ដោយ​: ប​.​ខុន / ភ្នំពេញ​: ទឹក​បឹង​ទន្លេសាប​នៅ​ថ្ងៃទី​៣​ខែសីហា បាន​ឡើងដល់​កម្រិត​កម្ពស់​៣,៦២​ម៉ែត្រ បន្ទាប់ពី​ទឹកទន្លេ​មេគង្គ​នៅ​ស្ថានីយ​ជលសា​ស្ត្រ​ទន្លេបាសាក់​ចតុមុខ បាន​ឡើងដល់​កម្ពស់​៥,១១​ម៉ែត្រ​។ កម្ពស់​ទឹក​បឹង​ទន្លេសាប​នៅពេលនេះ គឺ​ជិត​ប្រហាក់ប្រហែល​នឹង​កម្ពស់​ទឹក​មធ្យម​ច្រើន​ឆ្នាំមាន​អំណោយផល​ល្អ​ដល់​មច្ឆា​ជាតិ និង​ជីវៈចម្រុះ នៅ​តំបន់​បឹង​ទន្លេសាប​។​

​លោក ម៉ៅ ហាក់ អនុប្រធាន​អាជ្ញាធរ​ទន្លេសាប បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៣​ខែសីហា​ឆ្នាំ​២០២២​ថា ទឹក​បឹង​ទន្លេសាប​ដែល​បាន​ងើប​ឡើងដល់​កម្រិត​កម្ពស់​៣,៦២​ម៉ែត្រ គឺ​ជិត​ប្រហាក់​ប​ហែល​នឹង​កម្ពស់​ទឹក​មធ្យម​ច្រើន​ឆ្នាំ​(៣,៩៩​ម៉ែត្រ​) ជា​កម្ពស់​ទឹក​មាន​អំណោយផល​ល្អ​ដល់​ជីវៈចម្រុះ​នៅ​តំបន់​បឹង​ទន្លេ ជាពិសេស​ត្រី​ដោយសារ​ទឹក​ឡើង​ចំពេល​ត្រី កំពុង​ពង​កូន​។​

​អនុប្រធាន​អាជ្ញាធរ​ទន្លេសាប​រូបនេះ​បាន​បញ្ជាក់ថា​កម្ពស់​ទឹក​ឡើងដល់​កម្រិត​៣,៦២​ម៉ែត្រ​នេះ​បាន​លិច​ផ្ទៃដី​តំបន់​បី​ទាំងស្រុង​ហើយ​បន្ត​លិច​ដល់​តំបន់​ពីរ​ជា​លំដាប់​ទៀត​តែ​លិច​មិនទាន់​ជ្រៅ​ទេ ។ ទឹក​បឹង​ទន្លេសាប​ចាប់ពីពេលនេះ​ទៅ​ងើបឡើង​លឿន​រាល់ថ្ងៃ ដោយសារ​តំបន់​ផ្ទៃ​រងទឹក​ភ្លៀង​ជុំវិញ​បឹង​ទន្លេសាប​មានទឹក​គ្រប់គ្រាន់​សម្រាប់​ប្រើប្រាស់​អស់ហើយ បើ​មាន​ភ្លៀង​ធ្លាក់​បន្ថែម​គឺ​វា​ហូរ​ធ្លាក់​បឹង​ទន្លេសាប​ភ្លាមៗ ជាមួយនឹង​ទឹក​ហូរ​ចូល​មកពី​ទន្លេមេគង្គ​។​

​លោក​ម៉ៅ ហាក់ បាន​និយាយ​ឱ្យដឹង​ផងដែរ​ថា​ទឹកទន្លេ​មេគង្គ​នៅ​ចតុមុខ​ថ្ងៃទី​៣​ខែសីហា​នេះ​មាន​កម្ពស់​៥,១១​ម៉ែត្រ ខ្ពស់ជាង​ថ្ងៃទី​០២​សីហា​០,០២​ម៉ែត្រ តែ​នៅតាម​បណ្តា​ស្ថានីយ​ជល​សាស្ត្រ​មេគង្គ​លើ បន្ត​ស្រក​ចុះ​នៅ​គ្រប់​ស្ថានីយ រួច​វា​នឹង​ងើបឡើង​មកវិញ​នៅ​ប៉ុន្មាន​ថ្ងៃ​ខាងមុខ បន្ទាប់ពី​មាន​បាតុភូត​ថ្មី​កើតមាន​ហើយ​មាន​ឥទ្ធិពល​ទឹកភ្លៀង​ដល់​តំបន់​អាង​ទន្លេ​មេ គ​ង្គ​លើ​។​តាម​ការតាមដាន​ទឹកទន្លេ​មេគង្គ​នៅ​ចតុមុខ​ក្នុង​រដូវវស្សា​ឆ្នាំ​២០២២​នេះ អាច​ឡើងដល់​កម្រិត​ក​ម្ព​ស់​ជាង​៩​ម៉ែត្រ​នៅ​ចតុមុខ ដូច​ក្រសួង​បាន​ព្យា ករ​ណ៍​កាលពី​ដើមរដូវ​វស្សា​កន្លងទៅនេះ​៕​