​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ កាលពី​ថ្ងៃ​ពុធ​ទី​៣​សីហា ចិន​បាន​ដាក់​ទណ្ឌកម្ម​លើ​កោះ​តៃវ៉ាន់​ជា​ការឆ្លើយតប​ទៅនឹង​ដំណើរ​ទស្សនកិច្ច​របស់​ប្រធានសភា​អាម៉េរិក​លោកស្រី ណាន់​ស៊ី ផេ​ឡូ​ស៊ី ទៅ​កាន់​កោះ​នេះ ខណៈ​កងទ័ព​រំដោះប្រជាជន​បាន​បន្ត​ធ្វើ​សមយុទ្ធ​យោធា​នៅ​ច្រក​សមុទ្រ​តៃវ៉ាន់​។​

​ចំ​ពេល​មាន​ភាព​តានតឹង​កើនឡើង​ជុំវិញ​ដំណើរ​ទស្សនៈកិច្ច​របស់​លោកស្រី​ទៅ​កាន់​កោះ​តៃវ៉ាន់ ដែល​ចិន​ចាត់ទុក​ជា​ខេត្ត​ផ្តាច់ខ្លួន​ដែល​ត្រូវ​បង្រួបបង្រួម​ជាមួយ​ចិនដីគោក​វិញ​ទោះ​ជា​ត្រូវ​ប្រើ​កម្លាំង ប្រសិនបើ​ចាំបាច់ លោកស្រី​ផេ​ឡូ​ស៊ី​បាន​និយាយថា សហរដ្ឋ​អាម៉េរិក​នឹង​មិន​បោះបង់​ចោល​កោះ​នេះ​នោះ​ឡើយ​។​

​ប្រធានាធិបតី​តៃវ៉ាន់​លោកស្រី សាយ អ៊ីង​វិន (Tsai Ing-wen) បានបញ្ជាក់​ថា កោះ​នេះ​នឹង​មិន​រាថយ​នោះឡើយ នៅ​ពេល​ប្រឈមមុខ​នឹង​ការគំរាមកំហែង​ផ្នែក​យោធា​កាន់តែ​ខ្លាំង​ឡើង​។​

​ទីក្រុង​ប៉េកាំង​បាន​សម្តែង​ការមិនសប្បាយចិត្ត​របស់​ខ្លួន​ចំពោះ​ដំណើរ​ទស្សនកិច្ច​នេះ ដែល​ខ្លួន​ចាត់ទុកថា​ជាការ​បង្ក​រឿង​ដ៏​ធ្ងន់ធ្ងរ​ដោយ​សម្ញែង​កម្លាំងយោធារ​បស់​ខ្លួន​និង​ថែម​ទាំង​រឹតបន្តឹង​ដង្កៀប​​សេដ្ឋកិច្ច​លើ​កោះ​តៃវ៉ាន់​ផងដែរ​។​

​ប៉េកាំ​ង​បាន​ប្រកាសថា ខ្លួន​នឹង​បញ្ឈប់​ការនាំចេញ​ខ្សាច់​ធម្មជាតិ​ទៅកាន់​កោះ​តៃវ៉ាន់​ដោយ​ចូល​ជា​ធរមាន​ភ្លាមៗ​។ តៃវ៉ាន់​ទទួលបាន​ការផ្គត់ផ្គង់​ខ្សាច់​ធម្មជាតិ ៩០ ភាគរយ​ពី​ចិន​ដែល​ភាគច្រើន​ប្រើ​​ប្រាស់​ក្នុង​ការសាងសង់ ព្រោះ​វា​មាន​តម្លៃថោក​ជាង​ការ​នាំចូល​ពី​កន្លែង​ផ្សេងទៀត​ដូចជា​វៀតណាម​។​

​ចិន​ក៏​បាន​ហាមឃាត់​ការ​នាំចូល​ផ្លែក្រូច​និង​ត្រី​ពីរ​ប្រភេទ​ពី​តៃវ៉ាន់​ផងដែរ​។ រឿង​នេះ​កើតឡើង​បន្ទាប់​ពី​ចិន​ផ្អាក​ការ​នាំចូល​ពី​ក្រុមហ៊ុន​ផលិត​អាហារ​តៃវ៉ាន់​ជាង ១០០ កាលពី​ថ្ងៃ​ចន្ទ​។​

​ទោះ​ជា​មិន​មាន​ទំនាក់ទំនង​ការទូត តែ​តៃវ៉ាន់​មាន​ទំនាក់ទំនង​សេដ្ឋកិច្ច​យ៉ាង​ស៊ីជម្រៅ​ជាមួយ​ចិន​ដីគោក ដែល​ជា​ដៃគូ​ពាណិជ្ជកម្ម​ដ៏​ធំ​បំផុត​របស់​កោះ​នេះ​៕

​លោកស្រី​ផេ​ឡូ​ស៊ី​បក់ដៃ​ទន្ទឹមនឹង​លោកស្រី​សៃ​អ៊ីង​វិ​ន​នៅ​ការិយាល័យ​ប្រធានាធិបតី​ក្នុង​ក្រុង​តៃប៉ិ​កាលពី​ថ្ងៃ​ពុធ​ទី​៣​សីហា ឆ្នាំ​២០២២