ដោយៈ ទេ​ពក​ង្រី / កំពង់ឆ្នាំងៈ អគ្គលេខាធិការដ្ឋាន​ប្រជាជន និង​អភិវឌ្ឍន៍ ក្រសួងផែនការ និង​មន្ទីរ​ផែនការ ខេត្តកំពង់ឆ្នាំង បានរៀបចំ​សិក្ខាសាលា ស្តីពី​ការពិគ្រោះ​យោបល់ លទ្ធផល​បឋម កា​សិក្សា​វាយតម្លៃ តម្រូវការ​បណ្តុះបណ្តាល លើ​ការងារ​ផែនការ គោលនយោបាយ និង​ការតាមដាន​ត្រួតពិនិត្យ និង​វាយតម្លៃ ដល់​មន្ត្រី​នៃ​មន្ទីរ​ផែនការ មកពី​បណ្តា​ខេត្ត និង​រាជធានី ខេត្ត ទាំង ២៥ ។​

​សិក្ខាសាលា​នេះ បានធ្វើ​ឡើង​នៅ​ព្រឹក​ថ្ងៃទី​២ ខែសីហា ឆ្នាំ​២០២២ ក្រោម​អធិបតីភាព លោក ទួន ថាវរៈ រដ្ឋលេខាធិការ ក្រសួងផែនការ និង​មានការ​អញ្ជើញ​ចូលរួម​ពី​សំណាក់ លោក ឡុង ឈុន​ឡៃ ប្រធាន​ក្រុមប្រឹក្សា​ខេត្ត លោក ស៊ុន សុ​វណ្ណា​រី​ទ្ធិ អភិបាលខេត្ត​កំពង់ឆ្នាំង និង​លោក លោកស្រី ថ្នាក់ដឹកនាំ​មន្ទីរ អង្គភាព​ពាក់ព័ន្ធ ជុំវិញ​ខេត្ត ជាច្រើន​នាក់​។​

​នៅ​ក្នុងឱកាស​សិក្ខាសាលា​នេះ លោក ស៊ុន សុ​វណ្ណា​រី​ទ្ធិ បាន​គូសបញ្ជាក់ថាៈ ខេ​ត​កំពង់ឆ្នាំង គឺជា​ខេត្ត​មួយ ដែល​ទទួលបាន​ការអភិវឌ្ឍ​លើក​គ្រប់​វិស័យ ជា​បន្តបន្ទាប់ តាម​កម្មវិធី នយោបាយ​យុទ្ធសាស្ត្រ​ចតុកោណ របស់​រាជរដ្ឋាភិបាល ។ ខេត្តកំពង់ឆ្នាំង ជា​ខេត្ត​ដែលមាន សក្តានុពល ពឹង​ផ្អែកលើ​វិស័យ​កសិកម្ម ក​សិ​-​ឧស្សាហកម្ម និង​វិស័យ​ទេសចរណ៍ ទាក់ទាញ​បាន​ភ្ញៀវ​ជាតិ និង​អន្តរជាតិ មក​ទស្សនា​កម្សាន្ត​។​

​ចំពោះ​ចក្ខុវិស័យ​របស់​ខេត្តកំពង់ឆ្នាំង នាពេលខាងមុខ រដ្ឋបាលខេត្ត នឹង​ពង្រឹង​ឱ្យ​កាន់តែខ្លាំង បន្ថែមទៀត លើ​វិស័យ​កសិកម្ម ដែលមាន​ស្រាប់ ដើម្បី​ទាក់ទាញ និង​ស្រូបយក​អ្នកវិនិយោគ ចូលមក​បណ្តាក់ទុន តាមរយៈ​ការរៀបចំ​វារីវប្បកម្ម ចិញ្ចឹម​ត្រី បង្កង និង​ចិញ្ចឹមសត្វ​ចៀម និង​ពពែ ។​

​នៅក្នុង​ឱកាស​នោះដែរ លោក ទួន ថាវរៈ រដ្ឋលេខាធិការ ក្រសួងផែនការ បាន​គូសបញ្ជាក់ ថាៈ សិក្ខាសាលា​ដែល​រៀបចំឡើង នាពេលនេះ គឺ​ដើម្បី​ពិនិត្យ និង​ពិភាក្សា និង​ប្រមូល មតិយោបល់ ឬ​ធាតុ​ចូល​បន្ថែម ដើម្បី​កែលម្អ​លទ្ធផល នៃ​ការសិក្សា​វាយតម្លៃ តម្រូវការ​បណ្តុះបណ្តាល​នេះ ។

​លោក បានបញ្ជាក់​ទៀតថាៈ សិក្ខាសាលា​នេះ ពិតជា​មានតម្លៃ ក្នុងការ​ពិនិត្យឡើងវិញ អំពី​បញ្ហា​ប្រឈម​នានា ដែល​រាជរដ្ឋាភិបាល បាន​នឹង​កំពុង​ជួបប្រទះ ក្នុង​ដំណើរការ នៃ​ការអនុវត្ត នូវ​យុទ្ធសាស្ត្រ​ចតុកោណ ក៍​ដូចជា​យុទ្ធសាស្ត្រ​អភិវឌ្ឍន៍ តាម​វិស័យ​នានា រួមទាំង​គោលនយោបាយ​ជាតិ ប្រជាជន​ផងដែរ ។

​បទពិសោធន៍​ក្នុង​ដំណើរការ​រៀបចំ​ផែនការ​សកម្មភាព ឆ្នាំ​២០១៦ ដល់​ឆ្នាំ​២០១៨ នៃ​គោលនយោបាយ​ជាតិ ២០១៦-២០៣០ បានបង្ហាញ​អំពី ចំណុច​ខ្វះខាត ពាក់ព័ន្ធ និង​ដំណើរ​ការរៀបចំ​ផែនការ គោលនយោបាយ និង​ការតាមដាន​ត្រួតពិនិត្យ វាយតម្លៃ របស់​ក្រសួង ស្ថាប័ន​ពាក់ព័ន្ធ មិន​ឆ្លើយតប​ទៅនឹង​តម្រូវការ​។​

​លោក​បាន​បញ្ជាក់ទៀតថាៈ តាមរយៈ​នៃ​សិក្ខាសាលា​នេះ នឹង​ទទួលបាន​នូវ​ធាតុ​ចូល សំខាន់ៗ ជា​ត្រីវិស័យ ក្នុងការ​អភិវឌ្ឍ​សមត្ថភាព​ជំនាញ ឱ្យស្រប​តាម​ទំហំ​ការងារ ដែល​ឆ្លុះបញ្ចាំង តាមរយៈ​ចក្ខុវិស័យ​ក្នុងការ​បណ្តុះបណ្តាល​ធន​ធាន​មនុស្ស និង​ពង្រឹង​ស្ថាប័ន ទាំង​ថ្នាក់ជាតិ និង​ថ្នាក់ក្រោម​ជាតិ ៕/V​