​ដោយៈ សុផល / ភ្នំពេញ​៖ នា​ព្រឹក​ថ្ងៃ​ព្រហស្បតិ៍ ទី​៤ ខែសីហា ឆ្នាំ​២០២២ គណៈកម្មាធិការ​អចិន្ត្រៃយ៍​ព្រឹទ្ធសភា បាន​ប្រជុំ​ក្រោម​អធិបតីភាព​ដ៏​ខ្ពង់ខ្ពស់​របស់ សម្តេច​វិបុល​សេនា​ភក្តី សាយ ឈុំ ប្រធានព្រឹទ្ធសភា នៃ​ព្រះរាជាណាចក្រ​កម្ពុជា​។​ បន្ទាប់ពី​បាន​ពិនិត្យ និង​ពិភាក្សា​រួចមក គណៈកម្មាធិការ​អចិន្ត្រៃយ៍​ព្រឹទ្ធសភា បានកំណត់​យក ថ្ងៃ​សុក្រ ទី​៥ ខែសីហា ឆ្នាំ​២០២២ វេលា​ម៉ោង ០៨:០០ នាទី​ព្រឹក ដើម្បី​បើក​សម័យប្រជុំ​លើក​ទី​៩ ព្រឹទ្ធសភា នីតិកាល​ទី​៤​។​

​របៀបវារៈ​ដែល​ត្រូវ​លើក​យកមក​ពិនិត្យ ពិភាក្សា មាន​ដូចខាងក្រោម​៖
១-​ស្តាប់​របាយការណ៍​រប​ស់​គណៈកម្មាធិការ​អចិន្ត្រៃយ៍ ស្តីពី​សកម្មភាព និង​លទ្ធផល​ការងារ របស់​ព្រឹទ្ធសភា​នៅ​ចន្លោះ​សម័យប្រជុំ​ព្រឹទ្ធសភា​លើក​ទី​៨ និង​លើក​ទី​៩ នីតិ​-​កាល​ទី​៤​។​
២-​ពិនិត្យ ហើយ​ឱ្យយោបល់​លើ សេចក្តីព្រាងច្បាប់​ធម្មនុញ្ញ ស្តីពី​វិសោធនកម្ម​មាត្រា​១៩​ថ្មី (​មួយ​) មាត្រា​៨៩ មាត្រា​៩៨​ថ្មី មាត្រា​១០២​ថ្មី មាត្រា​១១៩​ថ្មី (​មួយ​) និង​មាត្រា​១២៥​ថ្មី នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មាត្រា​៣​ថ្មី និង​មាត្រា​៤​ថ្មី នៃ​ច្បាប់​ធម្មនុញ្ញ​បន្ថែម សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ ។​
៣-​ពិនិត្យ ហើយ​ឱ្យយោបល់​លើ​សេចក្តីព្រាងច្បាប់ ស្តីពី​ការគ្រប់គ្រង​ចំណូល​មិនមែន សារពើពន្ធ ។​
៤-​ពិនិត្យ ហើយ​ឱ្យយោបល់​លើ​សេចក្តីព្រាងច្បាប់ ស្តីពី​ការអនុម័ត​យល់ព្រម​លើ​៖
១- កិច្ចព្រមព្រៀង​រវាង​រាជរដ្ឋាភិបាល​នៃ​ព្រះរាជាណាចក្រ​កម្ពុជា និង​រដ្ឋាភិបាល​នៃ​តំបន់ រដ្ឋបាល​ពិសេស​ម៉ា​កាវ នៃ​សាធារណរដ្ឋ​ប្រជាមានិត​ចិន ស្តីពី​ការលុបបំបាត់​ការយក ពន្ធ​ត្រួតគ្នា ពាក់ព័ន្ធ​នឹង​ពន្ធ​លើ​ប្រាក់ចំណូល និង​ការបង្ការ​ការ​គេចវេះ​ពន្ធ​និង​
​ការចៀសវាង​ពន្ធ​។​
២- កិច្ចព្រមព្រៀង រវាង​រាជរដ្ឋាភិបាល នៃ​ព្រះរាជាណាចក្រ​កម្ពុជា និង​រដ្ឋាភិបាល​នៃ សាធារណរដ្ឋ​តួ​ក​គី ស្តីពី​ការចៀសវាង​ការយកពន្ធ​ត្រួតគ្នា និង​ការបង្ការ​ការ​កិបកេង បន្លំ​ពន្ធ ពាក់ព័ន្ធ​នឹង​ពន្ធ​លើ​ប្រាក់ចំណូល ។​
៥- ពិនិត្យ ហើយ​ឱ្យយោបល់ លើ​សេចក្តីព្រាងច្បាប់ ស្តីពី​ការអនុម័ត​យល់ព្រម​ឱ្យ ព្រះរាជាណាចក្រ​កម្ពុជា ចូល​ជា​ភាគី​នៃ​អនុសញ្ញា ស្តីពី​ជំនួយ​ក្នុងករណី​មាន គ្រោះមហន្តរាយ​នុយក្លេអ៊ែរ ឬ​គ្រោះអាសន្ន​វិទ្យុសកម្ម ៕/V​