​ប្រែ​សម្រួលៈ​បំណង​(ST)៖ អាជ្ញាធរ​កោះ​តៃវ៉ាន់​កាលពី​ថ្ងៃ​ពុធ​ទី​៣​សីហា​បាន​បញ្ចេញ​យន្តហោះ​ប្រដេញ​ទៅ​ស្ទាក់​និង​ព្រមាន​អោយ​យន្តហោះ​យោធា​ចិន​២៧​គ្រឿង​ចេញ​ឆ្ងាយ​ពី​តំបន់​ការពារ​ដែនអាកាស​​របស់ខ្លួន នេះ​បើ​តាម​ការអះអាង​របស់​ក្រសួង​យោធា​របស់​កោះ​តៃវ៉ាន់ ហើយ​ថា​យន្តហោះ​ចិន​២២​គ្រឿង​បាន​ហោះ​ឆ្លងកាត់​ខ្សែបន្ទាត់​កណ្តាល​នៃ​ច្រក​សមុទ្រ​ដែល​ខណ្ឌ​ចែក​កោះ​ស្វ័យគ្រប់គ្រង​នេះ​ពី​ចិន​ដី​​គោក​ចំពេល​ភាព​តានតឹង​កើន​ឡើង​ខ្លាំង​។​

តៃវ៉ាន់អះអាងថា យន្តហោះ​យោធា​ចិន​២២​គ្រឿង​ហោះ​ឆ្លងកាត់​ខ្សែបន្ទាត់​កណ្តាល​នៃ​ច្រក​សមុទ្រ​តៃវ៉ាន់​

​ចិន​បាន​បញ្ចេញ​កំហឹង​របស់​ខ្លួន​ចំពោះ​ដំណើរ​ទស្សនកិច្ច​របស់ប្រធានសភាអាម៉េរិកទៅកាន់កោះតៃវ៉ាន់ដោយ​បាន​កោះហៅ​ឯកអគ្គរដ្ឋទូត​អាម៉េរិក​ប្រចាំ​ក្រុង​ប៉េកាំង​មក​ស្តាប់​ការតវ៉ា​ប្រឆាំង​ព្រមទាំង​បញ្ឈប់​ការនាំ​ចូល​កសិផល​មួយចំនួន​ពី​​កោះ​តៃវ៉ាន់​ថែមទៀត។​

​ក្នុងការ​ប្រឈម​មុខ​នៅ​ច្រក​សមុទ្រ​តៃវ៉ាន់​ចុងក្រោយ​នេះ តៃវ៉ាន់​បាន​និយាយថា​ខ្លួន​បាន​បញ្ជូន​យន្តហោះ​មួយ​ក្រុម​និង​បញ្ជា​អោយ​ក្រុម​ប្រព័ន្ធ​កាំ​ជ្រួច​តាមដាន​សកម្មភាព​យន្តហោះ​របស់​ចិន​ហោះ​​ចូល​ក្នុង​តំបន់​ការពារ​ដែនអាកាស​របស់ខ្លួន​។​

​សូមបញ្ជាក់​ថា តៃវ៉ាន់​ដែល​ចិន​អះអាងថា​ជា​ទឹកដី​របស់​ខ្លួន បាន​ត្អូញត្អែរ​តវ៉ា​នៅ​ប៉ុន្មាន​ឆ្នាំ​ចុងក្រោយ​នេះ​អំពី​បេសកកម្ម​ម្តង​ហើយ​ម្តង​ទៀត​នៃ​កងទ័ពអាកាស​ចិន​នៅ​ក្បែរៗ​ខ្លួន​ដោយ​ច្រើន​តែ​ហោះចូល​​ក្នុង​តំបន់​កំណត់​អត្តសញ្ញាណ​ការពារ​ដែនអាកាស​(ADIZ)​នៅ​ប៉ែក​និរតី​នៃ​កោះ​។​

​បេសកកម្ម​កាលពី​ថ្ងៃ​ពុធ​រួម​មាន​យន្តហោះ​ប្រយុទ្ធ Su-30​ចំនួន​១៦​គ្រឿង និង​យន្តហោះ​ដទៃទៀត​១១​គ្រឿង នេះ​បើ​តាម​ក្រសួង​យោធា​តៃវ៉ាន់​។​

​មុន​នេះ​កាលពី​ថ្ងៃ​ពុធ តៃវ៉ាន់​បាន​និយាយថា តំបន់​សមយុទ្ធ​របស់​យោធា​ចិន​នៅ​សប្តាហ៍​នេះ​ខ្លះ ស្ថិត​ក្នុង​សមុទ្រ​និង​ដែនអាកាស​តៃវ៉ាន់​ប្រមាណ​២០​គីឡូម៉ែត្រ ជា​ចំណាត់ការ​មួយ​ដែល​មន្ត្រី​តៃវ៉ាន់​ម្នាក់​បាន​​ពណ៌នា​ថា​«​ស្មើ​នឹង​ការហ៊ុមព័ទ្ធ បិទ​ខ្ទប់​តៃវ៉ាន់​ទាំងពី​សមុទ្រ​និង​អាកាស​»៕

​ចិន​ចាប់ផ្តើម​សមយុទ្ធ​យោធា​នៅ​ច្រក​សមុទ្រ​តៃវ៉ាន់​ចាប់តាំងពី​ចុង​សប្តាហ៍ និង​បង្កើន​វា​នៅ​ជុំវិញ​កោះ​តៃវ៉ាន់​នៅ​ថ្ងៃ​ព្រហស្បតិ៍​ទី​៤​សីហា​