ដោយ​៖ ដេប៉ូ / ភ្នំពេញ​៖ លោក អ៊ិត សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បាន​ថ្លែងថាៈ គោលនយោបាយ​អាទិភាព លើ​វិស័យ​ធនធានមនុស្ស បាន​បង្កើន​ការវិនិយោគ លើ​វិស័យ​ធនធានមនុស្ស អប់រំ និង​ការបណ្តុះបណ្តាល​ជំនាញ ធ្វើ​ឲ្យ​មានការ​រីកចម្រើន ទាំង​បរិមាណ និង​គុណភាព​។ ទន្ទឹមនឹងនេះ ការបង្កើត​កិច្ចសហប្រតិបត្តិការ ជាមួយ​ប្រទេស​ជា​មិត្ត ការស្វែងរក​អាហារូបករណ៍ ក៏ដូចជា ការបង្ក​លក្ខណៈ​ងាយស្រួល ដល់​យុវវ័យ អាច​ទៅ​បន្ត​ការសិក្សា​បាន​។​

​បច្ចុប្បន្ន កម្ពុ​ជាមាន​ធនធានមនុស្ស មាន​សមត្ថភាព​ខ្ពស់ កាន់តែច្រើន គ្រប់​កម្រិត ជា​ធនធាន ប្រកបដោយ​គុណភាព​ខ្ពស់ ដែល​បាននិងកំពុង​ចូលរួម ក្នុង​ការងារ​លើ​គ្រប់​វិស័យ ទាំង​សាធារណៈ និង​ឯកជន​។​

​រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បាន​មានប្រសាសន៍​បែបនេះ នាឱកាស​ជួប​សំណេះសំណាល ជាមួយ​និស្សិត​ជ័យលាភី អាហារូបករណ៍ អភិវឌ្ឍន៍​ធនធានមនុស្ស របស់​ប្រទេស​ជប៉ុន (JDS) ឆ្នាំ​២០២២-២០២៣ ចំនួន ២៤ រូប នៅ​ទីស្តីការក្រសួង​ការងារ នា​ព្រឹក​ថ្ងៃទី​២ ខែសីហា ឆ្នាំ​២០២២ ។​

​លោក អ៊ិត សំហេង បាន​កោតសរសើរ​នូវ​សមត្ថភាព របស់​មន្ត្រី​វ័យក្មេង ដែល​បាន​ប្រឡង ជាប់​អាហារូបករណ៍​ទាំងនេះ ចាត់ទុកជា​សក្តានុពល​ដ៏​ធំ ក្នុងការ​ចូលរួម​អភិវឌ្ឍន៍​ប្រទេសជាតិ ស្របទៅនឹង​គោលនយោបាយ​របស់ រាជរដ្ឋាភិបាល​កម្ពុជា ដែល​ផ្តោតទៅលើ​ការអភិវឌ្ឍ ធនធានមនុស្ស​។​

​ជាមួយគ្នានេះដែរ លោក អ៊ិត សំហេង បាន​អបអរសាទរ​ចំពោះ​និស្សិត​ជ័យលាភី អាហារូបករណ៍ ដែល​ត្រូវ​ទៅ​សិក្សា នៅ​ប្រទេស​ជប៉ុន និង​បាន​មានប្រសាសន៍ថាៈ រាជរដ្ឋាភិបាល ដែលមាន​ក្រសួង​ការងារ និង​បណ្ដុះបណ្ដាល​វិជ្ជាជីវៈ ក្រសួង​អប់រំ យុវជន និង​កីឡា មាន​មោទកភាព ដែល​បាន​បង្កើត​ឱកាស​នេះ ជូន​ដល់​និស្សិត​របស់​យើង ជា​យុវជន ហើយ​ជឿជាក់ថា ការសិក្សា​របស់​និស្សិត​អាហារូបករណ៍​ទាំងនេះ នឹង​ទទួលបាន​ជោគជ័យ ក្លាយជា​មនុស្ស​ថ្មី មាន​សមត្ថភាព​ខ្ពស់ ជាង​ពេលនេះ​។ នេះ​ជាការ​តបស្នង​ដែល​ល្អ​បំផុត សម្រាប់​ខ្លួនឯង​ផ្ទាល់ ក្រុមគ្រួសារ អាណាព្យាបាល និង​អ្នកជា​ទីស្រឡាញ់ ចំពោះ​សាមី​ស្ថាប័ន ចំពោះ​រាជរដ្ឋាភិបាល​កម្ពុជា និង​ប្រទេស ដែល​ផ្តល់​អាហារូបករណ៍​។

​លោក អ៊ិត សំហេង បាន​រំលឹក​ពី​ប្រវត្តិ​ខ្លះៗ ចាប់តាំងពី​សម័យ​រំដោះ រហូតដល់​បច្ចុប្បន្ន កម្ពុជា​បាន​បង្កើន​ធនធានមនុស្ស ប្រកបដោយ​សមត្ថភាព ទៅតាម​យុទ្ធសាស្ត្រ​របស់ សម្តេច​តេ​ជោ កាលពីមុន​យើង​មាន ផ្លូវ ទឹក ភ្លើង មនុស្ស តែ​ឥឡូវនេះ មនុស្ស​ជា​ធនធាន ទីមួយ ។ ក្នុងនោះដែរ លោក​រដ្ឋមន្ត្រី ក៏បាន​ផ្តាំ​ផ្ញើជូន​ដល់ និស្សិត​អាហារូបករណ៍ ក្រៅពី​បទពិសោធន៍ ដែល​រៀន​នៅក្នុង​សាលា ត្រូវ​ស្វែងយល់​ពីបទ​ពិសោធន៍​នានា​បន្ថែមទៀត ចូលរួម​សកម្មភាព​សង្គម ធ្វើខ្លួន​ជា​យុវជន​បន្តវេន​របស់​កម្ពុជា​។​

​ក្នុង​ពិធី​នេះដែរ លោក​រដ្ឋមន្ត្រី បាន​ចែករំលែក​បទពិសោធន៍ នៃ​វិស័យ​ការងារ និង​បណ្តុះបណ្តាល​វិជ្ជាជីវៈ ដើម្បី​ឲ្យ​បាន​យល់ដឹង ពី​វិស័យនេះ ដោយមាន​កម្មវិធី​អាទិភាព ចំនួន​៥ ដែល​កំពុង​អនុវត្តន៍ រួមមានៈ ការលើកកម្ពស់​ល័ក្ខខ័ណ្ឌ​ការងារ និង​ភាពសុខដុមរមនា ក្នុង​ទំនាក់ទំនង​វិជ្ជាជីវៈ​, ការធ្វើ​ទំនើបកម្ម​ប្រព័ន្ធ​អប់រំ បណ្តុះបណ្តាល​បច្ចេកទេស និង​វិជ្ជាជីវៈ​, ការរក្សា និង​បង្កើន​មុខរបរ និង​ការងារ​នៅក្នុង និង​ក្រៅប្រទេស​, ការអភិវឌ្ឍ​រប​បស​ន្តិ​សុខ សង្គម និង​ការពង្រឹង​សេវា​គាំទ្រ​ទូទៅ ដែល​បាន​ចូលរួមចំណែក ធ្វើ​ឲ្យ​សេដ្ឋកិច្ចសង្គម​កម្ពុជា មានការ​រីកចម្រើន ដោះស្រាយ​បញ្ហា​ការងារ កម្មករ និយោជិត មាន​ប្រាក់ចំណូល កាន់តែ​ប្រសើរ ការ​គាំពារ​សង្គម រហូតដល់​ពេលនេះ មាន​ដល់​ប្រាក់​សោធន​និវត្តន៍ សម្រាប់​បងប្អូន កម្មករ និយោជិត ដែល​ពុំ​ធ្លាប់មាន​ពីមុនមក​សោះ ក្នុង​ប្រវត្តិសាស្ត្រ​របស់ កម្ពុជា​។​

​ព្រម​ជាមួយគ្នានេះ លោក​រដ្ឋមន្ត្រី បានផ្តល់​នូវ​ព័ត៌មាន​ខ្លះៗ ពី​ស្ថានភាព​របស់​ប្រទេស​ជប៉ុន ដែលជា​ប្រទេស​អភិវឌ្ឍន៍ ជីវភាព​រស់នៅ​របស់ ប្រជាជន​ខ្ពស់ ប្រាក់ចំណូល​ក៏​ខ្ពស់​។ ជប៉ុន ក៏​ជា​ប្រទេស​មានបទពិសោធន៍​ច្រើន ក្នុងការ​បណ្តុះបណ្តាល​សិស្ស​-​និស្សិត​អន្តរជាតិ ដូច្នេះ ទាមទារ​ឲ្យ​និស្សិត​យើង ត្រូវខិតខំ​រៀនសូត្រ ដើម្បី​អនាគត​របស់ខ្លួន ត្រូវ​ចេះ​យកអាសា​គ្នា ទៅវិញទៅមក ថែរក្សា​សុខភាព ជាពិសេស​ក្នុង​បរិបទ នៃ​កូ​វីដ​-១៩ និង​ត្រូវ​ចូលរួម សកម្មភាព​សង្គម ជួយ​ផ្សព្វផ្សាយ​វប្បធម៌​ជាតិ សភាពការណ៍​ព័ត៌មាន​ត្រឹមត្រូវ ពី​ក្នុងប្រទេស​ផងដែរ​។​

​គួរ​បញ្ជាក់ថា កម្មវិធី​អាហារូបករណ៍ ក្រោម​ជំនួយ​របស់​រដ្ឋាភិបាល​ជប៉ុន ដែល​ហៅ​កាត់​ថា JDS នេះ ត្រូវបាន​ផ្តល់​មកកាន់​ប្រទេស​កម្ពុជា ក្នុង​គោលដៅ ពង្រឹង​និង​ពង្រីក​ចំណង មិត្តភាព រវាង​ប្រទេស​កម្ពុជា​-​ជប៉ុន និង​សម្រាប់​ការអភិវឌ្ឍ​ធនធានមនុស្ស នៅ​កម្ពុជា ជាពិសេស គឺ​សម្រាប់​មន្ត្រីរាជការ វ័យក្មេង ដែលមាន​សមត្ថភាព និង​សក្តានុពល​ខ្ពស់ ក្នុងការ​រួមចំណែក​អនុវត្ត​ផែនការ​អភិវឌ្ឍ​សេដ្ឋកិច្ចសង្គម ឲ្យ​បានល្អ​ប្រសើរ នាពេល​អនាគត​៕/V