ដោយៈ ជា សីហៈ/ភ្នំពេញៈ កាលពីរាត្រីថ្ងៃទី១១ ខែកញ្ញា ឆ្នាំ២០២២ នៅសណ្ឋាគារ Hyatt Regency ភ្នំពេញ មន្ត្រីកម្ពុជា ធុរជនបរទេស និង កម្ពុជា បាននាំគ្នាពិភាក្សានាវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ ស្តីពី “ភាពជាដៃគូសម្រាប់អាស៊ានដែលមានភាពស្អិតរមួត និងឆ្លើយតប” ក្រោមអធិបតីភាពរបស់លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ។
ឆ្លៀតក្នុងឱកាសនោះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងថា ការជឿជាក់ថា វេទិកាថ្ងៃនេះនឹងមិនត្រឹមតែផ្តល់នូវការយល់ដឹងអំពីរបៀបដែលអាស៊ានអាចឈានទៅមុខការពន្លឿនកំណើនសេដ្ឋកិច្ច និងវិបុលភាពក្នុងស្ថានភាពប្រក្រតីថ្មី (New Normal) ប៉ុន្តែថែមទាំងបង្ហាញពន្លឺខ្លះៗអំពីតួនាទីរបស់ អាស៊ាននៅក្នុងពិភពលោកដែលមានការផ្លាស់ប្តូរយ៉ាងឆាប់រហ័ស និងរបៀបដែលអាស៊ានអាចរួមគ្នា និងឆ្ពោះទៅមុខ។
លោកបានបន្តថា កម្ពុជាទទួលតួនាទីជាប្រធានអាស៊ានឆ្នាំ២០២២ ចំពេលដែលប្រទេសអាស៊ានកំពុងបន្តប្រយុទ្ធប្រឆាំងនឹងជំងឺរាតត្បាត កូវីដ-១៩ ភាពមិនច្បាស់លាស់ និងការរំខានថ្មីៗ ដែលកើតចេញពីការប្រកួតប្រជែងភូមិសាស្ត្រនយោបាយក៏បានរួមចំណែកដល់បញ្ហាប្រឈមដ៏ស្មុគស្មាញដែលយើងបានជួបប្រទះកន្លងមក។
លោកបានបន្ថែមថា ទោះជាយ៉ាងណាក៏ដោយ ឧបសគ្គទាំងនោះមិនអាចរារាំងយើងពីការឆ្ពោះទៅមុខនិងសម្រេចឱ្យបាននូវបេសកកម្មរបស់យើង បានឡើយ។ កម្ពុជា រួមជាមួយនិងរដ្ឋសមាជិកអាស៊ាន និងលេខាធិការដ្ឋានអាស៊ាន បានបង្ហាញស្មារតីដ៏រឹងមាំនិងសកម្មតាមរយៈគំនិតផ្តួចផ្តើម និងការប្តេជ្ញាចិត្តងើបចេញឱ្យផុតពីជំងឺរាតត្បាត និងលើកកម្ពស់វិបុលភាពសេដ្ឋកិច្ចក្នុងតំបន់។
លោកបានបន្តថា ដើម្បីសម្រេចឱ្យបានពេញលេញនូវអាស៊ានមួយដែលមានភាពស្អិតរមួត និងឆ្លើយតប រដ្ឋាភិបាលតែម្នាក់ឯងនឹងមិនអាចធ្វើបានទេ។ យើងត្រូវការការចូលរួមផ្តល់អនុសាសន៍ និងធាតុចូលពីវិស័យឯកជន អ្នកសិក្សា ស្ថាប័នប្រមូលផ្តុំគំនិត (Think Tank) ដូចជា KSI, ERIA, AVI និងវិទ្យាស្ថានស្រាវជ្រាវលេចធ្លោផ្សេងទៀត ដូច្នេះយើងអាចដោះស្រាយបញ្ហាប្រឈមទាំងអស់រួមគ្នាប្រកបដោយប្រសិទ្ធភាព និងលើកកម្ពស់ឱកាសសមធម៌សម្រាប់ទាំងអស់គ្នា៕
