​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានសភា​អាម៉េរិក​លោកស្រី ណាន់​ស៊ី ផេ​ឡូ​ស៊ី បាន​ទៅដល់​ទីក្រុង​គូ​ឡា ឡាំ​ពួរ​នៅ​ថ្ងៃ​អង្គារ ទី​០២​សីហា សំរាប់​ការឈប់​សំចត​ទី​ពីរ​ក្នុង​ដំណើរ​ទស្សនកិច្ច​អាស៊ី​របស់​លោកស្រី​​ដែល​កំពុង​បង្ក​កំហឹង​នៅ​ក្រុង​ប៉េកាំង​អំពី​ដំណើរ​ទស្សនកិច្ច​ដែល​អាច​កើតមាន​មួយ​នៅ​កោះ​តៃវ៉ាន់​។​

​ចិន​មើលឃើញ​តៃវ៉ាន់​ជា​ទឹកដី​របស់​ខ្លួន និង​បាន​ព្រមាន​ម្តង​ជា​ពីរ​ដង​ថា​ថា ខ្លួន​នឹង​ចាត់ទុក​ដំណើរ​ទស្សនកិច្ច​នេះ​ជាការ​បង្ក​រឿង​ធំ​មួយ​។​

​ទីភ្នាក់ងារ​សារព័ត៌មាន​រដ្ឋ​ប៊ែរ​ណា​ម៉ា​(Bernama)​បាន​រាយការណ៍​ថា យន្តហោះ​របស់​លោកស្រី​ផេ​ឡូ​ស៊ី​បាន​ចុះចត​នៅ​មូលដ្ឋាន​ទ័ពអាកាស​មួយ​មុន​ការជួបប្រជុំ​ជាមួយ​នាយក​រដ្ឋមន្ត្រី​និង​ប្រធាន​សភា​​ម៉ាឡេស៊ី​។​

​បន្ទាប់ពី​ធ្វើ​ទស្សនកិច្ច​នៅ​សិង្ហ​បុរី​និង​ម៉ាឡេស៊ី ដំណើរ​របស់​លោក​ស្រី​នឹង​បន្ត​ទៅ​កូរ៉េខាងត្បូង​និង​ជប៉ុន តែ​លទ្ធភាព​ទៅ​កាន់​កោះ​តៃវ៉ាន់​ស្ថិត​ក្នុង​ការរង់ចាំ​មើល​នៅឡើយ​ដោយ​អាម៉េរិក​មិន​បាន​បញ្ជាក់ថា​​ទៅ​ឬ​ក៏​មិន​ទៅទេ​។​

​នៅពេល​រដ្ឋាភិបាល​រប​ស់លោក​ប្រធានាធិបតី ចូ បៃ​ដិន​ប្រឆាំង​នឹង​ការឈៀង​ចូល​ធ្វើ​ទស្សនកិច្ច​នៅ​តៃវ៉ាន់ អ្នកនាំពាក្យ​ក្រុមប្រឹក្សាសន្តិសុខ​ជាតិ​អាម៉េរិក​លោក ច​ន ឃឺ​ប៊ី បាន​និយាយថា លោកស្រី​ផេ​ឡូ​ស៊ី​​មាន​សិទ្ធិ​ទៅ​ទីណា​ក៏បាន រួម​ទាំង​កោះ​តៃវ៉ាន់​។​

​លោក​ឃឺ​ប៊ី​បាន​និយាយ​យោង​តាម​ប្រភព​ចារកម្ម​ដែលថា ចិន​កំពុង​ត្រៀម​បង្ក​រឿង​យោធា ដែល​អាច​រួម​មាន​ការបាញ់​កាំជ្រួច​ចូល​ច្រក​សមុទ្រ​តៃវ៉ាន់ ឬ​បញ្ជូន​យន្តហោះ​ទ្រង់ទ្រាយ​ធំ​ចូល​ក្នុង​ដែនអាកាស​​តៃវ៉ាន់​។​

​លោក​ថា​លោកស្រី ផេ​ឡូ​ស៊ី ធ្វើដំណើរ​តាម​យន្តហោះ​យោធា​មួ​យ​និង​ថា នៅពេល​រដ្ឋាភិបាល​ទីក្រុង​វ៉ាស៊ីនតោន​មិន​ខ្លាច​អំពី​ការវាយប្រហារ​ផ្ទាល់ណាមួយឡើយ តែខ្លួន​បង្កើន​ហានិភ័យ​អំពី​ការគិតគូរ​ខុស​ណាមួយ​។​

​យោធា​តៃវ៉ាន់​កាលពី​ថ្ងៃ​អង្គារ​បាន​និយាយថា​ខ្លួន​ប្តេជ្ញា​ការពា​រកោះ​នេះ​ទល់នឹង​ការ​គំរាម​កើនឡើង​ពី​ចិន​ដោយសារតែ​ដំណើរ​ទស្សនកិច្ច​របស់ផេ​ឡូ​ស៊ី​។​ទោះ​ជា​សារព័ត៌មាន​នៅ​តៃវ៉ាន់​បាន​ចុះផ្សាយ​ព្រោង​​ព្រាត​អំពី​ដំណើរ​ទស្សនកិច្ច​របស់​ប្រធានសភា​អាម៉េរិក​នៅ​កោះ​គ្រប់គ្រង​ដោយ​ខ្លួនឯង​មួយ​នេះ ក៏​រដ្ឋាភិបាល​តៃវ៉ាន់​នៅ​ស្ងៀម​។​នាយករដ្ឋមន្ត្រី ស៊ូ សេង​-​ចាង​(Su Tseng-chang)​មិន​បាន​បញ្ជាក់​អះ​​អាង​ដំណើរ​នេះ​ទេ​កាលពី​ថ្ងៃ​អង្គារ​នៅពេល​ត្រូវ​បាន​អ្នកយក​ព័ត៌មាន​សួរ តែ​បាន​អរគុណ​ផេ​ឡូ​ស៊ី ចំពោះ​ការគាំទ្រ​៕

ប្រធានសភា​អាម៉េរិក​លោកស្រី ណាន់​ស៊ី ផេ​ឡូ​ស៊ី បាន​ទៅ​ដល់​ម៉ាឡេស៊ី​កាលពី​ថ្ងៃ​អង្គារ