​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ អន្លង់​ដ៏​ធំ​សម្បើម​មួយ ដែល​គេ​ផ្សារភ្ជាប់​ទៅ​នឹង​អណ្តូងរ៉ែ​ទង់ដែង​មួយ​នៅ​ភាគ​ខាងជើង​ប្រទេស​ស៊ី​លី ដែល​លេច​រូបរាង​ឡើង​កាលពី​ចុង​សប្តាហ៍​ត្រូវ​បាន​ថត​ក្នុង​រូបភា​​ព​ថ្មី​ដ៏​គួរឱ្យភ្ញាក់ផ្អើល​។​

​អន្លង់​ដែលមាន​ផ្ទៃ​មុខកាត់ ២៥ ម៉ែត្រ​ដ៏​អាថ៌កំបាំង​នេះ​បាន​បង្ហាញ​ខ្លួន​កាលពី​ថ្ងៃ​សៅរ៍​ទី​៣០​កក្កដា​នៅក្នុង​ឃុំ​ធៀរ៉ា អា​ម៉ា​រី​ល​ឡា (Tierra Amarilla) ក្នុង​តំបន់​អា​តា​កា​ម៉ា (Atacama) នៅ​ជិត​អណ្តូងរ៉ែ អាល់​កា​ប៉ា​រ៉ា​រ៉ូ​សា (Alcaparrosa) ដ៏​ធំ​សម្បើម ហើយ​ត្រូវ​គេ​គិតថា​មាន​ជម្រៅ ២០០ ម៉ែត្រ​។​

​ប្រព័ន្ធ​ផ្សព្វផ្សាយ​របស់​ស៊ី​លី​បាន​ចេញផ្សាយ​រូបភាព​ពីលើ​អាកាស​នៃ​បាតុភូត​ចម្លែក​នេះ ដែល​បាន​កើតឡើង​នៅលើ​ដី​ដែល​ដំណើរការ​ដោយ​ក្រុមហ៊ុន​អណ្តូងរ៉ែ​ទង់ដែង Lundin Mining របស់​កាណាដា ស្ថិតនៅ​ចម្ងាយ​ប្រហែល ៦៨០ គីឡូម៉ែត្រ​ពី​ភាគ​ខាងជើង​រដ្ឋធានី​សាន់ត្យាហ្គោ (Santiago) ។​

​អភិបាល​តំបន់ លោក គ្រីស្តូ​បាល់ ហ្ស៊ូ​នីហ្គា (Cristobal Zuniga) កាលពី​ថ្ងៃអាទិត្យ​បាន​បញ្ជាក់​ពី​វត្តមាន​អន្លង់​នេះ ដែល​មាន​ទីតាំង​ស្ថិតនៅ​ជាយ​ទីប្រជុំជន​អា​តា​កា​ម៉ា​ហើយ​បាន​និយាយ​អំពី​ការ​​ភ័យ​ខ្លាច​របស់​អ្នក​រស់នៅ​ក្បែរ​នោះ​ថា ការជីក​យក​រ៉ែ​ច្រើនពេក​នៅក្នុង​តំបន់​នេះ​អាច​នាំឱ្យ​មាន​ផលវិបាក​ដ៏​មហន្តរាយ​។​

​លោក​អភិបាល​បាន​និយាយថា “​កាល​ពី​ម្សិលមិញ [​ថ្ងៃ​សៅរ៍ ទី ៣០​ខែកក្កដា​]​យើង​បាន​ទទួល​ពាក្យបណ្តឹង​របស់​ប្រជាពលរដ្ឋ​ទាក់ទង​នឹង​អន្លង់​ដែល​បាន​កើតឡើង​នៅ​ទី​នេះ​នៅក្នុង​សហគមន៍​របស់​យើង​​នៅ​ជិត​អណ្តូងរ៉ែ​អាល់​កា​ប៉ា​រ៉ា​រ៉ូ​សា​”​។​

“​ពួកយើង​មាន​ការព្រួយបារម្ភ ដោយសារ​វា​ជា​ការព្រួយបារម្ភ​ដែល​យើង​តែងតែ​គិត​នៅក្នុង​សហគមន៍ ព្រោះ​យើង​ត្រូវ​បាន​ហ៊ុម​ព័ទ្ធ​ដោយ​កន្លែង​ជីក​រ៉ែ និង​ការងារ​ក្រោម​ដី​នៅក្រោម​សហគមន៍​របស់​យើង​”​។​

​មិនទាន់​មាន​ការបញ្ជាក់​ជា​ផ្លូវការ​នៅឡើយ​ទេ​ថា​តើ​អន្លង់​នេះ​បណ្តាល​មក​ពី​សកម្មភាព​ពាក់ព័ន្ធ​នឹង​ការជីក​យក​រ៉ែ​ឬ​យ៉ាងណា ប៉ុន្តែ​មន្ត្រី​មូលដ្ឋាន​និយាយថា អន្លង់​នេះ​នៅតែ​បន្ត​រីក​មាឌ​៕

​អន្លង់​ក្នុង​ទីប្រជុំជន​អា​តា​កា​ម៉ា​នៅតែ​បន្ត​រីក​មាឌ