​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កាសែត The Guardian បាន​រាយការណ៍​កាលពី​ថ្ងៃ​អង្គារ​ទី​២​សីហា​ថា ឯកអគ្គរដ្ឋទូត​ចិន​ប្រចាំ​ចក្រភព​អង់គ្លេស​លោក ចេង ចឺគ័​ង (Zheng Zeguang) បាន​ប្តេជ្ញា​ថា​នឹង​មាន “​ផលវិបាក​ធ្ងន់ធ្ងរ​” ប្រសិនបើ​សមាជិក​សភា​អង់គ្លេស​ធ្វើ​ទស្សនកិច្ច​នៅ​កោះ​តៃវ៉ាន់​។​

​លោក​ចេង​បាន​និយាយ​នៅក្នុង​សន្និសីទ​សារព័ត៌មាន​នៅ​ទីក្រុង​ឡុង​ដ៍​ថា​ដំណើរ​ទស្សនកិច្ច​នេះ​នឹង​ជ្រៀតជ្រែក​ក្នុង​កិច្ចការ​ផ្ទៃក្នុង​របស់​ចិន​ហើយ​នឹង​នាំឱ្យ​មាន​ផលវិបាក​ធ្ងន់ធ្ងរ​នៅក្នុង​ទំនាក់ទំនង​​ចិន​-​ចក្រភព​អង់គ្លេស​។​

​កាសែត The Guardian បាន​ដកស្រង់​សម្តី​លោក​ចេង ថា “​យើង​សូម​អំពាវនាវ​ឱ្យ​ភាគី​អង់គ្លេស​គោរព​តាម​សេចក្តីថ្លែងការណ៍​រួម​ចិន​-​អង់គ្លេស ហើយ​កុំ​មើលស្រាល​ភាព​រសើប​ខ្លាំង​នៃ​បញ្ហា​តៃវ៉ាន់ ដោយ​កុំ​ដើរ​តាម​គន្លង​របស់​សហរដ្ឋអាម៉េរិក​”​។​

​ការអត្ថាធិប្បាយ​របស់​លោក​ចេង​បាន​ធ្វើឡើង​បន្ទាប់​ពី​កាសែត The Guardian បាន​រាយការណ៍​កាលពី​ថ្ងៃ​ចន្ទ​ថា​គណៈកម្មាធិការ​កិច្ចការ​បរទេស​របស់​សភា​អង់គ្លេស​កំពុង​រៀបចំ​ផែនការ​ធ្វើ​ទស្សន​​កិច្ច​ទៅកាន់​កោះ​តៃវ៉ាន់​ប្រហែល​ជា​នៅក្នុង​ខែវិច្ឆិកា​ឬ​ដើម​ខែ​ធ្នូ​ឆ្នាំ​នេះ​។​

​តៃវ៉ាន់​ប្រឈមមុខ​នឹង​សម្ពាធ​កាន់តែ​ខ្លាំង​ពី​ចិន ដែល​ចាត់ទុក​កោះ​គ្រប់គ្រង​តាម​បែប​ប្រជាធិបតេយ្យ​នេះ​ជា​ទឹកដី​របស់​ខ្លួន​។​

​ដោយឡែក ភាព​តានតឹង​បាន​កើនឡើង​នៅក្នុង​ច្រក​សមុទ្រ​តៃវ៉ាន់ បន្ទាប់​ពី​ប្រធាន​សភា​តំណាងរាស្ត្រ​អាម៉េរិក លោកស្រី ណាន់​ស៊ី ផេ​ឡូ​ស៊ី (Nancy Pelosi)​បាន​ទៅ​ដល់​កោះ​តៃវ៉ាន់​កាលពី​ល្ងាច​ថ្ងៃ​​អង្គារ ជា​ទង្វើ​មួយ​ដែល​ចិន​បាន​ថ្កោលទោស​ថា​ជា​ការគំរាមកំហែង​ដល់​សន្តិភាព​និង​ស្ថិរភាព​៕

​ឯកអគ្គរដ្ឋទូត​ចិន​ប្រចាំ​ចក្រភព​អង់គ្លេស​លោក ចេង ចឺគ័​ង