​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ចិន​បាន​និយាយថា ខ្លួន​នឹង​លុបចោល​ឬ​ផ្អាក​ការសន្ទនា​ជាមួយ​សហរដ្ឋ​អាម៉េរិក​លើ​បញ្ហា​ជាច្រើន​រាប់​ចាប់ពី​បម្រែបម្រួល​អាកាសធាតុ​រហូតដល់​ទំនាក់ទំនង​​យោធា​និង​កិច្ចខិតខំ​ប្រឹងប្រែង​ប្រឆាំង​គ្រឿងញៀន ក្នុងការ​សងសឹក​ចំពោះ​ដំណើរ​ទស្សនកិច្ច​នៅ​កោះ​តៃវ៉ាន់​ក្នុង​សប្តាហ៍​នេះ​ដោយ​ប្រធាន​សភា​តំណាងរាស្ត្រ​អាម៉េរិក​លោកស្រី ណាន់​ស៊ី ផេ​ឡូ​ស៊ី​។​

​វិធានការ ដែល​ធ្វើឡើង​ចំ​ពេល​ទំនាក់ទំនង​ធ្លាក់ចុះ​រវាង​រដ្ឋាភិបាល​ទីក្រុង​ប៉េកាំង​និង​ទីក្រុង​វ៉ាស៊ីនតោន គឺជា​វិធានការ​ចុងក្រោយ​បំផុត​ក្នុង​ជំហាន​ដែល​បាន​សន្យា​ជាច្រើន​ដែល​មាន​បំណង​ដាក់ពិន័យ​​សហរដ្ឋ​អាម៉េរិក​ចំពោះ​ការអនុញ្ញាត​ឱ្យ​មាន​ដំណើ​រ​ទស្សនកិច្ច​ទៅកាន់​កោះ​ដែល​ខ្លួន​អះអាងថា​ជា​ទឹកដី​របស់​ខ្លួន ដែល​នឹង​ដណ្តើម​យក​មក​វិញ​ដោយ​កម្លាំង​ប្រសិនបើ​ចាំបាច់​។​

​សេត​វិមាន​បាន​កោះហៅ​ឯកអគ្គរដ្ឋទូត​ចិន​មក​តវ៉ា​ប្រឆាំង​នឹង​អ្វី​ដែល​ខ្លួន​ហៅ​ថា​សកម្មភាព​គ្មាន​ទំនួល​ខុស​ត្រូវ​របស់​ចិន​ចាប់តាំងពី​ដំណើរ​ទស្សនកិច្ច​នេះ​។​

​ចិន​កាលពី​ថ្ងៃ​ព្រហស្បតិ៍​បាន​ចាប់ផ្តើម​សមយុទ្ធ​យោធា​គំរាមកំហែង​ក្នុង​តំបន់​ចំនួន​ប្រាំមួយ​នៅក្បែរ​ឆ្នេរសមុទ្រ​តៃវ៉ាន់ ដែល​ខ្លួន​និយាយ​ថា​នឹង​ដំណើរការ​រហូត​ដល់​ថ្ងៃអាទិត្យ​។​

​មន្ត្រី​ការពារ​ជាតិ​បាន​ប្រាប់​ប្រព័ន្ធ​ផ្សព្វផ្សាយ​រដ្ឋ​ថា មី​ស៊ី​ល​ក៏​ត្រូវបាន​បាញ់​រំលង​លើ​កោះ​តៃវ៉ាន់​ផងដែរ​។​

​ចិន​ជំទាស់​នឹង​កោះ​ដែល​គ្រប់គ្រង​ដោយ​ខ្លួនឯង​នេះ​មាន​ទំនាក់ទំនង​ផ្ទាល់ខ្លួន​ជាមួយ​រដ្ឋាភិបាល​បរទេស​ប៉ុន្តែ​ការឆ្លើយតប​របស់​ចិន​ចំពោះ​ដំណើរ​ទស្សនកិច្ច​របស់​លោកស្រី​ផេ​ឡូ​ស៊ី​មាន​ភាព​ខ្លាំងក្លា​​ខុស​ពី​ធម្មតា​។​

​ក្រសួងការបរទេស​ចិន​បាន​និយាយថា ការសន្ទនា​រវាង​មេបញ្ជាការ​តំបន់​អាម៉េរិក​និង​ចិន​ព្រមទាំង​ប្រមុខ​ក្រសួងការពារជាតិ​ប្រទេស​ទាំង​ពីរ​នឹង​ត្រូវ​លុបចោល​រួមជាមួយ​នឹង​ការពិភាក្សា​អំពី​​សុវត្ថិភាព​ដែនសមុទ្រ​យោធា​ផង​ដែរ​។​

​ក្រសួង​បាន​និយាយថា កិច្ចសហប្រតិបត្តិការ​លើ​ការបញ្ជូន​ត្រឡប់​ជនអន្តោប្រវេសន៍​ខុស​ច្បាប់ ការស៊ើបអង្កេត​ឧក្រិដ្ឋកម្ម​ឆ្លងដែន គ្រឿងញៀន​ខុសច្បាប់ និង​បម្រែបម្រួល​អាកាសធាតុ​នឹងត្រូវ​ផ្អាក​។​

​ចិន​បាន​និយាយ​កាលពី​ថ្ងៃ​សុក្រ​ថា យន្តហោះ​ចម្បាំង​ជាង ១០០ គ្រឿង និង​នាវាចម្បាំង ១០ គ្រឿង​បាន​ចូលរួម​ក្នុង​សមយុទ្ធ​យោធា​បាញ់​គ្រាប់​ពិត​ជុំវិញ​កោះ​តៃវ៉ាន់​ក្នុង​រយៈពេល​ពីរ​ថ្ងៃ​កន្លងមកនេះ ខណៈ​ប្រកាស​ដាក់​ទណ្ឌកម្ម​ជា​និមិត្តរូប​ប្រឆាំងនឹង​លោក​ស្រី​ផេ​ឡូ​ស៊ី​និង​ក្រុមគ្រួសារ​របស់​លោកស្រី​ជុំវិញ​ដំណើរ​ទស្សនកិច្ច​របស់​លោកស្រី​ទៅ​កាន់​កោះ​តៃវ៉ាន់​កាលពីដើម​សប្តាហ៍​នេះ​៕

​ចិន​ដាក់ទណ្ឌកម្ម​ជា​និមិត្តរូប​ប្រឆាំងនឹង​លោកស្រី​ផេ​ឡូ​ស៊ី​និង​ក្រុមគ្រួសារ​របស់​លោកស្រី​ជុំវិញ​ដំណើរ​ទស្សនកិច្ច​របស់​លោកស្រី​ទៅ​កាន់​កោះ​តៃវ៉ាន់