​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកលេង​កាយ​វប្បកម្ម​ប្រេ​ស៊ីល​និង​ជា​តារា TikTok ដែល​ទទួលបាន​អ្នកតាមដាន ១,៦ លាន​នាក់​ដោយ​ការចាក់​ប្រេង​ដែល​គំរាមកំហែង​ដល់​អាយុជីវិត​ដើម្បី​​បង្កើន​សាច់ដុំ​ទ្រូង​ឱ្យបាន​ទំហំ ២៣ អ៊ី​ញ បាន​ទទួល​មរណភាព​ក្នុង​ថ្ងៃ​ខួបកំណើត​គម្រប់ ៥៥ របស់​គាត់​នៅ​ទីក្រុង​រី​បេរ៉ា​វ ប្រេ​តូ (Ribeirao Preto) កាលពី​ថ្ងៃ​អង្គារ ទី​២៦ កក្កដា​។​

​លោក វ៉ាល់​ឌៀ សេ​ហ្គា​តូ (Valdir Segato) បាន​ប្រើ​ការចាក់​ប្រេង Synthol អស់​ជាច្រើន​ឆ្នាំ បើទោះបីជា​មាន​ហានិភ័យ​នៃ​ជំងឺ​ដាច់​សរសៃឈាម​ខួរក្បាល​និង​ការឆ្លង​មេរោគ​ដើម្បី​បង្កើត​​សាច់ដុំ​ទ្រូង សាច់ដុំ​ដៃ​និង​សាច់ដុំ​ខ្នង​ធំៗ​។​

​លោក​សេ​ហ្គា​តូ ដែល​មាន​ដើមកំណើត​នៅ​ទីក្រុង​សៅ​ប៉ូ​ឡូ (Sao Paulo) ពីមុន​ធ្លាប់បាន​និយាយថា គាត់​ត្រូវបាន​បំផុសគំនិត​ដោយ​រូបរាងកាយ​របស់​លោក អា​ណុល ស្វា​ហ្សេ​ណេ​ហ្គើ (Arnold Schwarzenegger) និង​តួអង្គ​ប្រឌិត​ដូចជា The Hulk ហើយ​និយាយ​អំពី​របៀប​ដែល​គាត់​មាន​មោទនភាព​ដែល​គេ​ស្គាល់​តាម​ដងផ្លូវ​ថា​ជា “​បិសាច​”​។​

​កាល​ពី​ប្រាំមួយ​ឆ្នាំមុន គាត់​ត្រូវបាន​គេ​ព្រមាន​ថា គាត់​ប្រឈមមុខ​នឹង​ការ​កាត់​អវៈយវៈ ឬ យ៉ាងហោច​ណាស់​រង​ការខូចខាត​សរសៃប្រសាទ​និង​ការ​ខូច​ទ្រង់ទ្រាយ​សាច់ដុំ​ប្រសិនបើ​គាត់​បន្ត​ចាក់​ប្រេង​​ដើម្បី​ពង្រីក​ខ្លួន​គាត់​។ ប៉ុន្តែ​លោក​សេ​ហ្គា​តូ ដែល​ពីមុន​ជា​កម្មករសំណង់ បាន​និយាយថា គាត់​ចូលចិត្ត​ការចាប់អារម្មណ៍​ពី​អ្នក​ដទៃ ហើយ​ចង់​បាន​សាច់ដុំ​កាន់តែ​ធំ​។​

​គាត់​បាន​និយាយ​ក្នុង​ឆ្នាំ ២០១៦ ថា “​ពួកគេ​ហៅ​ខ្ញុំ​ថា Hulk ស្វា​ហ្សេ​ណេ​ហ្គើ និង He-Man គ្រប់ពេលវេលា ហើយ​ខ្ញុំ​ចូលចិត្ត​វា​។ ខ្ញុំ​បាន​បង្កើន​សាច់ដុំ​ទ្រូង​របស់ខ្ញុំ​ទ្វេដង ប៉ុន្តែ​ខ្ញុំ​នៅតែ​ចង់​ធំ​ជាង​នេះ​”​។​

​គាត់​បាន​បង្ហោះ​រូបភាព​និង​វីដេអូ​ដោយ​មោទនភាព​លើ​បណ្តាញ​សង្គម ដោយ​ហៅ​ខ្លួន​គាត់​ថា Valdir Synthol នៅលើ Instagram​។​

​ប៉ុន្តែ​បើ​យោងតាម​ប្រព័ន្ធ​ផ្សព្វផ្សាយ​ក្នុងស្រុក មុន​ពេល​គាត់​ស្លាប់ គាត់​មាន​មិត្តភក្តិ​មក​មើល​តិចតួច​ណាស់ ហើយ​រស់​នៅក្នុង​ជីវិត​ឯកោ​ទោះបីជា​មាន​បណ្តាញ​សង្គម​ដ៏​ធំ​បន្ទាប់​ពី​គាត់​បាន​បង្ហោះ​វី​ដេ​​អូ​ជាច្រើន​ឆ្នាំ​មកនេះ​ក៏ដោយ​៕

លោក វ៉ាល់​ឌៀ សេ​ហ្គា​តូ បាន​ស្លាប់​កាលពី​ថ្ងៃទី​២៦ កក្កដា ឆ្នាំ​២០២២ ចំ​ខួប​គម្រប់ ៥៥ ឆ្នាំ​របស់​គាត់​