ដោយៈ ប​.​ជ័យ / បន្ទាយ​មាន​ជ័​យៈ ស្ត្រី​ក្នុង​គ្រួសារ​ក្រីក្រ​មួយ ដែល​ប្រសូត្រ​កូនភ្លោះ​ស្រី បីនាក់ បាន​ចេញពី​មន្ទីរពេទ្យ​គន្ធរ​បុប្ផា សៀមរាប ទៅដល់​ផ្ទះ​វិញ​ហើយ នៅ​ភូមិ​៤ សង្កាត់​ព្រះ​ពន្លា ក្រុង​សិរីសោភ័ណ ខេត្តបន្ទាយមានជ័យ​។ ទារិកា​ទាំងបី​នាក់ នៅក្រោយពេល ប្រសូត្រ​នោះ មាន​សុខ​ភាពល្អ​មាំមួន​ធម្មតា​ទេ ។

​លោក ចាន់ សុភាព សព្វថ្ងៃ ជា​បុគ្គលិក​សុ​ី​ឈ្នួល​របស់​ក្រុមហ៊ុន​ឯកជន​មួយ និង​អ្នកស្រី ឆៃ ស្រីរ័ត្ន ជា​មេផ្ទះ ជា​ឪពុកម្តាយ​ទារិកា​ភ្លោះ បីនាក់​នោះ ។ ពួកគេ​មានកូន បួន​នាក់ ក្នុងនោះ កូន​សម្រាល​លើក​ទី​១ ប្រុស សព្វថ្ងៃ មាន​អាយុ ២​ឆ្នាំ ២​ខែ រីឯ​កូនភ្លោះ​ស្រី ទាំងបី​នាក់ ជា​កូន​សម្រាល លើក​ទី​២ ។​

​កូនស្រី​ភ្លោះ​ទាំងបី​នាក់​នោះ មា​នៈទី​១ ឈ្មោះ ឡាង សុ​ដា​លី (LANG SODALI) ទម្ងន់ ១,៦ គីឡូក្រាម ទី​២ ឈ្មោះ ឡាង សុ​ដាលីន (LANG SODALIN ) ទម្ងន់ ១,៥ គីឡូក្រាម ទី​៣ ឈ្មោះ ឡាង សុ​ដា​លី​ស (LANG SOLIS) ទម្ងន់ ១,៦ គីឡូក្រាម ។​

​គ្រួសារ​នេះ បច្ចុប្បន្ន រស់នៅ​តាមផ្លូវ​ជាតិ​លេខ​៥ ជិត​រង្វង់​មូល​ស្រី​គ្រប់​ល័ក្ខណ៍ ស្ថិត​ក្នុងភូមិ​៤ សង្កាត់​ព្រះ​ពន្លា ក្រុង​សិរីសោភ័ណ ខេត្តបន្ទាយមានជ័យ ជា​បន្ទប់​របស់​ក្រុមហ៊ុន ដាក់​ឲ្យ​ស្នាក់នៅ​។​

​ឪពុកម្តាយ​របស់​ទារិកា​ភ្លោះ​ទាំងបី​នោះ បាន​ប្រាប់​អ្នក​សារ​ព័​ត័​មាន កាលពី​ថ្ងៃទី​៥ ខែសីហា​ថាៈ ទារិកា​ភ្លោះ​ទាំងបី​របស់គាត់ បាន​ប្រសូត្រ នៅ​ថ្ងៃទី​១៣ រោច ខែអាសាឍ ឆ្នាំខាល ចត្វា​ស័ក ព​.​ស ២៥៦៦ ត្រូវ​នឹង​ថ្ងៃ​អង្គារ ទី​២៦ ខែកក្កដា ឆ្នាំ​២០២៣ វេលា​ម៉ោង ១៥:៣០ នាទី រសៀល គឺ​សម្រាល​ដោយ​គ្រូពេទ្យ ធ្វើការ​វះកាត់ នៅក្នុង​មន្ទីរពេទ្យ​គន្ធបុប្ផា (​មន្ទីរពេទ្យ​ព្រះបាទ​ជ័យ​វរ្ម័នទី​៧) ខេត្តសៀមរាប ។ ក្រុមគ្រូពេទ្យ បាន​ខ្នះខ្នែង យកចិត្តទុកដាក់​ណាស់ ដល់​ការ​សម្ភព ថែទាំ ព្យាបាល​សុខភាព​ម្តាយ និង​ទារក ។​

​ឪពុកម្តាយ​របស់​ទារិកា​ភ្លោះ​ទាំងបី​នោះ បាន​បន្តថាៈ កាល​ចាប់កំណើត និង​ស្ថិតនៅក្នុង​គ័ភ៌ រហូត​សម្រាល ម្តាយ​វា​ពុំមាន​យល់សប្តិ ឬ​អព្ភូតហេតុ ឬ​ប្រផ្នូល​អ្វី​ទេ តែ​គ្រាន់​តែមាន​ផ្ទៃ​ពោះធំ ធ្ងន់ ពិបាក​ទ្រទ្រង់ ជាង​កាលពី​ពរ​ពោះ កូន​ទី​១ ។ ពួកគេ បាន​បន្តថាៈ លាក់បាំង​អី សព្វថ្ងៃ គ្រួសារ​ពួកគេ ស្នាក់​នៅក្រោម​ដំបូល​បន្ទប់​របស់​ក្រុមហ៊ុន​ឯកជន​មួយ ដែល​ថៅកែ មានចិត្ត​សន្ដោស អាណិត​ស្រឡាញ់​ប៉ុណ្ណោះ ។​

​ប៉ុន្តែ គួរឱ្យ​សោកស្តាយ​ដែរ ក្នុងអំឡុង​វិបត្តិ​សាកល នៃ​ការរីក​រាលដាល​ជំងឺ​កូ​វីដ ១៩ ជាង ២ ឆ្នាំ​មកនេះ ក្រុមហ៊ុន ក៏​រង​ផលប៉ះពាល់ លើ​អាជីវកម្ម​រកស៊ី​របស់​ខ្លួន​ដែរ ។​
​ហេតុនេះ ឪពុក​របស់​ទារិកា ក៏​ថយចុះ​ប្រាក់ចំណូល​ដែរ ។ លុះដល់​ឥឡូវ មានកូន​ភ្លោះ ដល់​ទៅ បីនាក់ ដូច្នេះ​ទៀត បន្ទុក​របស់​បុរស​ម្នាក់​នេះ សម្រាប់​គ្រួសារ​មួយ​នេះ នឹងរង​ការលំបាក​ទ្វេដង​។ ម្យ៉ាង ក្រុមគ្រួសារ​ពួកគេ ធ្លាប់​បានកើត​ជំងឺ​កូ​វីដ ១៩ ផងដែរ​៕/V​