​ដោយ​: ភ្នំ​ខៀវ /​បាត់ដំបង​: មន្ត្រី​ជំនាញ​ឆ្មក់​ចំ​ត្រួតពិនិត្យ​រថយន្ត​ដឹកទំនិញ​មួយគ្រឿង​ចូល​ទីផ្សារ​ក្រុង​បាត់ដំបង ដកហូត​វត្ថុតាង​ជាច្រើន​សង្ស័យ​ខុសច្បាប់​។​

​ការចុះពិនិត្យ​នេះ​ធ្វើឡើង​នៅ​ព្រឹក​ថ្ងៃទី​០៥ ខែសីហា ឆ្នាំ​២០២២ នៅត្រង់ចំណុច​សង្កាត់​ចំការ​សំរោង ក្រុង​បាត់ដំបង ខេត្តបាត់ដំបង ដោយ​មន្ត្រី និង​កម្លាំង​គណៈបញ្ជាកា​រ​កងឯកភាព​ក្រុង រួមជាមួយ​មន្ត្រី​គយ និង​រដ្ឋាករ​តំបន់ (​ចល័ត​)​។​

​ទំនិញ​ដែល​សង្ស័យ​គេច​មិន​បង់ពន្ធ​ជូន​រដ្ឋ​នេះ​រួមមាន​: ប៊ីចេង ម៉ាក ANKEE ចំនួន ៦០​កា​រ៉ុង​, ស្ករដូង​ចំនួន ៣០​កេះ​, បារី តិច​សាស​ចំនួន ១៦០​កេះ​, បារី​អូ​រី​ស​ចំនួន ៥០​កេះ​, ដែក​ញ៉ូ​ម​ចំនួន ១០៤​ដុំ​, ប៊ីយែរ បាត់​វ៉ៃ​ស័​រ​ចំនួន ១០០​កេះ និង​កាហ្វេ​គ្រាប់​ចំនួន ៣០​បាវ​។​

​ភ្លាមៗ​កម្លាំងចម្រុះ​មិនបាន​ឃាត់ខ្លួន​អ្នកពាក់ព័ន្ធ​ទេ ប៉ុន្តែ​បានស្នើ​ដល់​ម្ចាស់​ទំនិញ​សហការ​ជាមួយ​ដោយ​នាំយក​ទំនិញ​ទាំងអស់​ខាងលើ​ទៅកាន់​ទីស្នាក់ការ​មន្ត្រី​គយ និង​រដ្ឋាករ​តំបន់ (​ចល័ត​) ដើម្បី​ផ្ទៀងផ្ទាត់​បញ្ជាក់ថា​ទំនិញ​ដែល​ដឹកជញ្ជូន​នាំចូល​នេះ​បាន​បង់​ព​ន្ឋ​ប៉ុន្មាន​ភាគរយ ឬក៏​មិនបាន​បង់ពន្ធ​ទាំងស្រុង​។​

​ករណី​ដដែល​នេះ លោក សុខ លូ អភិបាលខេត្ត​បាត់ដំបង ក្នុង​បណ្តាញ​សង្គម​បាន​ក្រើនរម្លឹក​ទៅដល់​បណ្តា​អ្នករកស៊ី​ទាំងអស់​សូម​ឲ្យ​ចូលរួម​បង់ពន្ធ​ឲ្យ​បាន​ត្រឹមត្រូវ​កុំ​គេចវេះ​។ ជាងនេះទៀត​បាន​សង្កត់​ធ្ងន់​ដល់​មន្ត្រី​គយ​ផងដែរ​ថា សូមកុំ​រឹង​ត្រគាក​ស្តូក​ពេក​៕