ដោយៈ ទេពកង្រី / កំពង់ឆ្នាំងៈ គិតត្រឹមថ្ងៃទី៣ សីហា នេះ ខេត្តកំពង់ឆ្នាំង បានរកឃើញ អ្នកឆ្លងជំងឺកូវីដ ១៩ ប្រភេទអូមីក្រុង ចំនួន ២១ នាក់ ហើយទន្ទឹមនឹងនេះ លោកប្រធាន មន្ទីរសុខាភិបាលខេត្ត បានអំពាវនាវដល់ប្រជាពលរដ្ឋ នៅក្នុងខេត្តកំពង់ឆ្នាំងទាំងមូល មេត្តាប្រុងប្រយ័ត្ន និងស្នើសុំចូលរួមអនុវត្តវិធានការ ៣ កុំ និង ៣ ការពារ ឲ្យបានទាំងអស់គ្នា ដើម្បីជៀសវាងការឆ្លងរីករាលដាលបន្តនៅក្នុងសហគមន៍។
លោក ងិន ចាន់សារ៉េត ប្រធានមន្ទីរពេទ្យបង្អែកស្រុកប្រតិបត្តិខេត្តកំពង់ឆ្នាំង នៅល្ងាចថ្ងៃទី ៣ ខែសីហា ឆ្នាំ២០២២ នេះ បានឱ្យដឹងតាមទូរស័ព្ទថាៈ ក្រុមគ្រូពេទ្យស្រុកបរិបូណ៌ នៅព្រឹកថ្ងៃទី ៣ ខែសីហានេះ បានចុះធ្វើរ៉ាពីតតេស្ត ដោយបានរកឃើញវិជ្ជមានកូវីដ ១៩ លើព្រះសង្ឃចំនួន ១៦ អង្គ និងឧបាសក ១នាក់ នៅក្នុងវត្តអង្គ ដែលស្ថិតនៅក្នុងភូមិដើមជ្រែ ឃុំខុនរ៉ង ស្រុកបរិបូណ៌ ។
ទាក់ទងនឹងករណីនេះដែរ លោក ចេង ចាន់ដូណា អភិបាបាលស្រុកបរិបូណ៌ ក៏បានបញ្ជាក់ ឱ្យដឹងថាៈ ព្រះសង្ឃនៅវត្តអង្គ គឺមានអាការៈមិនស្រួលព្រះទ័យ ដោយការសង្ស័យ ទើបហៅក្រុមគ្រូពេទ្យស្រុក មកពិនិត្យធ្វើសំណាក តាមរយៈរ៉ាពីតតេស្ត ដោយរកឃើញ វិជ្ជមានកូវីដ១៩ លើព្រះសង្ឃ ចំនួន ១៦ អង្គ និងឧបាសកម្នាក់ ។
ដោយឡែក មួយផ្នែកទៀត ការធ្វើតេស្តរហ័សនេះ នៅក្នុងសាលាខេត្ត នាព្រឹកថ្ងៃដដែលនេះ ដើម្បីចូលរួមក្នុងពិធីមួយ នៅព្រឹកថ្ងៃ៤ ក៏បានរកឃើញអ្នកមានវិជ្ជមានកូវីដ១៩ ចំនួន ៤ នាក់ ផងដែរ លើមន្ត្រីរាជការ ។
ចំពោះហេតុការណ៍ខាងលើនេះ លោកវេជ្ជបណ្ឌិត ប្រាក់វ៉ុន ប្រធានមន្ទីរសុខាភិបាល ខេត្តកំពង់ឆ្នាំង បានបញ្ជាក់ថាៈ យើងនឹងឲ្យព្រះសង្ឃព្យាបាលជំងឺនេះ នៅក្នុងវត្ត ដាច់ដោយឡែក ដោយមិនឲ្យមានការទំនាក់ទំនង ជាមួយប្រជាពលរដ្ឋ នៅក្នុងមូលដ្ឋាន នោះឡើយ ដើម្បីទប់ស្កាត់ការឆ្លងរាលដាល ជំងឺកូវីដ១៩ នៅក្នុងសហគមន៍។
ទន្ទឹមនឹងនេះ លោកប្រធានមន្ទីរសុខាភិបាលខេត្តកំពង់ឆ្នាំង បានអំពាវនាវដល់ប្រជាពលរដ្ឋ នៅក្នុងខេត្តកំពង់ឆ្នាំង មេត្តាប្រុងប្រយ័ត្ន និងស្នើសុំចូលរួមអនុវត្តវិធានការ ៣ កុំ និង ៣ ការពារ ឲ្យបានទាំងអស់គ្នា ដើម្បីជៀសវាងការឆ្លងរីករាលដាលបន្ត៕/V
