ដោយ​: គង់​ហេង / កំពង់ចាម​: លោក អ៊ុន ចាន់​ដា ប្រធាន​គណៈកម្មាធិការ​សាខា​កាកបាទក្រហមកម្ពុជា បាន​អំពាវនាវ​ឱ្យ​ប្រជាពលរដ្ឋ​ទាំងអស់ ត្រូវ​យកចិត្តទុកដាក់​ថែរក្សា​អនាម័យ បង្ការ​ជំងឺគ្រុនឈាម បន្ត​រៀន​រស់​ជាមួយ​ជំងឺ​កូ​វីដ ១៩ និង​ស្វែងយល់​អំពី​រោគសញ្ញា និង​ការការពារ​ជំងឺ​«​អ៊ុន​ស្វា​»​។​

​ការអំពាវនាវ​របស់​ប្រធាន​គណៈកម្មាធិការ​សាខា​កាកបាទក្រហមកម្ពុជា ខេត្តកំពង់ចាម និង​ជា​អភិបាលខេត្ត​នេះ ធ្វើឡើង​នៅក្នុង​ឱកាស​ដែល​លោក និង​សហការី​ជាច្រើន​អង្គ និង​នាក់​បាន​និមន្ត​អញ្ជើញ​ចូលរួម​ប្រគល់​ផ្ទះ​បន្ទាប់​ទី​១១ នៃ​កម្មវិធី​ផ្ទះ​មនុស្សធម៌​ខេត្ត ក្រោម​កិច្ចសហការ​រវាង​សាខា​កាកបាទក្រហមកម្ពុជា​ខេត្ត និង​សាលា​គណ​ខេត្ត ជូន​គ្រួសារ​ចាស់ជរា​ទី​ទ័​លំបាក មួយ​គ្រួសារ របស់លោក ខៀវ ខេ​ត វ័យ ៧២ ឆ្នាំ រស់នៅ​ភូមិ​ទួល​ប្រាក់ ឃុំ​តា​អុង ស្រុក​ចម្ការលើ​។​

​លោក អ៊ុន ចាន់​ដា បាន​បន្ថែមថាៈ ប្រជាពលរដ្ឋ​គ្រប់​លំនៅឋាន​ចាំបាច់​ត្រូវ​ថែរក្សា​អនាម័យ​សម្អាត​លំនៅឋាន ដុត​កម្ទេចចោល​វត្ថុ​ដក់​ទឹក​នានា បំផ្លាញ​ជ​ម្រ​មូស​ខ្លា និង​សម្រាន្ត​ក្នុង​មុង ដើម្បី​គេចផុត​ពី​ជំងឺគ្រុនឈាម និង​ស្វែងយល់​អំពី​រោគសញ្ញា​ជំងឺ​«​អុត​ស្វា​» និង​វិធី​ការពារ​ជំងឺឆ្លង​មួយ​នេះ ដែល​ពិភពលោក​កំពុង​ចាប់អារម្មណ៍​។​

​លោក​បាន​បន្តថាៈ ជាពិសេស​បុគ្គល​ម្នាក់ៗ ក៏ដូចជា​ក្រុមគ្រួសារ​នីមួយៗ ត្រូវ​បន្ត​រៀន​រស់​ជាមួយ​ជំងឺ​កូ​វីដ ១៩ ដោយ​ចាំបាច់​ត្រូវអនុវត្ត​ឱ្យបាន​ខ្ជាប់ខ្ជួន​នូវ​វិធានការ​សុខាភិបាល « បី​ការពារ បី​កុំ​» និង​ជំរុញ​ការចាក់​វ៉ាក់សាំង ទាំ​អ​ដូ​ស​មូលដ្ឋាន និង​ដូ​ស​ជំរុញ​ឱ្យបាន​គ្រប់គ្នា​។​

​សូមបញ្ជាក់ថា ក្រៅពី​ប្រគល់​ផ្ទះ​មនុស្សធម៌​ទី​១១ ដល់​គ្រួសារ​លោក ខៀវ ខេ​ត និង​ភរិយា រិ​ទ្ធ ហុន ស្នាក់នៅ​ជា​កម្មសិទ្ធិ​តរៀង​ទៅ សាខា​កាកបាទក្រហម​ក៏បានផ្តល់​សម្ភារ គ្រឿង ឧបភោគ បរិភោគ សម្រាប់​សង្កត់​ផ្ទះ​ថ្មី និង​ថវិកា​ចំនួន ២០​ម៉ឺន​រៀល ហើយ​ចំពោះ​លោកតា លោកយាយ ដែល​បាន​ចូលរួម​ជា​សាក្សី​ក្នុង​ពិធី​ប្រគល់​-​ទទួល​ផ្ទះ​ថ្មី​ចំនួន ១២ នាក់​ម្នាក់ៗ​ទទួលបាន អង្ករ ត្រីខ ឃី​ត មី ទឹកត្រី ទឹក​ស៊ី​អ៊ា​វ អាវយឺត ម៉ាស និង​ថវិកា​ចំនួន ២០.០០០ រៀល​៕​