ដោយៈ វ៉ៃកូ / ស្វាយរៀងៈ លោក ម៉ែន វិបុល អភិបាល នៃគណៈអភិបាល ខេត្តស្វាយរៀង នៅព្រឹកថ្ងៃទី១៣ ខែតុលា ឆ្នាំ២០២២ នេះ បានអញ្ជើញជាអធិបតី នៅក្នុងកិច្ចប្រជុំត្រៀមលក្ខណៈ រៀបចំពិធីប្រណាំងទូក ឆ្នាំ២០២២ នៅទន្លេវ៉ៃគោ ក្រុងស្វាយរៀង ខេត្តស្វាយរៀង ដែលបានប្រព្រឹត្តទៅ នៅសាលប្រជុំអាគារ ” ឃ ” សាលាខេត្ត ។
មានប្រសាសន៍ក្នុងកិច្ចប្រជុំនេះ លោកអភិបាលខេត្ត បានណែនាំដល់អនុគណៈកម្មការ ទាំងអស់ បន្ទាប់ពីកិច្ចប្រជុំ នៅថ្ងៃនេះ ត្រូវបន្តចាត់ចែងរៀបចំប្រជុំបែងចែកការងារលម្អិត ស្របតាមតួនាទីភារកិច្ច ដែលមានកំណត់ក្នុងសេចក្ដីសម្រេច របស់រដ្ឋបាលខេត្ត ជាពិសេសរៀបចំផែនការចំណាយ សម្រាប់អនុគណៈកម្មការនីមួយៗ ដែលត្រូវប្រើប្រាស់ ឲ្យបានច្បាស់លាស់ ដេីម្បីពន្លឿនលេីការងារទាំងនោះ ឲ្យមានប្រសិទ្ធភាព និងទាន់ពេលវេលា។
សូមជម្រាបជូនថា ពិធីប្រណាំងទូកនៅទន្លេវ៉ៃគោ ឆ្នាំ២០២២ នេះ គ្រោងនឹងប្រព្រឹត្តទៅ មានរយៈពេល ២ ថ្ងៃគឺ ថ្ងៃសៅរ៍-អាទិត្យ ទី២៩ – ៣០ ខែតុលា ឆ្នាំ២០២២។
ទន្ទឹមនោះ ដើម្បីរៀបចំពិធីនេះ ឲ្យប្រព្រឹត្តទៅដោយរលូន ទាន់ពេលវេលា និងបង្កបរិយាកាស ជូនបងប្អូនប្រជាពលរដ្ឋ បានទស្សនាកម្សាន្ត ប្រកបដោយភាព សប្បាយរីករាយ រដ្ឋបាលខេត្តស្វាយរៀង បានបង្កើតគណៈកម្មការចំនួនមួយ អមដោយ អនុគណៈកម្មការចំនួន ១០ ផ្សេងទៀត ជាជំនួយការផងដែរ៕ V / N
