​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋាភិបាល​សហព័ន្ធ​បាន​ប្រកាស​អាសន្ន​ផ្នែក​សុខភាព​សាធារណៈ​កាលពី​ថ្ងៃ​ព្រហស្បតិ៍​ទី​៤​សីហា​ដើម្បី​ជំរុញ​ការឆ្លើយតប​ទៅ​នឹង​ការផ្ទុះ​ជំងឺ​អុត​ស្វា​ដែល​បាន​ឆ្លង​ដល់​​ជនជាតិ​អាម៉េរិក​ជាង ៦.៦០០ នាក់​។​

​សេចក្តីប្រកាស​នេះ​នឹង​ជួយ​បញ្ចេញ​លុយ​និង​ធនធាន​ផ្សេងទៀត​ដើម្បី​ប្រយុទ្ធប្រឆាំង​នឹង​មេរោគ ដែល​អាច​បណ្តាល​ឱ្យ​ក្តៅខ្លួន ឈឺ​រាងកាយ ញាក់ញ័រ អស់កម្លាំង​និង​កន្ទួល​ដូច​កើតមុន​នៅ​លើ​ផ្នែក​ជា​​ច្រើន​នៃ​រាងកាយ​។​

​លោក សា​វី​យ៉េ បេ​សេរ៉ា (Xavier Becerra) រដ្ឋ​មន្ត្រី​សុខាភិបាល​និង​សេវា​មនុស្សជាតិ បាន​និយាយថា​”​យើង​ត្រៀម​ខ្លួន​ដើម្បី​នាំយក​ការឆ្លើយតប​របស់​យើង​ទៅ​ដល់​កម្រិត​បន្ទាប់​ក្នុងកា​រដោះ​​ស្រាយ​មេរោគ​នេះ ហើយ​យើង​ជំរុញ​ឱ្យ​ជនជាតិ​អាម៉េរិក​គ្រប់រូប​យកចិត្តទុកដាក់​ឱ្យ​មែនទែន​អំពី​ជំងឺ​អុត​ស្វា​”​។​

​ការប្រកាស​ដោយ​ក្រសួង​កើតឡើង​ខណៈ​រដ្ឋបាលបៃដិ​ន​ប្រឈម​មុខ​នឹង​ការរិះគន់​ជុំវិញ​លទ្ធភាព​អាច​រកបាន​នូវ​វ៉ាក់សាំង​ជំងឺ​អុត​ស្វា​។ គ្លីនិក​ក្នុង​ទីក្រុង​ធំៗ​ដូចជា ញូវយ៉ក​និង​សាន់​ហ្វ្រា​ន់​ស៊ី​ស្កូ និយាយថា ពួកគេ​មិន​បាន​ទទួល​វ៉ាក់សាំង​ដូសទី​ពីរ​គ្រប់គ្រាន់​ដើម្បី​បំពេញ​តម្រូវការ​នោះទេ ហើយ​គ្លីនិក​ខ្លះ​ត្រូវ​ឈប់​ផ្តល់​វ៉ាក់សាំង​ទី​ពីរ​ដើម្បី​ធានា​ការផ្គត់ផ្គង់​វ៉ាក់សាំង​ដូសទី​មួយ​។​

​សេត​វិមាន​បាន​និយាយថា ខ្លួន​បាន​បង្កើត​វ៉ាក់សាំង​ជាង ១,១ លាន​ដូស ហើយ​បាន​ជួយ​បង្កើន​សមត្ថភាព​ធ្វើ​រោគ​វិច្ឆ័យ​ក្នុងស្រុក​រហូតដល់ ៨០.០០០ តេស្តិ៍​ក្នុងមួយ​សប្តាហ៍​។​

​ជំងឺ​អុត​ស្វា​ឆ្លង​តាមរយៈ​ការប៉ះពាល់​ស្បែក​រយៈពេល​យូរ រួម​មាន​ការ​ឱប ការ​អង្អែល និង​ការ​ថើប ព្រមទាំង​ការប្រើ​ពូក កន្សែង និង​សម្លៀក​បំពាក់​រួមគ្នា​ផងដែរ​។ អ្នក​ដែល​ឈឺ​រហូត​មក​ទល់​ពេល​នេះ ភាគច្រើន​ជា​បុរស​ដែល​រួមភេទ​ជាមួយ​បុរស​។ ប៉ុន្តែ​មន្ត្រី​សុខាភិបាល​បញ្ជាក់ថា មេរោគ​នេះ​អាច​ឆ្លង​ទៅ​មនុស្ស​គ្រប់គ្នា​៕

​ស្ត្រី​ម្នាក់​មក​ទទួល​វ៉ាក់សាំង​ការពារ​ជំងឺ​អុត​ស្វា​នៅ​ទីក្រុង​បា​សេ​ឡូ​ណា​ប្រទេស​អេ​ស្ប៉ាញ​កាលពី​ថ្ងៃទី​២៦ កក្កដា ឆ្នាំ​២០២២