ដោយ៖ដេប៉ូ/តាកែវ៖ លោក ហេង សួរ រដ្ឋលេខាធិការក្រសួងការងារ និងបណ្តុះ បណ្តាលវិជ្ជាជីវៈរួមជាមួយថ្នាក់ដឹកនាំសមា ជិក សមាជិការបស់សមាគមមិត្តយើងកាលពីថ្ងៃទី១ ខែកញ្ញាបានអញ្ជើញទស្សនកិច្ចស្វែងយល់ពីច្រវាក់ផលិតកម្មផលិតផលកែច្នៃចេញពីទឹកដោះគោ នៃកសិដ្ឋានគិរីសួគ៌ស្ថិតក្នុងឃុំកណ្តឹង ស្រុកបាទីខេត្តតាកែវ។

ឧកញ៉ា គួច សុខលី ប្រតិភូសមាគមមិត្តយើងទទួលបន្ទុកសាធារណរដ្ឋកូរ៉េ និងជាម្ចាស់ភាគហ៊ុន កសិដ្ឋានគីរីសួគ៌បានបញ្ជាក់ឲ្យដឹងថា បច្ចុប្បន្ន កសិដ្ឋានគិរីសួគ៌ គឺជាកសិដ្ឋានទឹកដោះគោទំនើបដំបូងគេនៅកម្ពុជា ដែលមានប្រតិបត្តិការពេញលេញលើផ្ទៃដី ៣០០ហិកតា ក្នុងនោះមានផ្ទៃដីដាំស្មៅសម្រាប់សត្វគោជាង ១ ០០០ក្បាល និងរោងចក្រផលិតផល និងកែច្នៃទឹកដោះគោដោយប្រើប្រាស់បច្ចេកវិទ្យាដ៏ទំនើប។

កសិដ្ឋាននេះមានបុគ្គលិកចំនួន ១១០នាក់ (បរទេស ៤នាក់)កំពុងបម្រើការងារ និងទទួលយកចំណេះដឹងបច្ចេកទេស និងវិជ្ជាជីវៈថ្មីៗពីជំនាញការបរទេស (អ៊ីស្រាអែល) ដើម្បីចូលរួមផលិតកម្មក្នុងស្រុកឱ្យកាន់តែរីកចម្រើនបន្ថែមទៀត។

លោកក៏បានអរគុណយ៉ាងជ្រាលជ្រៅចំពោះ លោក រដ្ឋលេខាធិការ ដែលបានចំណាយ ពេលវេលាមកទស្សនកិច្ចនៅកសិដ្ឋាននេះ ដែលនេះបានសបញ្ជាក់អំពីការយកចិត្តទុកដាក់ខ្ពស់ចំពោះសហគ្រាសធុនតូច និងមធ្យម។

លោក រដ្ឋលេខាធិការ បានកោតសរសើរ និងវាយតម្លៃខ្ពស់ ចំពោះការវិនិយោគរបស់កសិដ្ឋាន ដែលបានជួយបង្កើតការងារជូនប្រជាជនក្នុងស្រុក ក៏ដូចជា នាំមកនូវបច្ចេកវិទ្យាទំនើបក្នុងការកែច្នៃផលិតផលនានាចេញពីទឹកដោះគោ ដើម្បីផ្គត់ផ្គង់ទីផ្សារក្នុងស្រុក។

បន្ទាប់ពីបានធ្វើទស្សនកិច្ចទីតាំងមួយចំនួនក្នុងកសិដ្ឋានដែលមានដូចជា ទីតាំងបច្ចេកទេសយកទឹកដោះគោ, ទីតាំងកែច្នៃទឹកដោះគោឱ្យមានគុណភាព និងប្រភេទចំណី រួចមក លោក រដ្ឋលេខាធិការក៏បានជួបសំណេះសំណាល និងនាំយកអំណោយមួយចំនួនចែកជូនបុគ្គលិក ដែលកំពុងបំពេញការងារក្នុងកសិដ្ឋានគិរីសួគ៍ផងដែរ។

លោក ក៏បាន ស្នើឱ្យម្ចាស់កសិដ្ឋានរក្សាវិធានអនាម័យ ដើម្បីធានាបាននូវគុណភាពផលិត ផលនានារបស់កសិដ្ឋាន ជាពិសេសស្នើឱ្យបងប្អូនបុគ្គលិកទាំងអស់ត្រូវខិតខំធ្វើការ ស្វែងយល់អំពីបច្ចេកទេស និងជំនាញក្នុងការផលិត ដើម្បីខ្មែរយើងអាចធ្វើដោយខ្លួនឯងបាន។

លោករដ្ឋលេខាធិការ បានជំរុញដល់សមាគមមិត្តយើង ក៏ដូចជាកសិដ្ឋានគិរីសួគ៌បន្តបង្កើតឱកាសការងារ អាជីវកម្ម មិត្តភាព សាមគ្គីភាព និងបន្តកសាងបណ្ដាញគាំទ្ររវាងអ្នកប្រកបការងារ ឬមុខរបររកចំណូលផ្ទាល់ខ្លួន អ្នកជំនាញបច្ចេកទេស អ្នកបម្រើផ្នែកសេវាកម្ម និងអ្នកប្រកបអាជីវកម្មផ្សេងៗទាំងនៅក្នុង និងក្រៅប្រទេស ជាពិសេសការងារសង្គម ក៏ដូចជាការងារសប្បុរសធម៌នានា ដើម្បីបន្តរួមចំណែកអភិវឌ្ឍន៍ប្រទេសជាតិយើង ឱ្យកាន់តែរីកចម្រើន និងលើកកម្ពស់កម្រិតជីវភាពរស់នៅរបស់ពលរដ្ឋបន្ថែមទៀត៕សរន