ប្រែសម្រួល : កញ្ញាដាលីស (ដេល្លីម៉េល) ៖ អង្គការសហប្រជាជាតិបាននិយាយកាលពីថ្ងៃអង្គារទី១៣កញ្ញាថាការនាំចេញស្បៀងពីអ៊ុយក្រែននិងរុស្ស៊ីបានកើនឡើងចាប់តាំងពីកិច្ចព្រមព្រៀងគ្រាប់ធញ្ញជាតិកាលពីថ្ងៃទី ២២ ខែកក្កដា ប៉ុន្តែការនាំចេញជីដែលត្រូវការយ៉ាងខ្លាំងពីរុស្ស៊ីនៅតែធ្លាក់ចុះ បើទោះបីជាវាស្ថិតក្នុងកិច្ចព្រមព្រៀងនេះក៏ដោយខណៈការធ្វើហិរញ្ញប្បទាននិងការដឹកជញ្ជូនរបស់រុស្ស៊ីនៅតែជាបញ្ហា។
ប្រធានផ្នែកពាណិជ្ជកម្មរបស់អ.ស.ប លោកស្រី រីបេកា ហ្គ្រីនស្ប៉ាន (Rebeca Grynspan)ដែលដឹកនាំក្រុមមួយដើម្បីព្យាយាមជួយសម្រួលដល់ការទទួលបានស្បៀងអាហារនិងជីរុស្សីជាសកលដោយគ្មានការរារាំង បាននិយាយថា រុស្ស៊ីបានរាយការណ៍ពីការកើនឡើង ១២ ភាគរយនៃការនាំចេញស្បៀងពីខែមិថុនាដល់ខែកក្កដា។ ប៉ុន្តែខណៈមាន “វឌ្ឍនភាពដ៏សំខាន់នេះ”អ.ស.បមានការព្រួយបារម្ភអំពីការនាំចេញជីដែលត្រូវការចាំបាច់នៅខែតុលានិងវិច្ឆិកា ដែលជាខែចុងក្រោយបំផុតសម្រាប់រដូវដាំដុះនៅអឌ្ឍគោលខាងជើង។
លោកស្រីហ្គ្រីនស្ប៉ានបាននិយាយថា ជីឥឡូវនេះមានតម្លៃខ្ពស់ជាងបីដងនៃតម្លៃដែលវាធ្លាប់មានមុនពេលជំងឺរាតត្បាតកូវីដ១៩វាយប្រហារនៅដើមឆ្នាំ ២០២០ ដោយបន្ថែមថា”វិបត្តិលទ្ធភាពទិញដែលយើងកំពុងមាននៅពេលនេះនឹងក្លាយជាវិបត្តិដ៏មហន្តរាយ ប្រសិនបើយើងមិនដោះស្រាយបញ្ហាជីទេនោះ”។
ជាឧទាហរណ៍ លោកស្រីបាននិយាយថា រដូវសាបព្រួសសម្រាប់ដំណាំថ្មីនៅអាហ្វ្រិកខាងលិចបានចប់ហើយ ហើយការដាំដុះបានធ្លាក់ចុះក្នុងភាគរយដ៏ខ្ពស់ដោយសារតែតម្លៃជី។
លោកស្រីហ្គ្រីនស្ប៉ានបានប្រាប់សន្និសីទសារព័ត៌មានរបស់អ.ស.បតាមវីដេអូពីទីក្រុងហ្សឺណែវថាអង្គការស្បៀងអាហារនិងកសិកម្មរបស់អ.ស.បបានរាយការណ៍ថាតម្លៃស្បៀងអាហារបានធ្លាក់ចុះជាសកលនៅក្នុងខែសីហាសម្រាប់រយៈពេលប្រាំខែជាប់ៗគ្នា។ ប៉ុន្តែលោកស្រីបានសម្តែងការព្រួយបារម្ភថា ការថយចុះនេះមិនត្រូវបានគេមើលឃើញនៅក្នុងទីផ្សារក្នុងស្រុកទេហើយជាពិសេសប្រទេសកំពុងអភិវឌ្ឍន៍នៅតែជួបបញ្ហាជាមួយនឹងតម្លៃម្ហូបអាហារខ្ពស់ ក៏ដូចជាអតិផរណា ការធ្លាក់ចុះតម្លៃរូបិយវត្ថុ និងការដំឡើងអត្រាការប្រាក់៕
ការនាំចេញស្បៀងអាហារពីអ៊ុយក្រែនកើនឡើងចាប់តាំងពីកិច្ចព្រមព្រៀងគ្រាប់ធញ្ញជាតិបានធ្វើឡើងកាលពីថ្ងៃទី ២២ ខែកក្កដា