ដោយៈ សុ​ផានី​តា / កោះកុង​៖ ក្រុមមន្ត្រី​ជំនាញ នៃ​គណៈកម្មាធិការ​សន្តិសុខ​លំហ​សមុទ្រ អាជ្ញាធរ​ខេត្តកោះកុង និង​មន្ទីរ​អង្គភាព បាន​ជួបប្រជុំ​ពិភាក្សា ផ្លាស់ប្តូរ​ព័ត៌មាន ពី​បច្ចុប្បន្នភាព នៃ​បញ្ហា​ប្រឈម​រក្សា​សន្តិសុខ និង​ទំនាក់ទំនង បង្ក្រាប​បទល្មើស​លើ​លំហ​សមុទ្រ​។​

​លោក​ឧ​ត្ត​ម​សេនីយ៍​ឯក សួន សំណាង អគ្គលេខាធិការរង ប្រធាន​ក្រុមការងារ​បច្ចេកទេស នៃ​គណៈកម្មាធិការ សន្តិសុខ​លំហ​សមុទ្រ បាន​ប្រាប់​ក្រុម​អ្នកសារព័ត៌មាន នៅ​ថ្ងៃទី​២ ខែសីហា នេះ​ថាៈ មន្ត្រី​ជំនាញ​គណៈកម្មាធិការ សន្តិសុខ​លំហ​សមុទ្រ បាន​យល់ដឹង​ច្រើន​ពី បញ្ហា​ប្រឈម​ចំពោះមុខ រយៈកាល ២ ឆ្នាំ ព្រោះតែ​វិបត្តិ​កូ​វីដ ដែល​មិន​អនុវត្ត​ការងារ បាន​ពេញលេញ​។​

​មុននឹង​ឆ្លើយតប ដោះស្រាយ ទៅតាម​តម្រូវការ​របស់​ខេត្ត ជាប់​សមុទ្រ​ទាំង ៤ ខេត្ត រួមមាន កោះកុង ព្រះសីហនុ កំពត និង​កែប លោក សួន សំណាង បានបញ្ជាក់​ថាៈ ខេត្តកោះកុង ត្រូវ​បន្ត​ទាមទារ​ប្រមូល​ព័ត៌មាន​ទិន្នន័យ ជាក់លាក់​មួយ បម្រើការ​ពង្រឹង​ថែរក្សា​សន្តិសុខ កិច្ចអភិវឌ្ឍន៍ និង​បង្កើន​ការទំនាក់ទំនង បង្ក្រាប ទប់ស្កាត់ រាល់​បទល្មើស​ផ្សេងៗ នៅលើ​ផ្ទៃសមុទ្រ​របស់​កម្ពុជា​។​

​គួរ​ជម្រាប​ថា ភាព​ធូរស្រាល និង​ការបើកទ្វារ​ប្រទេស ស្តារ​សេដ្ឋកិច្ច​ឡើងវិញ ក្រោយ​វិបត្តិ ជំងឺ​កូ​វីដ​១៩ បញ្ហា​សន្តិសុខ​លំហ​សមុទ្រ ត្រូវបាន​យកចិត្តទុកដាក់ រឹតបន្តឹង​ការពារ​ថែ​ក្សា និង​ដាក់ចេញ​នូវ​វិធាន​ការសំខាន់ ដើម្បី​បង្ក្រាប​ទប់ស្កាត់​ជាថ្មី​។​

​លោក​ឧ​ត្ត​ម​សេនីយ៍​ឯក សួន សំណាង ពន្យល់​ក្រោយ​បញ្ចប់​កិច្ចប្រជុំ​បច្ចុប្បន្នភាព​ព័ត៌មាន ពាក់ព័ន្ធ​នឹង​សន្តិសុខ​លំហ​សមុទ្រ តាម​ភូមិសាស្ត្រ និង​តំបន់​មាត់សមុទ្រ ក្នុង​ខេត្តកោះកុង​ថាៈ កន្លងទៅ ក្រុមការងារ​ជំនាញ បាន​ចុះ​ល្បាត និង​ជួយសង្គ្រោះ​ប្រជា​នេសាទ ដែល​រងគ្រោះ​ធម្មជាតិ លិច​ទូក ឆេះ​ទូក បង្ក្រាប​បទល្មើស​នេសាទ​ខុសច្បាប់ និង​តាមរក​មុខសញ្ញា លួច​ឆ្លងដែន ជាដើម​។​

​ទាក់ទិន​នឹង​បញ្ហា​សន្តិសុខ​លំហ​សមុទ្រ​នេះដែរ លោក សំ ឃិត​វៀន អភិបាលរង​ខេត្តកោះកុង បានលើកឡើង​ថាៈ អាជ្ញាធរ និង​មន្ទីរជំនាញ​របស់លោក គឺ​បាន​អនុវត្ត​ការងារ ចូលរួម​ថែរក្សា សន្តិសុខ​លំហ​សមុទ្រ​យ៉ាង​ជិតស្និត តាមរយៈ​កិច្ចសហការ ជាមួយ​ម​ន្ទិ​ី​រ​ជំនាញ ចុះ​ល្បាត បង្ក្រាប​បទល្មើស​នានា​លើ​ផ្ទៃ​ទឹក ចៀសវាង​មាន​ជនខិលខូច មួយចំនួន ប្រព្រឹត្ត​បទល្មើស ឆ្លងដែន​ខុសច្បាប់ ឬ​ធ្វើ​ប៉ះពាល់​ដល់​សន្តិសុខ សណ្តាប់ធ្នាប់​ផ្ទៃសមុទ្រ​។​

​លោក​អភិបាលរង​ខេត្តកោះកុង បាន​បន្តថាៈ អាជ្ញាធរ សហការ​ជាមួយ​មន្ទីរ​អង្គភាព​ជុំវិញ​ខេត្ត បាន​នឹង​កំពុង​ស្រង់​ស្ថិតិ ឱ្យ​ច្បាស់​លម្អិត​ឡើងវិញ ទៅលើ​ចំនួន​ដែន​កោះ ដែល​ខេត្ត​មាន ដើម្បី​គ្រប់គ្រង​កោះ ដែលជា​ទ្រព្យសម្បត្តិ​រដ្ឋ កោះ​ស្ថិតនៅក្រោម​ការវិនិយោគ ពី​វិស័យ​ឯកជន ទប់ស្កាត់​នេសាទ ទំនិញគេចពន្ធ និង​គ្រឿងញៀន ពី​សំណាក់​ជនបរទេស​។​

​កន្លងទៅ ការនេសាទ​ឆ្លងដែន​ខុសច្បាប់ ដោយសារតែ​ហេតុផល​ចំនួន​២ ទី​១ ជនបរទេស មាន​ចេតនា​ចូលលុកលុយ​នេសាទ​ក្នុ ង​ដែនសមុទ្រ​កម្ពុជា និង​ទី​២ ការនេសាទ​ជ្រុល ដោយ​ពុំមាន​ដែន​ខ្លួន តាមរយៈ​ការ​បម្លាស់​ទី​របស់​ពពួក​ធនធាន​ជលផល​សមុទ្រ​៕/V​