​ប្រែ​សម្រួល : កញ្ញា​ដា​លី​ស (​ស៊ីនហួ​) ៖ អគ្គលេខាធិការ​អង្គការសហប្រជាជាតិ​លោក អង់​តូ​នីញ៉ូ គូថេ​រ៉េស បាន​និយាយ​កាលពី​ថ្ងៃ​ពុធ​ទី​៣​សីហា​ថា​លេខាធិការដ្ឋាន​អ​.​ស​.​ប​មិនបាន​យក​លុយ​ពី​ឧស្សាហកម្ម​​ប្រេង​និង​ឧស្ម័ន​នោះ​ទេ​។​

​លោក​បាន​ប្រាប់​អ្នកយកព័ត៌មាន​ថា “​ខ្ញុំ​អាច​ធានាបាន​ថា​លេខាធិការដ្ឋាន​អ​.​ស​.​ប​មិនបាន​យក​លុយ​ពី​ឧស្សាហកម្ម​ប្រេង​និង​ឧស្ម័ន​ទេ​។​ការតម្រង់​ទិស​របស់​យើង​គឺ​ដើម្បី​ឱ្យ​មូលនិធិ​សោធន​និវត្តន៍​​ដក​ចេញ​ទាំង​ស្រុង​ពី​ប្រព័ន្ធ​ឥន្ធនៈហ្វូស៊ីល​ដែល​បាន​ចាប់ផ្តើម​ដោយ​ការដកខ្លួន​ចេញពី​ធ្យូងថ្ម​។​ហើយ​ខ្ញុំ​ជឿ​ថា​មូលនិធិ​ទាំងនោះ​បាន​ឈាន​ដល់​ការដកខ្លួន​ចេញ​ពេញលេញ​ពី​ឧស្សាហកម្ម​ឥន្ធនៈហ្វូស៊ីល​​ជាទូទៅ​”​។​

​លោក​បាន​និយាយថា “​ហើយ​ចំពោះ​បណ្តា​ទីភ្នាក់ងារ (​អ​.​ស​.​ប​) ខ្ញុំ​សូម​ផ្តល់​អនុសាសន៍​យ៉ាង​មុតមាំ​មិន​ឱ្យ​ទទួលយក​ការរួមចំណែក​ណាមួយ​ពី​អ្នក​ទាំងឡាយ​ដែល​យើង​ចាត់ទុក​ថា​បាន​ដើរតួនាទី​សំខាន់បំផុត​​ក្នុង​បម្រែបម្រួល​អាកាសធាតុ​នោះឡើយ​”​។​

​លោក​គូថេ​រ៉េស​កាលពី​ថ្ងៃ​ពុធ​ក៏បានអំពាវនាវ​ឱ្យមាន​ការយកពន្ធ​លើ​ប្រាក់​ចំណេញ​នៃ​ក្រុមហ៊ុន​ប្រេង​និង​ឧស្ម័ន​ពី​វិបត្តិ​ថាមពល​នាពេល​បច្ចុប្បន្ន​។​

​លោក​បាន​និយាយ​នៅក្នុង​ការចាប់ផ្តើម​របា​យ​ការណ៍​ទី​បី​របស់​គាត់​ស្តីពី​ក្រុម​ឆ្លើយតប​វិបត្តិ​សកល​ទាក់ទង​នឹង​អាហារ ថាមពល និង​ហិរញ្ញវត្ថុ​ជុំវិញ​ជម្លោះ​អ៊ុ​យក្រែន យ៉ាង​ដូច្នេះ​ថា​”​វា​ជា​រឿង​អសីលធម៌​​ណាស់​សម្រាប់​ក្រុមហ៊ុន​ប្រេង​និង​ឧស្ម័ន​ក្នុង​ការរក​ប្រាក់​ចំណេញ​ពី​វិបត្តិ​ថាមពល​លើ​ខ្នង​រាស្ត្រ​និង​សហគមន៍​ក្រីក្រ​បំផុត និង​ជះ​ផលប៉ះពាល់​ធំ​សម្បើម​ចំពោះ​អាកាសធាតុ​”​។​

​លោក​បាន​និយាយថា “​ខ្ញុំ​ជំរុញ​ឱ្យ​រដ្ឋាភិបាល​ទាំងអស់​យក​ពន្ធលើប្រាក់ចំណេញ​ហួសហេតុ​ទាំងនេះ ហើយ​ប្រើប្រាស់​មូលនិធិ​នេះ​ដើម្បី​គាំទ្រ​ដល់​ប្រជាជន​ដែល​ងាយ​រងគ្រោះ​បំផុត​ក្នុង​គ្រា​លំបាក​នេះ​”​ដោយ​​កត់សម្គាល់ថា ប្រាក់ចំណេញ​រួមគ្នា​របស់​ក្រុមហ៊ុន​ថាមពល​ធំៗ​នៅក្នុង​ត្រីមាស​ទី​មួយ​នៃ​ឆ្នាំនេះ គឺ​ជិត ១០០ ពាន់​លាន​ដុល្លារ​អាម៉េរិក​៕

​អគ្គលេខាធិការ​អង្គការសហប្រជាជាតិ​លោក អង់​តូ​នីញ៉ូ គូថេ​រ៉េស