ដោយ៖ សុវណ្ណកុម្ភៈ / ភ្នំពេញ៖ នៅថ្ងៃទី១៥ កញ្ញា នេះ អគ្គលេខាធិការសហព័ន្ធ កីឡាវ៉ូវីណាមកម្ពុជា លោក យ៉ាំ ថៃសាន្ត បានអញ្ជើញចូលរួមពិធីបើកវគ្គបណ្តុះបណ្តាល អាជ្ញាកណ្តាល និងចៅក្រម ដើម្បីត្រៀមព្រឹត្តិការណ៍ការប្រកួតកីឡាវ៉ូវីណាម ជ្រើសរើស ជើងឯកថ្នាក់ជាតិ ២០២២ ដែលនឹងប្រព្រឹត្តឡើង នៅថ្ងៃទី១៧ ដល់ ១៩ ខែកញ្ញា ឆ្នាំ២០២២ នៅសាលសកលវិទ្យាល័យភូមិន្ទភ្នំពេញ។
លោក អគ្គលេខាធិការ បានមានប្រសាសន៍ថាៈ វគ្គបណ្តុះបណ្តាល អាជ្ញាកណ្តាល ចៅក្រម ២០២២ បង្រៀនដោយលោកគ្រូ ជនជាតិវៀតណាម លោកគ្រូ កៅ មករា និងលោកគ្រូ ជីវៈ សុខុម ដែលជាអាជ្ញាកណ្តាល ចៅក្រមមានបទពិសោធន៍ លើទីលាន ប្រកួត ដោយសារតែលោកគ្រូ ជនជាតិបរទេស មិនអាចមកប្រទេសកម្ពុជាបាន ដោយសារមេរោគកូវីដ-១៩ ។
ចំពោះអាជ្ញាកណ្តាល ចៅក្រម វគ្គនេះ ប្រសិនបើទទួលចំណាត់ថ្នាក់ល្អ អនុញ្ញាតឲ្យ ចូលរួម ធ្វើជាអាជ្ញាកណ្តាល ចៅក្រម សម្រាប់ព្រឹត្តិការណ៍ ការប្រកួតកីឡាវ៉ូវីណាម ជ្រើសរើសជើងឯក ថ្នាក់ជាតិ ២០២២ ។
លោកបានបន្តថាៈ ចំពោះវគ្គបណ្តុះបណ្តាលអាជ្ញាកណ្តាល ចៅក្រម ២០២២ មានសិក្ខាកាម ចំនួន ៣២ នាក់ មកពី ៨ រាជធានី ខេត្ត ទូទាំងប្រទេស និងជនជាតិថៃ ចំនួន ៣ នាក់។
យោងតាមការណែនាំរបស់ក្រសួងសុខាភិបាល និងក្រសួងអប់រំ យុវជន និងកីឡា សហព័ន្ធកាត់បន្ថយ ចំនួនកីឡាករ កីឡាការិនី អាជ្ញាកណ្តាល ចៅក្រម ព្រមទាំងកាត់ចេញ នូវវិញ្ញាសាមួយ ចំនួនទៀតផងទៀតផង៕ V / N
