​ស៊ីល ជា​កូនភ្លោះ​ក្បាល​ជាប់​គ្នា​ដែល​ជា​ស្ថានភាព​​ដ៏​កម្រ​មួយ ដែល​បងប្អូន​បង្កើត​ត្រូវបាន​រួម​បញ្ចូល​គ្នា​នៅ​លលាដ៍ក្បាល​។​

​ជាប់​គ្នា​នៅ​លលាដ៍ក្បាល​អស់​រយៈពេល​ជិត​បួន​ឆ្នាំ ដោយ​ភាគច្រើន​ចំណាយ​ពេល​ដេក​នៅក្នុង​មន្ទីរពេទ្យ​មួយ​ក្នុង​ក្រុង​រី​យ៉ូ​ដឺ​ជេ​នី​រ៉ូ (Rio de Janeiro) ឥឡូវ​នេះ​បងប្អូន​ប្រុស​នេះ​អាច​មើល​មុខ​គ្នា​​ជា​លើកដំបូង​បន្ទាប់​ពី​ការវះកាត់​ប្រាំបួន​លើក ដែល​ចុងបញ្ចប់​បាន​ឈាន​ទៅដល់​ការវះកាត់​ចុងក្រោយ ២៧ ម៉ោង​ដើម្បី​បំបែក​ពួកគេ​។​

​អង្គការ​សប្បុរសធម៌​ផ្នែក​វេជ្ជសាស្ដ្រ Gemini Untwined ដែល​មាន​មូលដ្ឋាន​នៅ​ទីក្រុង​ឡុង​ដ៍ ដែល​បាន​ជួយ​ដល់​ការវះកាត់​នេះ បាន​ពណ៌នា​ថា វា​ជា​”​ការវះកាត់​បំបែក​ដ៏​លំបាក​បំផុត​និង​ស្មុគស្មាញ​​បំផុត​រហូតមកទល់​បច្ចុប្បន្ន​” ដោយសារ​ក្មេងប្រុស​ទាំង​ពីរ​ចែករំលែក​សរសៃ​សំខាន់ៗ​ជា​ច្រើន​ជាមួយ​គ្នា​។​

​គ្រូពេទ្យ​សរសៃប្រសាទ​ឈ្មោះ ហ្គា​ព្រីល មូ​ហ្វា​រ៉េ​ច (Gabriel Mufarrej) នៃ​វិទ្យាស្ថាន​ខួរក្បាល​រដ្ឋ​ផូ​ឡូនី​មេ​យើ (Paulo Niemeyer) ឬ IECPN នៅ​ទីក្រុង​រី​យ៉ូក​ន្លែ​ង​ដែល​ការវះកាត់​បានធ្វើ​​ឡើង បាន​និយាយថា “​កូនភ្លោះ​ទាំងពីរ​មាន​ស្ថានភាព​ធ្ងន់ធ្ងរ​និង​ពិបាក​បំផុត ជាមួយនឹង​ហានិភ័យ​ខ្ពស់​បំផុត​នៃ​ការស្លាប់​ទាំងពីរ​”​។ លោកគ្រូ​ពេទ្យ​បាន​និយាយ​នៅក្នុង​សេចក្តីថ្លែងការណ៍​មួយ​ថា​”​យើង​​ពេញចិត្ត​នឹង​លទ្ធផល​នេះ​ខ្លាំងណាស់ ពីព្រោះ​គ្មាន​នរណាម្នាក់​ជឿ​លើ​ការវះកាត់​នេះ​ពី​ដំបូង​នោះ​ឡើយ ប៉ុន្តែ​យើង​តែងតែ​ជឿថា​មានឱកាស​”​។​

​អង្គការ Gemini Untwined បាន​និយាយថា សមាជិក​នៃ​ក្រុម​គ្រូពេទ្យ​ដែល​រួម​មាន​បុគ្គលិក​ជិត ១០០ នាក់​បាន​រៀបចំ​សម្រាប់​ដំណាក់កាល​វះកាត់​ចុង​ក្រោយ​ដ៏​ផ្ចិតផ្ចង់​នៅ​ថ្ងៃទី ៧ និង ៩ ខែមិថុនា ដោយ​មាន​ជំនួយ​ពី​បច្ចេកវិជ្ជា VR​។​

​ដោយ​ប្រើ​ការស្កែន​ខួរក្បាល​ដើម្បី​បង្កើតផែ​នទី​ឌីជីថល​នៃ​លលាដ៍ក្បាល​រួមគ្នា​របស់​ក្មេងប្រុស​ទាំង​ពីរ ក្រុម​គ្រូពេទ្យ​វះកាត់​បាន​អនុវត្ត​ការវះកាត់​សាកល្បង​ឆ្លង​មហាសមុទ្រ​អា​ត្លង់​ទិក​តាមរយៈ​បច្ចេកវិជ្ជា VR​។​

​គ្រូពេទ្យ​វះកាត់​សរសៃប្រសាទ​ជនជាតិ​អង់គ្លេស​លោក នួ អ៊ុល អូ​វ៉ា​សេ ជី​ឡា​នី (Noor ul Owase Jeelani) ជា​គ្រូពេទ្យ​វះកាត់​ឈានមុខ​សម្រាប់​អង្គការ Gemini Untwined​បាន​ហៅ​វគ្គ​វះ​​កាត់​តាម​បច្ចេកវិជ្ជា VR ថា​ជា “​រឿង​ដែល​កើត​ឡើង​ក្នុង​យុគសម័យ​អវកាស​”​។​

​លោក​បាន​ប្រាប់​ទីភ្នាក់ងារ​សារព័ត៌មាន​អង់គ្លេស PA ថា “​វា​ពិតជា​អស្ចារ្យ​ណាស់ វា​ពិតជា​អស្ចារ្យ​ណាស់​ក្នុង​ការមើលឃើញ​អាណា​តូ​មី (​កាយវិភាគសាស្ត្រ​) និង​ធ្វើ​ការវះកាត់ មុន​ពេល​អ្នកប្រថុយ​ធ្វើ​ឱ្យ​ក្មេងៗ​ប្រឈម​មុខ​នឹង​គ្រោះ​ថ្នាក់​ណាមួយ​។ អ្នក​អាច​ស្រមៃ​មើល​បាន​ថា​តើ​វា​ជា​ការធានា​កម្រិត​ណា​ចំពោះ​គ្រូពេទ្យ​វះកាត់​…​។ ការធ្វើ​រឿង​បែប​នេះ​តាម​ពិភព​និម្មិត​បាន​គឺ​ពិត​រឿង​ដែល​មាន​តែ​មនុស្ស​នៅ​លើ​ភព​ព្រះ​អង្គារ​ប៉ុណ្ណោះ​អាច​ធ្វើបាន​”៕

​អា​ធឺ និង បឺ​ណា​ដូ ត្រូវបាន​វះ​បំបែក​ពី​គ្នា​បានសម្រេច​