ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ៊ុយ​ក្រែន​បាន​និយាយ​កាលពី​ថ្ងៃ​ព្រហស្បតិ៍​ទី​៤​សីហា​ថា​ខ្លួន​ត្រូវបាន​បង្ខំ​ឱ្យ​បោះបង់​ទឹកដី​មួយ​ចំនួន​នៅ​ភាគ​ខាងកើត​ប្រទេស​ក្នុងពេល​ប្រឈមមុខ​នឹង​ការ​វាយ​​លុក​ខ្លាំងក្លា​ពី​រុស្ស៊ី ហើយ​ប្រមុខ​នៃ​សម្ពន្ធមិត្ត​យោធា​ណា​តូ​បាន​និយាយថា ទីក្រុង​មូ​ស្គូ​មិន​ត្រូវ​អនុញ្ញាត​ឱ្យ​ឈ្នះ​សង្គ្រាម​ជា​ដាច់ខាត​។​

​ប្រធានាធិបតី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​លេន​ស្គី នៅ​សប្តាហ៍​នេះ បាន​ពណ៌នា​អំពី​សម្ពាធ​ដែល​កងកម្លាំងប្រដាប់អាវុធ​របស់លោក​កំពុង​ទទួល​រង​នៅ​តំបន់​ដុន​បា​សភាគ​ខាងកើត​អ៊ុយ​ក្រែនថា​ជា “​ឋាន​នរក​”​។ គាត់​បាន​និយាយ​អំពី​ការប្រយុទ្ធ​គ្នា​យ៉ាង​ខ្លាំងក្លា​នៅ​ជុំវិញ​ទីក្រុង​អាវ​ឌី​អ៊ីវ​កា (Avdiivka) និង​ភូមិ​ការពារ​រឹងមាំ​ឈ្មោះ ភី​ស្គី (Pisky) ជា​ទី​ដែល​ទីក្រុង​គៀវ​ទទួលស្គាល់​”​ជោគជ័យ​​មួយផ្នែក​” របស់​សត្រូវ​រុស្ស៊ី​របស់ខ្លួន​ក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ​។​

​យោធា​អ៊ុយ​ក្រែន​បាន​និយាយ​កាលពី​ថ្ងៃ​ព្រហស្បតិ៍​ថា កងកម្លាំង​រុស្ស៊ី​បាន​បាញ់​មី​ស៊ី​ល​យ៉ាងតិច​ពីរ​គ្រាប់​មក​លើ​ភូមិ​ភី​ស្គី ប៉ុន្តែ​កងទ័ព​របស់​ខ្លួន​អាច​បាញ់​ទម្លាក់​ពួក​វា​បាន​។​

​អ៊ុយ​ក្រែន​បាន​ចំណាយ​ពេល​ប្រាំបី​ឆ្នាំ​ចុងក្រោយ​នេះ​ដើម្បី​ពង្រឹង​ទីតាំង​ការពារ​នៅ​ភូមិ​ភី​ស្គី ដោយ​ចាត់ទុក​វា​ជា​តំបន់​ការពារ​ដ៏​សុវត្ថិភាព​ប្រឆាំង​នឹង​កងកម្លាំង​គាំទ្រ​ដោយ​រុស្ស៊ី​ដែល​គ្រប់គ្រង​ទីក្រុង​​ដូណិត​ស​ខ៍ (Donetsk) ស្ថិត​នៅ​ប្រហែល ១០ គីឡូម៉ែត្រ​នៅ​ភាគ​អាគ្នេយ៍​។​

​ឧត្តមសេនីយ៍ អូ​ឡេក​ស៊ី រ៉ូ​ម៉ូវ (Oleksiy Hromov) បាន​ប្រាប់​សន្និសីទ​សារព័ត៌មាន​ថា កងកម្លាំង​អ៊ុយ​ក្រែន​បាន​ដណ្តើម​យក​ភូមិ​ចំនួន​ពីរ​ជុំវិញ​ទីក្រុង​ភាគ​ខាងកើត​ឈ្មោះ​ស្លូវី​យ៉ានស​ខ៍​(Sloviansk) ប៉ុន្តែ​ត្រូវបាន​រុញច្រាន​ត្រឡប់​ទៅ​ជាយក្រុង​អាវ​ឌី​អ៊ីវ​កា (Avdiivka) បន្ទាប់ពី​ត្រូវ​បាន​បង្ខំ​ឱ្យ​បោះបង់​ចោល​អណ្តូងរ៉ែ​ធ្យូង​ថ្ម ដែល​ចាត់ទុកថា​ជាទី​តាំង​ការពារ​ដ៏​សំខាន់​៕

​អ៊ុយ​ក្រែន​ត្រូវបាន​បង្ខំ​ឱ្យ​បោះបង់​ទឹកដី​មួយ​ចំនួន​នៅ​ភាគ​ខាងកើត​ប្រទេស​ក្នុងពេល​ប្រឈមមុខ​នឹង​ការវាយលុក​ខ្លាំងក្លា​ពី​រុស្ស៊ី