​ប្រែ​សម្រួលៈ​បំណង​(​បាងកក​ប៉ុស្តិ៍​)៖ មនុស្ស​យ៉ាង​ហោច​ណាស់​១៣​នាក់​បាន​ស្លាប់ និង​ប្រមាណ​៤០​នាក់​ទៀត​រងរបួស​ក្នុង​អគ្គិភ័យ​នៅ​ក្លឹប​រាត្រី​មាន​មនុស្ស​ពេញ​ក្នុងស្រុក​មួយ​នៃ​ខេត្ត ឈុន ប៊ូ​រី​កាលពី​យប់​​ថ្ងៃ​ព្រហស្បតិ៍​ឈានចូល​ថ្ងៃ​សុក្រ​។​

​អគ្គិភ័យ​នេះ​បាន​ចាប់ផ្តើម​នៅ​ម៉ោង​ប្រមាណ​មួយ​រំលង​អធ្រាត នៅពេល​ភ្ញៀវ​ចូល​ពេញ​ណែន​នៅ​ក្លឹប​Mountain B​។​រូបភាព​វីដេអូ​បង្ហាញ​មនុស្សម្នារ​ត់រក​សុវត្ថិភាព​និង​ស្រែក​នៅពេល​អណ្តាតភ្លើង​និង​​ផ្សែងហុយ​ចេញពី​រោង​អាគារ​។​អ្នកខ្លះ​រត់​ទាំង​អណ្តាតភ្លើង​ឆេះ​ពេញ​ដងខ្លួន​។​

​បើ​តាម​របាយការណ៍​ប៉ូលិស បុរស​ប្រាំបួន​នាក់​និង​ស្ត្រី​បួន​នាក់​បាន​ស្លាប់​ក្នុង​អគ្គិភ័យ ដោយ​សព​ឆេះ​រោល​បួន​នាក់​ត្រូវបាន​រកឃើញ​នៅ​ផ្នែក​ខាង​មុខ​នៃ​អាគារ​កំពស់​មួយ​ជាន់​នេះ​និង​បី​នាក់​នៅ​បន្ទប់​​សម្រាក ម្នាក់​នៅក្នុង​បន្ទប់​DJ និង​ប្រាំ​នាក់​នៅក្នុង​បន្ទប់​គិតលុយ​។​

​មេ​ប៉ូលិស​ស្រុក​កើតហេតុ បាន​និយាយថា ជនរងគ្រោះ​ទាំងអស់​ទំនងជា​ជនជាតិ​ថៃ​។​

​សាក្សី​បាន​និយាយថា គេ​ឮ​សម្លេង​ផ្ទុះ​ចំនួន​ពីរ​នៅក្បែរ​បន្ទប់​DJ​និង​ឃើញ​ផ្កាភ្លើង​ហើយ​ភ្លើង​បាន​ឆាបឆេះ​យ៉ាង​លឿន​។​

​មេបញ្ជាការ​ប៉ូលីស​ខេត្ត​ឈុន ប៊ូ​រី បាន​និយាយថា មនុស្ស​ប្រហែល​៤០​នាក់​បាន​រងរបួស​ក្នុង​អគ្គិភ័យ ក្នុងនេះ​ប្រាំបី​នាក់​របួសធ្ងន់ ដោយ​រលាកភ្លើង​ពេញ​ខ្លួន​។​

​ក្រុម​អ្នក​ពន្លត់​អគ្គិភ័យ​បាន​ពន្លត់ភ្លើង​បាន​ទាំង​ស្រុក​ក្រោយ​ប្រើពេល​អស់​បី​ម៉ោង​។​

​សូម​រំលឹក​ថា អគ្គិភ័យ​ធំ​មួយ​ក្នុង​ពិធី​អបអរ​ការ​ចូល​ឆ្នាំ​ថ្មី​នៅ​ក្លឹប​មួយ​ក្នុង​ក្រុង​បាងកក​កាលពី​ឆ្នាំ​២០០៩ បាន​សម្លាប់​មនុស្ស​៦៧​នាក់ និង​របួស​ជាង​២០០​នាក់​៕

​អ្នក​ពន្លត់ភ្លើង​ព្យាយាម​ទប់ទល់​និង​ពន្លត់ភ្លើង​នៅ​ក្លឹប​Mountain B​ក្នុង​ខេត្ត​ឈុន ប៊ូ​រី កាលពីដើម​ថ្ងៃ​សុក្រ