ដោយៈ ឫទ្ធិ​ស័ក្តិ​-​ទេព ក​ង្រី / ភ្នំពេញៈ សមត្ថកិច្ច​ចម្រុះ​នៃ​ស្រុក​បរិបូណ៌ បាន​សហការគ្នា ជាមួយ​ម្លាំ​ង​អធិការដ្ឋាន​ខាងត្បូង​បឹង​ទន្លេសាប គណៈបញ្ជាការ​ឯកភាព​ស្រុក​បរិបូរណ៍ ខណ្ឌ​រដ្ឋបាល​ជលផល​កំពង់ឆ្នាំង មន្ត្រី​បរិស្ថាន សង្កាត់រដ្ឋបាល​ជលផល​ឆ្នុកទ្រូ បាន​ចុះបង្ក្រាប​បទល្មើស ក្រុម​ឈ្មួញ​ដឹក​លៀស យកមក​ទុក​បម្រុង​ដឹក​ចេញ ទៅកាន់​ទីផ្សារ ប្រទេស​វៀតណាម ។ ការបង្ក្រាប​នេះ បានធ្វើ​ឡើង​កាលពី​ថ្ងៃទី​៤ ខែសីហា ឆ្នាំ​២០២២​។ បន្ទាប់ពី​មានការ​បង្ក្រាប គឺមាន​មន្ត្រី​ខ្លះ​អន្តរាគមន៍​។​

​គំនរ​លៀស​ដែល​ក្រុម​ឈ្មួញ​ច្រក​កា​រ៉ុង​បម្រុង​ដឹក​ចេញ តាម​រថយន្ត​ធុន​ធំ ទៅកាន់​ទីផ្សារ ប្រទេស​វៀតណាម​នោះ ត្រូ វ​បាន​កម្លាំងចម្រុះ រកឃើញ​នៅ​ចំណុច​ជើង​កំពង់​សេះ​ស្លាប់ ដែល​ស្ថិត​ក្នុងភូមិ​សេះ​ស្លាប់ ឃុំ​ឆ្នុកទ្រូ ស្រុក​បរិបូ​ណ៍ ខេត្តកំពង់ឆ្នាំង ។​

​នាយ​ខណ្ឌ​រដ្ឋបាល​ជល​ផល នៃ​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តកំពង់ឆ្នាំង លោក លី ឡា បាន​ប្រាប់​រស្មី​កម្ពុជា នៅ​ព្រឹក​ថ្ងៃទី​៥ ខែសីហា​ថាៈ នៅក្នុង​កិច្ចប្រតិបត្តិការ​ខាងលើនេះ សមត្ថកិច្ច បង្ក្រាប​បី​ទីតាំង​ផ្សេងគ្នា នៅ​កំពង់​ឆ្នុកទ្រូ និង​ដកហូត​លៀស ចំនួន ១៤០ កា​រ៉ុង នៅ​កំពង់​ស្តាប់ បាន​ចំនួន ៨០​កា​រ៉ុង និង​នៅ​ចំណុច​មាត់ទឹក ភូមិ​កំពង់​អួ ឃុំ​ខុន​រ៉ង ស្រុក​បរិ​បណ៍ ចំនួន ៥០ កា​រ៉ុង ត្រូវបាន​កម្លាំង​សមត្ថកិច្ច​ចម្រុះ នាំយកទៅ​ចាក់​លែង ក្នុង​បឹង​ធម្មជាតិ​វិញ​ទាំងអស់​។ ក្នុងនោះ សមត្ថកិច្ច​ដកហូត​គោយន្ត​កន្ត្រៃ ៣​គ្រឿង នាំយកមក​រក្សាទុក នៅ​ស្នាក់ការ​ជលផល​ឆ្នុកទ្រូ ដើម្បី​ចាត់ការ តាម​នីតិវិធី​។​

​មន្ត្រី បាន​ឲ្យ​ដឹងថាៈ ក្រុម​ឈ្មួញ​រកស៊ី​ដឹក​លៀស ទាំង​រដូវប្រាំង និង​រដូវវស្សា នៅក្នុង​ឆ្នុកទ្រូ មានដូចជា ឈ្មោះ ចែ​អ៊ី​ម នៅ​ភូមិ​ជើង​ខ្នារ​ឃុំ​ពន្លៃ , ឈ្មោះ​កូន​ចែ​យាង នៅ​ភូមិ​ពោ​ម្រះ ឃុំ ចក , ឈ្មោះ ចែ​ធី កូន​យាយ​អ៊ី នៅ​ជើង​ខ្នារ ឃុំ​ពន្លៃ , ឈ្មោះ ចែ​ញា​ញ់ នៅ​ភូមិ​ពោ​ម្រះ ឃុំ ចក , ឈ្មោះ ចែ​ហ៊ីង នៅ​ភូមិ​ឆ្នុកទ្រូ ឃុំ​ឆ្នុកទ្រូ , ឈ្មោះ ហុង នៅ​ភូមិ​ឆ្នុកទ្រូ ឈ្មោះ ឡេ​ខា នៅ​ខេត្តកំពង់ចាម ស្នាក់នៅ​ភូមិ​ឆ្នុកទ្រូ ឈ​ចាំ​ទិញ , ឈ្មោះ ចែ​លាប នៅ​ភូមិ​ឆ្នុកទ្រូ​។​

​មន្ត្រី បានឱ្យដឹង​ទៀតថាៈ បទល្មើស​លៀស​ខាងលើនេះ បាន​ដឹក​ចេញពី​ខេត្តកំពង់ធំ និង​ខ្លះទៀត ដឹក​ចេញពី​ខេត្តកំពង់ឆ្នាំង មក​ដាក់​នៅ​ចំណុច​ខាងលើ​។ សមត្ថកិច្ច​កំពុងតែ ស្រាវជ្រាវ​រក​អ្នក​ដែល​ពាក់ព័ន្ធ ដើម្បី​ចាត់ការ​តាម​នីតិវិធី​។

​សមត្ថកិច្ច បាន​បង្ហើប​ឲ្យ​ដឹងថាៈ ករណី​ក្រុម​ឈ្មួញ​ដឹក​លៀស យកមក​ទុក​បម្រុង​ដឹក​ចេញ ទៅកាន់​ទីផ្សារ នៅ​ប្រទេស​វៀតណាម គឺមាន​ការឃុបឃិត​គ្នា ជាមួយ​សមត្ថកិច្ច​ពាក់​ព័ន្ធ មួយចំនួន នៅ​ខេត្តកំពង់ធំ និង​ខេត្តកំពង់ឆ្នាំង ហើយ​កន្លងមក មិនមាន​សមត្ថកិច្ច​ណា ហ៊ាន​បង្ក្រាប​នោះទេ ដោយសារ​តែមាន​អ្នក​អន្តរាគមន៍​។ តែដោយសារ​មាន​បទបញ្ជា ពី​ប្រមុខ​រាជរដ្ឋាភិបាល ឲ្យ​បង្ក្រាប​ក្រុម​បំផ្លិចបំផ្លាញ ធនធានធម្មជាតិ ទើប​ក្រុមមន្ត្រី​ដែល ពាក់ព័ន្ធ​ក្នុង​ជំនួញ​នាំ​លៀស​ចេញទៅ​វៀតណាម បាន​ដកខ្លួន​ចេញ​៕/V​