ដោយ: ពៅនិមល / ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» បានអះអាងថា គិតមកដល់បច្ចុប្បន្ន កម្ពុជាពុំទាន់ មានច្បាប់ហាមឃាត់ការប្រើប្រាស់ ការនាំចូល ផលិតផលដែលមានផ្ទុកសារធាតុ អាសបេស្តុស នៅឡើយទេ។
នៅក្រោយចប់កិច្ចប្រជុំដឹកនាំដោយលោក ឌឹម ថេង អគ្គនាយករង តំណាងលោក ផាន អូន ប្រតិភូរាជរដ្ឋាភិបាលទទួលបន្ទុកជា អគ្គនាយក នៃអគ្គនាយកដ្ឋាន ក.ប.ប. និងអង្គការ APHEDA និងទីភ្នាក់ងាររដ្ឋបាលប្រទេសអូស្ត្រាលី ដើម្បីលុបបំបាត់ សារធាតុអាសបេស្តុស (ASEA) នៅល្ងាចថ្ងៃទី១៣ ខែកញ្ញា ឆ្នាំ២០២២នេះ អគ្គនាយកដ្ឋាន ក.ប.ប. បានឲ្យដឹង ក្នុងបណ្តាញសង្គមថា ទោះជាយ៉ាងនេះក៏ដោយ អគ្គនាយកដ្ឋាន ក.ប.ប. បានផ្សព្វផ្សាយ និងលើកទឹកចិត្តដល់ធុរជនដែលផលិត និងនាំចូលផលិតផលគ្រឿងសំណង់ យកផលិលផលខ្លួនមកវិភាគ រកវត្តមានសារធាតុ អាសបេស្តុស នៅមន្ទីរពិសោធន៍អគ្គនាយកដ្ឋាន ក.ប.ប. តាមគោលការណ៍ស្មគ្រចិត្តបាន ដើម្បីផ្តល់ទំនុកចិត្តដល់អ្នកប្រើប្រាស់ថា ផលិតផលដែលបានចែកចាយ មិនមានវត្តមាន សារធាតុ អាសបេស្តុស។
នៅក្នុងកិច្ចប្រជុំនេះ លោកអគ្គនាយករង បានលើកឡើង អំពីវឌ្ឍនភាពនៃមន្ទីរពិសោធន៍ អាសបេស្តុស របស់អគ្គនាយកដ្ឋាន ក.ប.ប. ក្នុងការត្រួតពិនិត្យសារធាតុអាសបេស្តុស ក្នុងផលិតផលគ្រឿងសំណង់ ដែលមានសមត្ថភាព និងសក្តានុពល ក្នុងការវិភាគរក សារធាតុអាសបេស្តុស ដោយទទួលបានការជួយឧបត្ថម្ភ ពីរដ្ឋាភិបាលអូស្ត្រាលី។ ជាមួយគ្នានេះ លោកស្វាគមន៍ Malcolm ដែលនឹងមកបណ្តុះបណ្តាល នាខែតុលា ខាងមុខនេះ។
ប្រភព ក.ប.ប បានឲ្យដឹងទៀតថា អង្គការ APHEDA បានថ្លែងអំណរគុណយ៉ាង ជ្រាលជ្រៅ ដែលបានអនុញ្ញាតឱ្យក្រុមការងារ បានមកធ្វើទស្សនកិច្ច និងធ្វើបទបង្ហាញ អំពីបច្ចុប្បន្នភាពនៃមន្ទីរពិសោធន៍ វិភាគសារធាតុអាសបេស្តុសនេះ និងគាំទ្រយ៉ាង ពេញទំហឹង ដល់ការពង្រឹងសមត្ថភាពកម្ពុជា ក្នុងការវិភាគរកសារធាតុអាសបេស្តុស។ ជាមួយគ្នានេះ អង្គការ បានសំណូមពរ ដល់អគ្គនាយកដ្ឋាន ក.ប.ប. ឲ្យផ្តល់នូវប្រធានបទ ជាក់លាក់ តម្រូវការ និងឧបករណ៍ដល់អ្នកជំនាញការ មុនពេលគាត់មកបណ្តុះបណ្តាល ដើម្បីឱ្យសមស្របនឹងបរិបទបច្ចុប្បន្ន របស់មន្ទីរពិសោធន៍ ក៏ដូចជាលើកទឹកចិត្ត ក្នុងការសហការ យ៉ាងជិតស្និទ្ធ ជាមួយក្រសួងការងារ និងបណ្តុះបណ្តាលវិជ្ជាជីវៈ លើកិច្ចការនេះ៕ V / N
រូបភាព កិច្ចប្រជុំដើម្បីលុបបំបាត់សារធាតុអាសបេស្តុស រវាងរដ្ឋាភិបាលកម្ពុជា និងអង្គការ APHEDA និងទីភ្នាក់ងាររដ្ឋបាលប្រទេសអូស្ត្រាលី ( រូបភាព ហ្វេសប៊ុក )