ដោយៈ ប​.​ជ័យ / បន្ទាយ​មាន​ជ័​យៈ បុរស​ម្នាក់ បាន​ស្លាប់​ភ្លាមៗ នៅ​កន្លែងកើតហេតុ​ដោយសារ​បើក​ម៉ូតូ​ឆ្លងផ្លូវ ត្រង់ចំណុច​ផ្លូវបំបែក​ជា​បី ហើយ​ត្រូវ​ឡានក្រុង​ដឹក​អ្នកដំណើរ បុក​។ ហេតុការណ៍​នេះ បានកើត​ឡើង កាលពី​វេលា​ម៉ោង ៩ និង​២០ នាទី យប់​ថ្ងៃទី​១ ខែសីហា ឆ្នាំ​២០២២ នៅលើ​ផ្លូវជាតិ​លេខ​៥ ម្ដុំ​ស្ថានីយ​លក់​ប្រេងសាំង ប៉ោ វណ្ណៈ ស្ថិតនៅ​ភូមិ​ស្ទឹង​បត់ សង្កាត់​ផ្សារកណ្តាល ក្រុង​ប៉ោយប៉ែត ខេត្តបន្ទាយមានជ័យ ។​

​លោក​វរសេនីយ៍ សៅ សារឿន អធិការនគរបាល​ក្រុង​ប៉ោយប៉ែត បានឱ្យដឹងថាៈ បុរសរងគ្រោះ​ដល់​ស្លាប់ គឺជា​អ្នកបើកបរ​ម៉ូតូ ឈ្មោះ យឿន យ៉ា​ត អាយុ ៤២ ឆ្នាំ មុខរបរ កម្មករ រស់នៅ​ភូមិ​ស្ទឹង​បត់ សង្កាត់​ផ្សារកណ្តាល ក្រុង​ប៉ោយប៉ែត ខេត្តបន្ទាយមានជ័យ​។

​លោក អធិការនគរបាល​ក្រុង​ប៉ោយប៉ែត បានឱ្យដឹង​ទៀតថាៈ មុនពេល​កើតហេតុ រថយន្តក្រុង ដឹក​អ្នកដំណើរ​មួយ ពណ៌​ស ពាក់​ផ្លាកលេខ ភ្នំពេញ 3C-8717 បាន​បើកបរ​ពី​ទិស​ខាងលិច ទៅខាង​កើត ហើយ​នៅពេល​បើកបរ ដល់​ផ្លូវបំបែក​ជា​បី ស្រាប់​តែមាន​ម៉ូតូ​ម៉ាក ហុងដា ហ្សូ​៊​មើ ពណ៌​ក្រហម ពាក់​ផ្លាកលេខ បន្ទាយមានជ័យ 1P-3843 បើកបរ​ពី​ទិស​ខាងត្បូង​ទៅខាង​ជើង បាន​ឆ្លងផ្លូវ បណ្តាល​រថយន្តក្រុង​ដឹក​អ្នកដំណើរ បុក​យ៉ាង​ពេញទំហឹង បណ្ដាលឱ្យ​អ្នកបើក ម៉ូតូ ស្លាប់​ភ្លាមៗ​នៅ​កន្លែងកើតហេតុ ។ ចំណែក​អ្នកបើកបរ​រថយន្ត បាន​ចត​ទុក​រថយន្ត​ចោល ហើយ​រត់​គេចខ្លួនបាត់​។ ករណីនេះ ធ្វើឱ្យ​ម៉ូតូ ខូចខាត​ធ្ងន់ រថយន្ត​ខូចខាត​ស្រាល ហើយ​សមត្ថកិច្ច​ជំនាញ​បាន​យកមក​រក្សាទុក នៅ​អធិការដ្ឋាន​នគរបាល ក្រុង​ប៉ោយប៉ែត ។

​មន្ត្រីនគរបាល​ជំនាញ បានឱ្យដឹងថាៈ មូលហេតុ បណ្ដាលមកពី​អ្នកបើក​ម៉ូតូ បើកបរ​មិន​គោរព​សិទ្ធិ​អាទិភាព ត្រង់​ផ្លូវបំបែក​ជា​បី​៕/V​