​ប្រែ​សម្រួល : កញ្ញា​ដា​លី​ស (The Drive) ៖ ការ​សាក​រថយន្ត​អគ្គិសនី​បាន​ឡើង​ហួស​មួយកម្រិត​ទៀត​ហើយ​។ ក្រុមហ៊ុន Ford គឺ​ស្ថិត​ក្នុងចំណោម​ក្រុមហ៊ុន​ផលិត​រថយន្ត​មួយ ដែល​កំពុង​ដោះស្រាយ​បញ្ហា​រំខាន​ចិត្ត​ដ៏​ធ្ងន់ធ្ងរ​មួយ​នេះ ហើយ​គម្រោង​ចុងក្រោយ​បំផុត​របស់​ខ្លួន​ជាមួយ​សាកលវិទ្យាល័យ​ដ​ត​ម៉ាន់ (Dortmund) ក្នុង​ប្រទេស​អាល្លឺម៉ង់ ដែល​បាន​ប្រកាស​កាលពី​ថ្ងៃ​ព្រហស្បតិ៍ គឺជា​ឆ្នាំង​សាក​រ៉ូបូត ដែល​ធ្វើឱ្យ​វា​កាន់តែ​ងាយស្រួល​សម្រាប់​អ្នកបើកបរ​ពិការ​ក្នុងការ​ដោត​សាក​ភ្លើង​។​

​ការ​ដោត​សាក​ភ្លើង​រថយន្ត​អាច​ជា​ការលំបាក​សម្រាប់​ជនពិការ ដោយសារ​តែ​វិធី​ដាក់​ឆ្នាំង​សា​ក​និង​ទីតាំង​ដោត​នៅលើ​រថយន្ត​។ ប្រសិនបើ​ឆ្នាំង​សាក​ពិបាក​ដោត​សម្រាប់​ជនពិការ នោះ​ពួកគេ​នឹង​ជួប​ការលំបាក​ខ្លាំង​ជាមិនខាន​។​

​នៅពេល​បច្ចេកវិជ្ជា​សាក​ភ្លើង​ដើរ​ទៅ​មុខ​កាន់តែ​លឿន ខ្សែ​សាក​ចាំបាច់​ត្រូវតែ​ត្រជាក់​ជាង​មុន ហើយ​វា​នឹង​កាន់តែ​ធ្ងន់​ជាង​មុន ជាពិសេស​សម្រាប់​ជនពិការ​។

​ក្រុមហ៊ុន Ford បាន​បង្កើត​ដំណោះស្រាយ​លើ​រឿងនេះ​សម្រាប់​ពួកយើង​។ នៅ​បរិវេណ​សាកលវិទ្យាល័យ​ដ​ត​ម៉ាន់ ក្រុមហ៊ុន Ford បាន​ផលិត​ឆ្នាំង​សាក​ដែល​នឹង​ដោត​នៅពេល​អ្នកបើកបរ​ចត​ក្បែរ​វា ហើយ​បើក​ដំណើរការ App នៅលើ​ទូរស័ព្ទ​របស់​ពួកគេ​។​

​ខ្សែ​សាក​ធម្មតា​ត្រូវបាន​ដាក់បញ្ចូល​ទៅក្នុង​ដៃ​រ៉ូបូត ដែល​ស្វែងរក​ចំណុច​សាក​តាមរយៈ​ម៉ាស៊ីន​ពិនិត្យមើល (​មាន​កាមេរ៉ា​នៅជាប់​នឹង​ដៃ​) ហើយ​បន្ទាប់​មក​វា​នឹង​កែតម្រូវ​ដោយ​ខ្លួន​វា​ដើម្បី​ដោត​សាក​ភ្លើង​។ អ្នកបើកបរ​អាច​បន្ត​នៅក្នុង​ឡាន ឬ​ចេញ​ក្រៅ ហើយ​ធ្វើ​អ្វី​ផ្សេង ខណៈ​រ៉ូបូត​ធ្វើ​ការងា​ររបស់​វា​៕

​ឆ្នាំង​សាក​រ៉ូបូត​កំពុងសាក​ភ្លើង​ដល់​រថយន្ត Mustang Mach-E របស់ Ford