ដោយៈ បូកគោ / កំពត​: ក្នុង​បំណង​បង្កើត​សួន​កម្សាន្ត តាម​ឆ្នេរ​ព្រែក រដ្ឋបាល​ខេត្តកំពត រួមទាំង​មន្ត្រី​នៃ មន្ទីរជំនាញ​ពាក់ព័ន្ធ នឹង​ចុះ​កាយ​អាចម៍ដី ដក​ដំណាំ ពិសេស​រុះរើ​សំណង់ ផ្សេងៗ ដែល​បាន​សង់​បំពាន​ចូល​ព្រែក និង​ដី​ចំណី​ព្រែក ស្ថិតក្នុង​ស្រុក​ទឹកឈូ ព្រោះតែ​ខកខាន​មិនបាន​អនុវត្ត តាម​សេចក្តីជូនដំណឹង កន្លងមក​។​

​ផ្អែក​តាម​សេចក្តីជូនដំណឹង​លេខ ៤១២/២២ ស​.​ជ​.​ណ របស់​រដ្ឋបាល​ស្រុក​ទឹក​ឈូក ចុះ​នៅ​ថ្ងៃទី​១ ខែសីហា ឆ្នាំ​២០២២ មាន​ខ្លឹមសារ​ថា កន្លងមក រដ្ឋបាល​ស្រុក ធ្លាប់​បានចេញ សេចក្តីជូនដំណឹង រួចមកហើយ ពាក់ព័ន្ធ​ករណី​សាងសង់​ផ្ទះ ធ្វើ​របង សង់​ខ្ចូ​ស ចាក់ដី ដាំ​ដើមឈើ​បំពាន​ចូល​ដី​ចំណី​ព្រែក និង​ព្រែក ស្ថិតនៅ​ភូមិ​កំពង់​កណ្តាល និង​ភូមិ​ជុំ​ក្រៀល ឃុំ​ជុំ​គ្រៀល ស្រុក​ទឹកឈូ ដោយ​តម្រូវឱ្យ​ផ្អាក​រាល់​សកម្មភាព​ទាំងអស់​។ ម្ល៉ោះហើយ នៅ​ថ្ងៃទី​៣ ខែសីហា ឆ្នាំ​២០២២ រដ្ឋបាលខេត្ត រួមទាំង​មន្ត្រី​នៃ​មន្ទីរជំនាញ​ពាក់ព័ន្ធ នឹង​ចុះ​កាយ​អាចម៍ដី ដក​ដើមឈើ ក៏ដូចជា​សំណង់​ផ្សេងៗ ដែល​បាន​សង់​ចូល​ដី​ចំណី​ព្រែក និង​ព្រែក​ទាំងនោះ​។​

​សេចក្តីជូនដំណឹង បានបញ្ជាក់​ផងដែរ​ថា នៅមុន​ថ្ងៃទី​៣ ខែសីហា ឆ្នាំ​២០២២ បងប្អូន​ប្រជាពលរដ្ឋ អាច​រុះរើ​ដោយ​ខ្លួនឯងបាន​។ ដូច្នេះ សូម​បងប្អូន​ប្រជាពលរដ្ឋ ដែល​បាន​សាងសង់​ផ្ទះ ខ្ចូ​ស របង ចាក់​អាចម៍ដី ដាំ​ដើមឈើ​តាម​ដងព្រែក ចាប់ពី​ស្ពានថ្ម កំពង់​ទ្រៀក រហូតដល់​ទីបញ្ជាការ​កងទ័ពជើងទឹក​ស្ថិត​ក្នុងភូមិ​កំពង់​កណ្តាល និង​ភូមិ​ជុំ​ក្រៀល ឃុំ​ជុំ​ក្រៀល ស្រុក​ទឹកឈូ ខេត្តកំពត អនុវត្តតាម​សេចក្តីជូនដំណឹង កុំបី​ខាន​។
​ក្នុងករណី​មិន​អនុវត្តតាម​ខ្លឹមសារ​ទាំងនេះ​ទេ រដ្ឋបាល​ស្រុក​ទឹកឈូ សហការ​ជាមួយ រដ្ឋបាលខេត្ត ព្រមទាំង​មន្ទីរជំនាញ​ពាក់ព័ន្ធ នឹង​ចុះ​រុះរើ​សំណង់ កាយ​អាចម៍ដី ព្រមទាំង​ដក​ដើមឈើ​ទាំងនោះ ចេញ ដោយ​មិន​ទទួលខុសត្រូវ រាល់​ការខូចខាត ទ្រព្យសម្បត្តិ​របស់ បងប្អូន​ប្រជាពលរដ្ឋ​ឡើយ​។ រីឯ​ការចំណាយ​ក្នុងការ​រុះរើ​ផ្សេងៗ ជា​បន្ទុក​របស់​ប្រជាពលរដ្ឋ​ផ្ទាល់ ៕/V​