​ប្រែ​សម្រួលៈ​បំណង​(​ស្ត្រេត​ថែមស៍​)៖ នាយករដ្ឋមន្ត្រី​ជប៉ុន​កាលពី​ថ្ងៃ​សុក្រ​បាន​ថ្កោលទោស​ការបាញ់​កាំជ្រួច​ផ្លោង​របស់​ចិន​ក្នុង​អំឡុងពេល​ធ្វើ​សមយុទ្ធ​យោធា​ជុំវិញ​កោះ​តៃវ៉ាន់​កាលពី​ថ្ងៃ​ព្រហស្បតិ៍ ដោយ​​បាន​ហៅ​វា​ថា​ជា​«​បញ្ហា​ធ្ងន់ធ្ងរ​មួយ​ដែល​ប៉ះពាល់​សន្តិសុខ​ជាតិ​របស់​យើង​និង​សុវត្ថិភាព​របស់​ពលរដ្ឋ​របស់​យើង​»​។​

​ប្រធានសភា​អាម៉េរិក ណាន់​ស៊ី ផេ​ឡូ​ស៊ី ចាប់រ​លាក់​ដៃ​នាយករដ្ឋមន្ត្រី​ជប៉ុន​នៅ​តូ​ក្យូ​កាលពី​ថ្ងៃ​៥ សីហា​

​រដ្ឋាភិបាល​ទីក្រុង​តូ​ក្យូ​បាន​និយាយថា កាំជ្រួច​ចិន​ចំនួន​ប្រាំ​ដើម​ទំនងជា​បាន​ធ្លាក់​ក្នុង​តំបន់សេដ្ឋកិច្ចផ្តាច់មុខ​របស់​ជប៉ុន និង​បួន​ដើម​ក្នុងចំណោម​ប្រាំ​ដើម​នេះ​ត្រូវ​គេ​ជឿ​ង​ថា​បាន​ហោះ​រំលង​កោះ​​តៃវ៉ាន់​។​

​នាយករដ្ឋមន្ត្រី​ជប៉ុន​លោក ហ្វ៊ុយ​មី​អុ គី​ស៊ី​ដា បាន​ប្រាប់​អ្នកយក​ព័ត៌មាន​ក្រោយ​ជួប​ប្រធាន​សភា​អាម៉េរិក ណាន់​ស៊ី ផេ​ឡូ​ស៊ី ថា​« អំពើ​របស់​ចិន​ពេល​នេះ​ប៉ះពាល់​ធ្ងន់ធ្ងរ​លើ​សន្តិភាព​និង​ស្ថិរភាព​នៃ​តំបន់​​របស់​យើង​និង​សហគមន៍​អន្តរជាតិ​។​ខ្ញុំ​បាន​ប្រាប់​លោក​ស្រី​ប្រធាន​សភា​ថា យើង​ស្នើ​សុំ​អោយ​បញ្ឈប់​សមយុទ្ធ​យោធា​នេះ​ជា​បន្ទាន់​»​។​

​លោក​គី​ស៊ី​ដា​បាន​និយាយថា លោក​និង​លោកស្រី ផេ​ឡូ​ស៊ី បាន​ពិភាក្សា​អំពី​បញ្ហា​ភូមិសាស្ត្រ​នយោបាយ រួមមាន​បញ្ហា​ទាក់ទង​នឹង​កូរ៉េខាងជើង ចិន​និង​រុស្ស៊ី​ព្រមទាំង​កិច្ច​ខិតខំ​មួយ​ឆ្ពោះ​រក​ពិភពលោក​មួយ​​គ្មាន​នុយក្លេអ៊ែរ និង​ថា​សម្ពន្ធមិត្ត​ទាំង​ពីរ​នឹង​ធ្វើការ​រួមគ្នា​ដើម្បី​រក្សា​សន្តិភាព​និង​ស្ថិរភាព​នៅ​ច្រក​សមុទ្រ​តៃវ៉ាន់ ។​

​លោកស្រី ផេ​ឡូ​ស៊ី កំពុងស្ថិត​នៅ​ទីក្រុង​តូ​ក្យូ​សំរាប់​ការឈប់​សំចត​ចុងក្រោយ​នៃ​ដំណើរ​ទស្សនកិច្ច​អាស៊ី​ដ៏​ជ្រួលច្របល់​របស់​លោកស្រី ។​ការឈប់​សំចត​នៅ​ក្រុង​តៃប៉ិ​របស់​លោកស្រី​នាំអោយ​ចិន​ប៉េកាំង​ខឹង​​ដាច់​ក្បាល​ដាច់​កន្ទុយ ហើយ​ចាត់វិធានការ​តប​ដូច​ការព្រមាន​ដោយ​ធ្វើ​សមយុទ្ធ​យោធា​ទ្រង់ទ្រាយ​ធំ​មិន​ដែល​ធ្លាប់​មាន​នៅ​ជុំវិញ​កោះ​តៃវ៉ាន់​។​

​ជប៉ុន ដែល​បណ្តា​កូន​កោះ​ចុង​ខាងត្បូង​របស់​ខ្លួន​នៅ​ជិត​តៃវ៉ាន់​ជាង​ក្រុង​តូ​ក្យូ បាន​ព្រមាន​ថា ការបំភិតបំភ័យ​របស់​ចិន​លើកោះ​តៃវ៉ាន់​ជា​ការគំរាម​សន្តិសុខ​ជាតិ​មួយ​ដល់​ខ្លួន​។​គណបក្ស​ប្រជាធិបតេយ្យ​​សេរី​របស់​លោក​គី​ស៊ី​ដា ក៏​បាន​សន្យា​បង្កើន​ចំណាយ​យោធា​ទ្វេដង ដល់​ចំនួន​ពីរ​ភាគរយ​នៃ​ផលិតផល​សរុប​ក្នុងស្រុក​។​

​ភាព​តានតឹង​រវាង​ចិន​និង​ជប៉ុន​ក៏​បាន​កើន​ឡើង​កាលពី​ថ្ងៃ​ព្រហស្បតិ៍​នៅពេល​ចិន​បាន​ប្រកាស​លុបចោល​ជំនួប​មួយ​រវាង​រដ្ឋមន្ត្រី​ការបរទេស​នៃ​ប្រទេស​ទាំង​ពីរ​នៅ​ក្រុងភ្នំពេញ​ដោយសារតែ​រដ្ឋាភិបាល​​ទីក្រុង​ប៉េកាំង​មិន​សប្បាយចិត្ត​ការ​ដែល​ជប៉ុន​ចូលរួម​ជាមួយ​ក្រុម​ប្រទេស​G-7​ដើម្បី​ចេញ​សេចក្តីថ្លែងការណ៍​មួយ​សុំអោយ​រដ្ឋាភិបាល​ទីក្រុង​ប៉េកាំង​ដោះស្រាយ​ភាព​តានតឹង​ជាមួយ​តៃវ៉ាន់​ដោយ​អហិង្សា​៕