ដោយៈ សុផល / ភ្នំពេញ៖ ក្នុងឱកាសបំពេញទស្សនកិច្ចជាផ្លូវការ និងមិត្តភាព នៅសាធារណរដ្ឋសង្គមនិយមវៀតណាម សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានចូលជួបសម្តែងការគួរសមជាមួយ លោក ង្វៀន ភូជុង (Nguyen Phu Trong) អគ្គលេខាធិការគណៈកម្មាធិការ មជ្ឈឹមបក្សកុម្មុយនីស្តវៀតណាម នៅទីស្នាក់ការគណៈកម្មាធិការកណ្តាលបក្ស នារសៀលថ្ងៃទី១៣ ខែកញ្ញា នៅរដ្ឋធានីហាណូយ។
សម្តេចប្រធានរដ្ឋសភា បានថ្លែងអំណរគុណ ចំពោះលោកអគ្គលេខាធិការបក្ស ដែលឆ្លៀតឱកាសដ៏មមាញឹក អនុញ្ញាតឱ្យគណៈប្រតិភូ បានជួបសម្តែងការគួរសម និងបានទទួលស្វាគមន៍ យ៉ាងរាក់ទាក់កក់ក្តៅ។សម្តេចបានអបអរសាទរ ចំពោះខួបលើកទី៧៧ ទិវាបុណ្យឯករាជ្យ ជាតិវៀតណាម និងបានប្រសិទ្ធពរជ័យ ជូនថ្នាក់ដឹកនាំ និងប្រជាជនវៀតណាម សូមទទួលបាននូវ សេចក្តីសុខ សុភមង្គល វិបុលភាពនិង វឌ្ឍនភាព ជានិច្ចនិរន្ត និងបានសម្តែងនូវ ការអបអរសាទរខួបលើកទី៥៥ ឆ្នាំ នៃការបង្កើតទំនាក់ទំនងការទូតផ្លូវការ រវាងកម្ពុជា-វៀតណាម និងឆ្នាំមិត្តភាព កម្ពុជា-វៀតណាម ផងដែរ។
ក្នុងឱកាសនោះដែរ សម្តេចប្រធាន បានពាំនាំនូវការផ្តាំផ្ញើសាកសួរសុខទុក្ខពី ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជូនចំពោះលោកអគ្គលេខាធិការបក្ស។
ក្នុងនាមរដ្ឋសភាកម្ពុជា សម្តេចអគ្គមហាពញាចក្រី ហេង សំរិន មានមោទកភាព រីករាយបំផុត ដោយសង្កេតឃើញពីវឌ្ឍនភាព នៃទំនាក់ទំនង មិត្តភាព សាមគ្គីភាព ជាប្រពៃណី និងកិច្ចសហប្រតិបត្តិការ គ្រប់ជ្រុងជ្រោយ រវាងបក្ស រដ្ឋ និងប្រជាជន នៃប្រទេសទាំងពីរ កម្ពុជា-វៀតណាម មានការរីកចម្រើន ឥតឈប់ឈរ រឹងមាំ និងយូរអង្វែង ដើម្បីជាគុណប្រយោជន៍ នៃការអភិវឌ្ឍប្រទេស ប្រកបដោយចីរភាព និងដើម្បីសន្តិភាព ស្ថិរភាព នៅក្នុងតំបន់ និងសកលលោក ។
លោក ង្វៀន ភូជុង បានអបអរសារទចំពោះជោគជ័យរបស់កម្ពុជា ក្នុងការប្រយុទ្ធប្រឆាំងជំងឺកូវីដ-១៩ ដែលនាំឲ្យកម្ពុជាមានលទ្ធភាព បើកដំណើរការសង្គម និងសេដ្ឋកិច្ចឡើងវិញ ដើម្បីបន្តការអភិវឌ្ឍប្រទេសជាតិ ទៅមុខឥតឈប់ឈរ។ លោក បានអបអរសាទរ ដែលកម្ពុជាបានរៀបចំការបោះឆ្នោត ឃុំ សង្កាត់ អាណត្តិទី៥ កាលពីពេលថ្មីៗនេះ បានយ៉ាងជោគជ័យ ដែលបានឆ្លុះបញ្ចាំងពីការទុកចិត្ត និងជឿជាក់របស់ប្រជាជនកម្ពុជា មកលើគណបក្សប្រជាជនកម្ពុជា ហើយបានសង្កត់ធ្ងន់ ថា ជោគជ័យនេះ ជាមូលដ្ឋានគ្រឹះដ៏រឹងមាំ សម្រាប់គណបក្សប្រជាជនកម្ពុជា ឈានទៅដណើ្តមជ័យជំនះ សម្រាប់ការបោះឆ្នោតជាតិ នាឆ្នាំ២០២៣ ខាងមុខ។
លោក ង្វៀន ភូជុង បានគាំទ្រនូវលទ្ធផលដ៏ជោគជ័យ នៃជំនួបពិភាក្សាការងាររបស់ សម្តេចប្រធានរដ្ឋសភា និងលោកប្រធានរដ្ឋសភាវៀតណាម កាលពីថ្ងៃទី១២ ខែកញ្ញា ថាជាលទ្ធផលដ៏ល្អមួយ ក្នុងការបន្តជំរុញ និងបង្កើនទំនាក់ទំនង និងកិច្ចសហប្រតិបត្តិការ រវាងរដ្ឋ បក្ស និងប្រជាជន នៃប្រទេសទាំងពីរ ឲ្យកាន់តែរឹងមាំឡើង៕/V
