ដោយៈ ដកស្រង់ពីវចនានុក្រមសម្តេចសង្ឃរាជ ជួន ណាត
សាច់ជូរ
នាមសព្ទ
ធាតុផ្សំមានបែបភាពជាអំបិលជូរ សាច់រឹងជាដុំ សម្រាប់ប្រើកូរលាយទឹកជ្រលក់ឲ្យដិតស្រស់ព័ណ៌ជាដើម; មាន ២ ប្រភេទគឺ សាច់ជូរ-ស មានសាច់ព័ណ៌ស; សាច់ជូរខៀវ មានព័ណ៌ខៀវស្ទើរបៃតងចាស់ ( ច្រើនប្រើជាថ្នាំ ) ។
សាយយុត
នាមសព្ទ
( ស. សាយហ្យុត (–យុត) “វេលាថ្ងៃឈប់” ឬ សាវហ្យុត (–យុត) “ក្រមុំឈប់ ឬក្រមុំទច់”) ឈ្មោះឈើមួយប្រភេទ ដើមរឹង ស្ទើរជាវល្លិស្រដៀងនឹងត្រៀលស្វា ស្លឹកស្រដៀងនឹងគគីរ តែទ្រើសជាងផ្កាសណ្ឋានស្រដៀងនឹងក្ដាំងងា មានក្លិនស្រដៀងនឹងផ្លែព្នៅទុំក្រអូបខ្លាំង តែក្នុងវេលាយប់ជិតភ្លឺមកទល់នឹងពេលថ្ងៃរះអស់ក្លិន ។
សិរមាន់
(សេ—)
នាមសព្ទ
ឈ្មោះឈើធំមួយ**ប្រភេទ ផ្លែស្រដៀងនឹងគូលែន តែតូចជាងគូលែន បរិភោគបាន ( សរសេរជា សេរមាន់ ក៏មាន ) ។ ឈ្មោះឈើតូចមួយប្រភេទ ដើមស្ទើរជាតិណជាតិ ផ្កាក្រហមស្រដៀងនឹងផ្កាច្បា ( ម.ព. សិរ ផង ) ។
**ពាក្យ “មួយ” ត្រូវបានកែសម្រួលពីពាក្យដើម “មួ” ទើបសមស្របតាមបរិបទនេះ។
សឹង
និបាតសព្ទ
រកកល់, រកកល់នឹង, ស្ទើរនឹង
ថាដូច្នេះវិញក៏សឹងបាន ។
សឹងតែ និ. រកកល់តែ, ស្ទើរតែ; ក៏បានដែរ
បើអ្នកមិនយក ឲ្យមកខ្ញុំវិញក៏សឹងតែបាន ឥតទាស់អ្វីទេ ។
សុទ្ធតែ
និបាតសព្ទ
សុទ្ធឥតលាយឡំ, តែទាំងអស់ ឬស្ទើរតែសុទ្ធទាំងអស់
សុទ្ធតែផ្លែខ្ចី; សុទ្ធសឹងតែល្អៗ ។