ដោយៈសុផល/ភ្នំពេញ៖ វិនិយោគិនជប៉ុនមួយក្រុម បានបង្ហាញគោលបំណងចង់ជួយវិស័យអប់រំនៅកម្ពុជា ជាពិសេសសាលារៀននៅជនបទដាច់ស្រយាល និងអត្តខាត់ ព្រមទាំងសិស្សានុសិស្សដែលជួបការលំបាក និងខ្វះខាត។
លោក យូម៉ា ម៉ូរ៉ានូស៊ី(Yuma Muranusi) នាយកមូលនិធិអំណោយជប៉ុន (Nippon Donation Foundation )ដែលមានមូលដ្ឋាននៅទីក្រុងក្យូតុ នាព្រឹកថ្ងៃទី៣១ខែសីហា បានអញ្ជើញមកជួបពិភាក្សាការងារជាមួយលោក ពិត ចំណាន រដ្ឋលេខាធិការក្រសួងអប់រំ យុវជន និងកីឡា នៅទីស្តីការក្រសួងអប់រំ ។
លោក ពិត ចំណាន រដ្ឋលេខាធិការក្រសួងអប់រំ យុវជននីកីឡា បានមានប្រសាសន៍ឱ្យដឹងថា៖ការពិភាក្សាថ្ងៃនេះផ្ដោតលើគោលបំណងជួយដល់វិស័យអប់រំនៅកម្ពុជារបស់មូលនិធិអំណោយជប៉ុនជាពិសេសជួយដល់សិស្សនិងសាលារៀនដែលជួបការលំបាក។កន្លងមកក្រុមហ៊ុនជប៉ុននេះធ្លាប់ជួយមួយចំនួននៅកម្ពុជាហើយ តែនៅ ពេលនេះគាត់ចង់បន្តជួយថែមទៀត។គាត់មានបំណងយកមូលនិធិមកជួយសាលាដែលមានការលំបាកនិងជួយដល់កុមារសិស្សសាលានៅតាមជនបទដែលមានការខ្វះខាត។
លោករដ្ឋលេខាធិកាបានបន្ថែមថា៖គោលបំណងរបស់លោក យូម៉ា ម៉ូរ៉ានូស៊ី គាត់ចង់ឱ្យក្មេងៗមានអនាគតរុងរឿងដើម្បីមានឱកាសជួយកសាងប្រទេសដែលធ្លាប់ជួបការលំបាកដែលកម្ពុជាធ្លាប់ឆ្លងកាត់របបខ្មែរក្រហមខណៈដែលជប៉ុនធ្លាប់ឆ្លងកាត់សង្គ្រាមលោកលើកទី២។ក្រុមហ៊ុនចង់ជួយកសាងអគារសិក្សា បង្គន់អនាម័យ និងទឹកស្អាតក្នុងគោលបំណងឲ្យសិស្សានុសិស្សមានសាលារៀន ទទួលបានចំណេះដឹង និងសុខភាពរឹងមាំ។
លោក យូម៉ា ម៉ូរ៉ានូស៊ី នាយកមូលនិធិអំណោយជប៉ុន បានមានប្រសាសន៍ឱ្យដឹងថា៖លោកមានគោលបំណងចង់ជួយដល់ផ្នែកអប់រំនៅកម្ពុជា ដូចជាសាលាបឋមសិក្សានៅតំបន់ដាច់ស្រយាលដែលមានការខ្វះខាត ជួយប្រព័ន្ធទឹកស្អាត បង្គន់អនាម័យ និងសាងសង់អគារសិក្សាជាដើម។
លោកបានបន្តថា៖បានជាលោកសម្រេចចិត្តមកជួយវិស័យអប់រំនៅកម្ពុជាដោយសារលោកសង្កេតឃើញថាសាលារៀននៅតាមជនបទនិងកុមារនៅកម្ពុជាមានមានការខ្វះខាត និងជួយការលំបាកច្រើន។
កន្លងមក មូលនិធិអំណោយជប៉ុនបានជួយជីកអណ្ដូងនិងបង្គន់អនាម័យបានជាង២០កន្លែងហើយ។នៅពេលខាងមុខនេះ គ្រោងនឹងជួយសាងសង់អគារសិក្សា ប្រព័ន្ធទឹកស្អាត បង្គន់អនាម័យ និងធ្វើសកម្មភាពមនុស្សធម៌ជាច្រើនទៀត ក្នុងវិស័យអប់រំ៕Ph
