ដោយ​៖ សុវណ្ណ​កុម្ភៈ​/​ភ្នំពេញ​៖ បន្ទាប់ពី​ចាញ់​ម៉ាឡេស៊ី ០​ទល់​៣ ក្នុងការ​ប្រកួត​ដំបូង​នោះ​ថ្ងៃទី​៥ ខែសីហា​នេះ​ក្រុមយុវជន​អាយុ​ក្រោម​១៦​ឆ្នាំ​របស់​កម្ពុជា​បាន​យកឈ្នះ​ក្រុមយុវជន​អូស្ដ្រាលី​៤​ទល់​២ ។ ការប្រកួត​ដែល​ធ្វើ​នៅ​កីឡដ្ឋាន Sultan Agung Bantul នៅវេលា​ម៉ោង​៣​រសៀល​នោះ​ក្រុម​
​កម្ពុជា​បាន​មានប្រៀប​លើ​គូប្រកួត​របស់ខ្លួន​តាំងពី​ដើមទី​មកម្ល៉េះ​។

​សូម​បញ្ចា​ក់ថា នេះ​ជាការ​ប្រកួត​ក្នុង​ព្រឹត្តិការណ៍ AFF U16 Boys Championship 2022 ដែល​ធ្វើ​នៅ​ប្រទេស​ឥណ្ឌូនេស៊ី​។​​​​ ក្នុងជំនួប នៃ​ពូ​ល C នេះ ក្រុម​កម្ពុជា ​ធ្វើបាន​យ៉ាង​ល្អ ដោយ នាំមុខ​ក្រុមយុវជន U16 អូស្ដ្រាលី ២​ទល់​១ នៅ​វគ្គ​ទី​១​។

​នៅ​តង់​ទី​២ កម្ពុជា​រកបាន​គ្រាប់​បាល់​បន្ថែម ២​គ្រាប់​ទៀត នៅ​វគ្គ​ទី​២ ខណៈ​អូស្ដ្រាលី រកបាន ១​គ្រាប់​បន្ថែម​តែប៉ុណ្ណោះ​។ បន្ទាប់ពី​អាជ្ញាកណ្ដាល​ផ្លុំ​កញ្ចែ​បញ្ចប់​ការប្រកួត​ពេញ​ម៉ោង ក្រុម​កម្ពុជា ឈ្នះ​អូស្ដ្រាលី ៤​ទល់​២​។ ជ័យជម្នះ​នេះ បានធ្វើ​ឲ្យ​ក្រុម U16 កម្ពុជា នៅមាន​ឱកាស​ប្រជែង​កៅអី​វគ្គ​បន្ដ បន្ទាប់ពី​ឆ្លងកាត់ ២​ប្រកួត ដោយ​ឈ្នះ ១ និង​ចាញ់ ១ ពោលគឺ​ប្រកួត​ដំបូង កម្ពុជា ចាញ់​ម៉ាឡេស៊ី ០ ទល់​៣​ខណៈ​នៅសល់ ១​ប្រកួត​ក្នុង​ដៃ ដែល​ក្រុមយុវជន​កម្ពុជា នឹងត្រូវ​ជួប​ក្រុម U16 មី​យ៉ាន់​ម៉ា នា​ថ្ងៃទី​០៨ ខែសីហា​ខាងមុខ​៕​