ដោយ៖ សុវណ្ណកុម្ភៈ / ភ្នំពេញ៖ ក្រោយពីបញ្ចប់បេសកកម្មរយៈពេល ៥ថ្ងៃ នៅខេត្តភូកេត ប្រទេសថៃ ក្រុមគណៈប្រតិភូកីឡាហែលទឹករួមមាន ប្រតិភូ គ្រូបង្វឹក និងកីឡាករ-កីឡាការិនីចំនួន ៨នាក់ ចូលរូមការប្រកួតកីឡាហែលទឹកជើងទា Finswimming’s World Cup Round Swimming Pool 2022 បានវិល ត្រឡប់មកដល់មាតុភូមិវិញហើយ ថែមទាំងយកមេដាយមាស ចំនួន ៣គ្រឿង និងសំរិទ្ធ ១គ្រឿង មកជាមួយផង។
លោក ហែម គីរី
អគ្គលេខាធិការ និងប្រធានប្រតិភូ នៃសហព័ន្ធខ្មែរកីឡាហែលទឹក លោក ហែម គីរី បានមានប្រសាសន៍ថាៈ ក្រោយពីទទួលលទ្ធផល SEA GAMES នេះជាជំហានទី២ ដែលពេលនេះ យើងដឹងថា ជាឈានជំហានដ៏អស្ចារ្យ និងជាកម្លាំងចិត្តយ៉ាងខ្លាំង សម្រាប់កីឡាករ-កីឡាការិនី ជាពិសេសគ្រូបង្វឹករបស់សហព័ន្ធខ្មែរទាំងមូល ក្នុងការស្វែងលទ្ធផលថ្មី។
នេះជាជំហានទី២ របស់សហព័ន្ធ ជាពិសេសប្រភេទកីឡាហែលទឹកជើងទា “Fin
swimming” ចេញទៅប្រកួត ដោយការអនុញ្ញាតពី CAMSOC សហព័ន្ធ និងក្រសួងអប់រំ យុវជន និងកីឡា ដូច្នេះយើងមានឱកាសចូលរួមការប្រកួតដ៏កម្រិតធំមួយនេះហើយជាលើកដំបូងហើយ។
លោកអគ្គលេខាធិការ បានបន្តថាៈ យើងមិននឹកស្មានសោះថា យើងដណ្តើមបានមេដាយមាស ៣ គ្រឿង និងមេដាយសំរិទ្ធ ១គ្រឿង តាមពិតយើងចូលរួមការប្រកួតមួយនេះ ដើម្បីវាស់ស្ទង់ និងធ្វើតេស្តិ៍សមត្ថភាពបច្ចេកទេសកីឡាករ កីឡាការិនី វិញ្ញាសាហែលទឹកជើងទា ក្រោយពីការប្រកួតកីឡា SEA GAMES 2021 លើកទី៣១ នៅប្រទេសវៀតណាម។
អ្វីដែលជាក់ស្តែង កីឡាការិនី កាំង មុយនីន ធ្វើបានយ៉ាងល្អ យើងទាំងអស់ ពិតជាមានការរំភើប សម្រាប់សមត្ថភាពកីឡាការិនី ជាមួយជើងខ្លាំងមកពីប្រទេសជាច្រើនទៀត។
លោកបានបន្ថែមថាៈ នេះជាជំហានដ៏ធំសហព័ន្ធ គិតថា វាជាកត្តាវិជ្ជមានមួយរបស់សហព័ន្ធក្នុងការស្វែងមេដាយ សម្រាប់ព្រឹត្តិការណ៍ការប្រកួតកីឡា SEA GAMES 2023 លើកទី៣២ ឆ្នាំ២០២៣ ដែលកម្ពុជាទទួលរៀបចំជាម្ចាស់ផ្ទះ ដោយសារសមត្ថភាពកីឡាករ-កីឡាការិនីហែលទឹកជើងទា ប្រហាក់ប្រហែលនឹងប្រទេសជាច្រើនទៀត។
ព្រឹត្តិការណ៍ខាងលើនេះ សហព័ន្ធខ្មែរកីឡាហែលទឹក បានបញ្ជូនប្រតិភូ គ្រូបង្វឹក និងកីឡាករ-កីឡាការិនី ចំនួន ៨នាក់ រួមមានលោក ហែម គីរី ប្រតិភូ លោក ហែម ថុនពន្លឺ គ្រូបង្វឹក កីឡាការិនី កាំង មុយនីន កីឡាការិនី ឃឺន ប៊ុនពេជ្រមរតក កីឡាករ លឹម កែវឧត្តម កីឡាករ ឆោម ច័ន្ទថន កីឡាករ ទួន ទិត្យសត្យា និង កីឡាករ លឹម សុខវឌ្ឍន៍នន្ទ៕V / N
