ដោយ​: សុផល / ភ្នំពេញ​: ក្រសួងទេសចរណ៍ និង​គណៈកម្មាធិការ​ជាតិ​អូឡាំពិក​កម្ពុជា ដោយ​ទទួលបាន​ការអនុញ្ញាត​ដ៏​ខ្ពង់ខ្ពស់​ពី​រាជរដ្ឋាភិបាល​នឹង​រៀបចំ​“​ព្រឹត្តិការណ៍​កីឡា​ទេសចរណ៍ បាល់ទាត់​មិត្តភាព​តារា​វ័យ​ចំណាស់​មេគង្គ ដែល​នឹង​ប្រព្រឹត្តទៅ​ចាប់ពី​ថ្ងៃទី​០៤ ដល់​ថ្ងៃទី​០៧ ខែសីហា ឆ្នាំ​២០២២ នៅ​កីឡដ្ឋាន​ខេត្តសៀមរាប​។​

​ព្រឹត្តិការណ៍​កីឡា​នេះ មានការ​ចូលរួម​ពី​កីឡាករ​វ័យ​ចំណាស់​កម្ពុជា​ចំនួន ២១​នាក់ កីឡាករ​វ័យ​ចំណាស់​ថៃ ឡាវ​ចំនួន ១១០ នាក់ និង​កីឡាករ​វ័យ ចំណាស់​វៀតណាម​ចំនួន ២០​នាក់​។​

​ប្រភព​ក្រសួងទេសចរណ៍ បានឱ្យដឹងថា​៖ ការរៀបចំ​ព្រឹត្តិការណ៍​នេះ ក្នុង​គោលបំណង ពង្រីក​នូវ​ផលិតផល​ទេសចរ​ណ៏​សំបូរបែប​តាមរយៈ​ព្រឹត្តិការណ៍ កីឡា​ទេសចរណ៍​បាល់ទាត់​វ័យ​ចំណាស់ និង​បង្កើន​កិច្ចសហប្រតិបត្តិការ​អន្តរជាតិ​នៅ​បណ្តា​ប្រទេស​តាម​ដង​ទន្លេមេគង្គ ផ្សព្វផ្សាយ​សក្តានុពល ទេសចរណ៍​តំបន់​សៀមរាប​-​អង្គរ ជំរុញ​កំណើន​ភ្ញៀវទេសចរ អភិវឌ្ឍ​ធនធានមនុស្ស​ក្នុង​វិស័យ​កីឡា​ទេសចរណ៍ និង​ទាក់ទាញ​ចំណាប់​អារ​ម្ម​ណ៏ ពី​សំណាក់​អ្នក​ស្នេហា​វិស័យ​កីឡា​ជាតិ និង​អន្តរជាតិ ជាពិសេស ចូលរួម​លើកស្ទួយ​វិស័យ​កីឡា​ទេសចរណ៍ នៅ​ព្រះរាជាណាចក្រ​កម្ពុជា ដើម្បី​អបអរសាទរ​ដំណើរ​ឆ្ពោះទៅ​ការប្រកួត កីឡា​SEA GAMES – ASEAN PARA GAMES 2023 ដែល​កម្ពុជា​ធ្វើជា​ម្ចាស់ផ្ទះ​ផងដែរ​។​

​ក្រសួងទេសចរណ៍ សូម​គោរព​អញ្ជើញ​មន្ត្រីរាជការ ប្រជាពលរដ្ឋ សិស្សានុសិស្ស និង អ្នក​ស្នេហា​វិស័យ​កីឡា​ក្នុង​ខេត្តសៀមរាប រួមទាំង​អ្នកសារព័ត៌មាន​ជាតិ និង​អន្តរជាតិ​ចូលរួម​ទស្សនា​ដោយ​សេរី​ឱ្យបាន​ច្រើន​កុះករ​៕​