ដោយៈ​សុផល​/ភ្នំពេញ​៖​លោកស្រី​ព្រឹ​ទ្ឋ​សមាជិក Penny Wong រដ្ឋមន្ត្រីការបរទេស​អូស្ត្រាលី បាន​ថ្លែងថា​៖«​កាលពី ៣០​ឆ្នាំមុន នាយករដ្ឋមន្ត្រី​អូស្ត្រាលី Paul Keating​និង​អតីតរដ្ឋមន្ត្រី​ការបរទេស Gareth Evans បានទទួល​ស្គាល់​ពី​តម្លៃ​នៃ​កិច្ច​សហការគ្នា​រវាង​ប្រទេស​រួម​តំបន់​។​សាលា ACE ​ជា​ផ្នែក​មួយ​ដ៏​សំខាន់​ក្នុង​ការផ្តល់​ការអប់រំ​បែប​អូស្ត្រាលី​ទៅកាន់​ប្រជាពលរដ្ឋ​កម្ពុជា ហើយ​ជា​សមិទ្ធិផល សិស្សានុសិស្ស​របស់ ACE បាន​ប្រើប្រាស់​ជំនាញ​ភាសា​អង់គ្លេស​របស់ខ្លួន​ដើម្បី​បន្ត​ការសិក្សា​នៅ​ប្រទេស​អូស្ត្រាលី​ហើយ​ត្រលប់មក​បំពេញការងា​រ​ដែល​ពួកគេ​ពេញចិត្ត បង្កើត​អាជីវកម្ម​នានា និង​ធ្វើជា​ស្ពាន​ដើម្បី​ភ្ជាប់​សហគមន៍​ក្នុងប្រទេស​ទៅកាន់​សហគមន៍​ដទៃទៀត​លើ​ពិភពលោ»​។​

​លោកស្រី​បាន​មានប្រសាសន៍​ដូច្នេះ​ក្នុងពេល​លោកស្រី​បាន​អញ្ជើញចូលរួម​នៅក្នុង​ពិធី​សម្ពោធ​មជ្ឍមណ្ឌល​សម្រាប់​ការបណ្តុះបណ្តាល (ACE) សាខា​ចាក់អង្រែ ដែលជា​សាខា​ទី ៦ កាលពី​ថ្ងៃទី​៤​ខែសីហា​ឆ្នាំ​២០២២​។​

​ឆ្លៀតពេល​ពី​កិច្ចប្រជុំ​អាស៊ាន​នៅ​កម្ពុជា​នោះ លោកស្រី បាន​បន្តថា​៖​សាលា ACE​ថ្មី​ដែល​ស្ថិត​តាម​ដៃទន្លេ​បាសាក់​នៃ​ទន្លេមេគង្គ​នេះ​នឹង​ផ្តល់ឱកាស​ឲ្យ​យុវជន និង​យុវនារី​ជាច្រើន​នាក់​ទៀត រួមទាំង​ភ្ញៀវកិត្តិយស​ដែល​បាន​ចូលរួម​ក្នុងថ្ងៃនេះ នូវ​ជំនាញ​ភាសា​អង់គ្លេស ដើម្បី​ទទួលបាន​ឱកាស​ផ្សេងៗ​ក្នុងនាម​ជា​ពលរដ្ឋ​អន្តរជាតិ​។ ទាំងនេះ ស​បញ្ជាក់​អំពី​តម្លៃ​នៃ​កិច្ច​សហការគ្នា​រវាង​ប្រទេស​រួម​តំបន់ និង​អនាគត​រួមគ្នា​»​។​

​លោក​បណ្ឌិតសភា​ចា​រ្យ ហង់​ជួន ណា​រ៉ុ​ន រដ្ឋមន្ត្រីក្រសួងអបរំ យុវជន និងកីឡា បាន​ថ្លែងថា ឆ្នាំនេះ​កម្ពុជា និង​អូស្ត្រាលី ប្រារព្ធ​ខួប​ទី ៧០ នៃ​ទំនាក់ទំនង​ការទូត ខណៈ​ដែល​​ប្រទេស​ទាំងពីរ​មាន​ចំណង​មិ​ត្ដ​ភាព និង​កិច្ចសហប្រតិបត្តិការ​រឹងមាំ​ប្រកបដោយ​ផ្លែផ្កា​លើ​គ្រប់​វិស័យ​។

​លោក​រដ្ឋមន្ត្រី​មានប្រសាសន៍​បន្ថែមថា​៖ «​ចាប់តាំងពី​ឆ្នាំ ១៩៩២ មក​សាលា ACE​បាន​ដើរតួនាទី​យ៉ាងសំខាន់​ក្នុងការ​អភិវឌ្ឍន៍​ជំនាញ​ភាសា​អង់គ្លេស​សម្រាប់​សិស្សានុសិស្ស​កម្ពុជា មន្ត្រី​រដ្ឋាភិបាល និង​សិស្ស​និស្សិត​ទូទៅ​គ្រប់​កំរិត​»​។​

​នាយក​ប្រចាំ​ប្រទេស​នៃ​ស្ថាប័ន IDP Education នៅ​កម្ពុជា និង ជា​នាយក​សាលា ACE លោក ម៉ៅ ស្រេង បាន​ថ្លែង​ក្នុង​ពិធី​សម្ពោធ​នេះ​ថា​៖ «​អគារ​សាលា​នេះ​ពីមុន​ជា​រោងចក្រ​កាត់ដេរ​ដ៏​ធំ​មួយ ហើយ​យើង​បាន​កែប្រែ​និង​បំពាក់​បរិក្ខារ​ឱ្យ​ក្លាយជា​អាគារ​សាលារៀន​កំរិត​ពិភពលោក​ក្នុង​ឆ្នាំ​២០២០​។ ដើម្បី​ចូលរួម​ទប់ស្កាត់​ការរីក​រាលដាល​នូវ​ជំងឺ​កូ​វីដ ១៩ សាលា​ក៏ត្រូវ​បាន​បិទ ហើយ​ផ្លាស់ប្តូរ​ទៅ​ការរៀន​ពី​ចម្ងាយ​តាមរយៈ​ប្រព័ន្ធ​ឌីជីថល​។ ដើម្បី​ចូលរួម​ជាមួយ​រាជរដ្ឋាភិបាល​ក្នុងការ​ព​ន្លឿ​ន​ការចាក់​វ៉ាក់សាំង​ការ​ពារ​ជំងឺ​កូ​វីដ​១៩ សាខា​ថ្មី​នេះ ក៏បាន​ដាក់​ឲ្យ​ប្រើប្រាស់​ជា​មណ្ឌល​សម្រាប់​ផ្តល់​ការចាក់​វ៉ាក់សាំង ដោយ​ក្នុងនោះ​ប្រជាពលរដ្ឋ​ប្រមាណ ១០.០០០ នាក់​នៅក្នុង​សហគមន៍​បានមក​ទទួល​វ៉ាក់សាំង​នៅទីនេះ​។

​ក្នុង​មួយឆ្នាំ សាលា ACE មាន​សិស្ស​ចុះឈ្មោះ​ចូលរៀន​ប្រមាណ​ជា ៨ ម៉ឺន​នាក់​ទូទាំងប្រទេស ហើយ​អាគារ​ថ្មី​នេះ​នឹង​អនុញ្ញាត​ឲ្យ​សាលា​ទទួល​សិស្ស​រៀន​បាន​កាន់តែច្រើន​បន្ថែមទៀត​។ ទន្ទឹមនឹង​វិសាលភាព ACE ទទួលបាន​ពានរង្វាន់​ដែលជា​សាលា​ភាសា​ល្អ​ជាងគេ​លើ​ពិភពលោក​នៅ​ទីក្រុង​ឡុង​ដ៍​ប្រទេស​អង់គ្លេស​កាលពី​ឆ្នាំ​២០២១ ហើយ​ក៏​ជា​សាលាដំបូង​គេ​បង្អស់​ក្រៅ​តំបន់​អឺរ៉ុប​ដែល​ទទួលបាន​ពានរង្វាន់​នេះ ក្រោម​ការជ្រើសរើស​ដោយ​គណកម្មការ​ចំនួន ៤៣ រូប មកពី​សាកលវិទ្យាល័យ ស្ថាប័ន​អប់រំ និង អ្នកជំនាញ​មកពី ២៥ ប្រទេស​ទូទាំង​ពិភពលោក​។​

​សាលា ACE ត្រូវបាន​បង្កើតឡើង​នៅ​កម្ពុជា​ក្នុង​ឆ្នាំ ១៩៩២ ដោយ​ស្ថាប័ន IDP Education ដែលជា​ស្ថាប័ន​មាន​ភាព​ឈានមុខ​គេ​លើ​ពិភពលោក​លើ​វិស័យ​អប់រំ​អន្តរជាតិ និង​ការសិក្សា​នៅ​បរទេស ហើយ​បច្ចុប្បន្ន ACE មាន ៦ សាខា​នៅ​ទូទាំងប្រទេស​។ លើសពីនេះ​ស្ថាប័ន IDP ក៏បានផ្តល់​ការធ្វើ​តេស្ត​ភាសា​អង់គ្លេស IELTS និង​ការប្រឹក្សា​ពី​ការសិក្សា​នៅ​បរទេស​ទៅកាន់​ប្រទេស​រួមមាន អូស្ត្រាលី ណូ​វែ​ល​ហ្សេ​ឡង់ កាណាដា សហរដ្ឋអាមេរិក ចក្រភព​អង់គ្លេស និង​អៀរ​ឡង់​។​

​លោក ម៉ៅ ស្រេង ក៏បាន​មានប្រសាសន៍​បន្ថែមថា​៖ «​ក្នុង​រយៈពេល ៣០ ឆ្នាំ​កន្លងមកនេះ មាន សិស្សានុសិស្ស​ជាង​កន្លះ​លាន នាក់ មកពី​បណ្តា​ប្រទេស​ជាង ២០ បាន​ចូលរៀន​នៅ​សាលា ACE និង​មាន​សិស្សានុសិស្ស​កម្ពុជា​ប្រមាណ ១ ម៉ឺន​នាក់​បានមក​ទទួល​ការប្រឹក្សា​មុន​ទៅ​បន្ត​ការសិក្សា​នៅ​បរទេស​។​

លោក ម៉ៅ ស្រេង បាន​គូសបញ្ជាក់​ផងដែរ​ពី​សមិទ្ធផល​របស់​សាលា ACE ជាង ៣០ ឆ្នាំ និង ខួប​លើក​ទី ៧០ នៃ​ទំនាក់ទំនង​ការទូត​រវាង​ប្រទេស​អូស្ត្រាលី និង កម្ពុជា​ថា​៖ «​ក្នុង​រយៈពេល ២២ ឆ្នាំ​របស់ខ្ញុំ​នៅ​ស្ថាប័ន IDP និង សាលា ACE កិច្ចខិតខំ​ប្រឹងប្រែងរ​បស់​បុគ្គលិក​យើង​បាន​ដើរតួនាទី​ក្នុងការ​បង្កើត​ឲ្យ​មាន​អ្នកដឹកនាំ​ជំនាន់​ក្រោយ ព្រម​ទាំង​បន្ត​ពង្រឹង​និង​ធ្វើ​ឲ្យ​សហគមន៍​ខ្មែរ និង អូស្ត្រាលី រីកចម្រើន​ទៅមុខ​ជា​លំដាប់ ស្រប​ពេលដែល​ពួកយើង​ប្រារព្ធ​ខួប​ទី ៧០ នៃ​ទំនាក់ទំនង​ការទូត​រវាង​ប្រទេស​ទាំងពីរ​នៅក្នុង​ឆ្នាំនេះ ហើយ​ឆ្នាំនេះ​ក៏​ជា​ខួប​អបអរសាទរ​ទី ៣០ របស់​ស្ថាប័ន​ក្នុងការ​ផ្តល់ជូន​ការអប់រំ​ដែលមាន​ស្តង់ដារ​អន្តរជាតិ និង​ការរួមចំណែក​ដ៏​សំខាន់​លើ​វិស័យ​អប់រំ​»​។​

​ព្រឹត្តិការណ៍​នេះ​គឺជា​ព្រឹត្តិការណ៍​ប្រវត្តិសាស្ត្រ​មួយ​ដែល​បង្ហាញ​ពី​ទំនាក់ទំនង​ដ៏​រឹងមាំ​រវាង​ប្រទេស​អូស្ត្រាលី និង​កម្ពុជា​ក្នុង​រយៈពេល​ជាង ៧ ទសវត្សរ៍ និង​ការអបអរសាទរ​ខួប​ទី ៣០​របស់​ស្ថាប័ន IDP Education នៅ​កម្ពុជា​ក្រោម​ពិធី​សម្ពោធ​ជា​ផ្លូវការ សាលា ACE សាខា​ចាក់អង្រែ​៕Ph​