ប្រែសម្រួល : កញ្ញាដាលីស (ដេល្លីម៉េល) ៖ មីក្រូឈីបថ្មីរបស់ក្រុមហ៊ុន Tesla នឹងមានភាពវៃឆ្លាតជាងមនុស្សនៅត្រឹមឆ្នាំ ២០៣៣ខណៈដែលថាមពលនៃប្រព័ន្ធដំណើរការរបស់វាបច្ចុប្បន្នមានកម្រិតរហូតដល់ទៅ ៣៦ ភាគរយនៃខួរក្បាលរបស់មនុស្ស។
មីក្រូឈីប D1 អាចគ្រប់គ្រងប្រតិបត្តិការបាន ៣៦២ ទ្រីលានក្នុងមួយវិនាទី ចំណែកខួរក្បាលរបស់មនុស្សមានសមត្ថភាពប្រតិបត្តិការ ១ ក្វាទ្រីលាន (Quadrillion) ក្នុងមួយវិនាទី(តួលេខនេះមានសូន្យ ១៥) នេះបើយោងតាមការសិក្សាដែលធ្វើឡើងដោយក្រុមហ៊ុនជួលរថយន្តនិងឡានដឹកភ្ញៀវ Vanarama ។
ក្រុមហ៊ុនបានធ្វើការទស្សន៍ទាយដោយវិភាគមីក្រូឈីបរបស់ Tesla ពីអតីតកាលនិងបច្ចុប្បន្ន ដោយរកឃើញថាសមត្ថភាពរបស់មីក្រូឈីបកំពុងកើនឡើងក្នុងអត្រា ៤៨៦ ភាគរយក្នុងមួយឆ្នាំ។
ក្រុមហ៊ុនរបស់លោក អេឡុន ម៉ាស គ្រោងនឹងបញ្ចេញបន្ទះឈីប D1 ថ្មីដែលជាផ្នែកមួយនៃវេទិកាកុំព្យូទ័រទំនើប Dojo របស់ខ្លួននៅឆ្នាំនេះហើយវានឹងក្លាយជាផ្នែកសំខាន់នៃប្រព័ន្ធបើកបរដោយខ្លួនឯងឈ្មោះថា Autopilot របស់ក្រុមហ៊ុន ខណៈដែលក្រុមហ៊ុនបន្តអភិវឌ្ឍទៅមុខទៀត នេះបើយោងតាម Vanarama ។
ក្នុងគ្រាដែលវាអាចនាំអ្នកទៅអានក្រាហ្វិកខាងលើបាន (ដូចបង្ហាញក្នុងរូបពណ៌ខៀវ) បន្ទះឈីប D1 នឹងបំពេញប្រតិបត្តិការបាន ៧,៦ ក្វាទ្រីលាន។
ខួរក្បាលមនុស្ស ដែលរីកមាឌបីដងក្នុងអំឡុងពេលកើតឆ្នាំដំបូងរហូតឈានដល់ភាពពេញវ័យនៅអាយុ ២៥ ឆ្នាំ គឺផ្ទុកនូវណឺរ៉ូន (neuron) ប្រហែល ១០០ ពាន់លាន។
អ្នកស្រាវជ្រាវបាននិយាយជាយូរមកហើយថានឹងមានពេលវេលាមួយដែល AI នឹងមានសមត្ថភាពលើសបញ្ញារបស់មនុស្ស ទោះបីជាមានមតិជាច្រើនលើកឡើងថារឿងបែបនោះនឹងមិនងាយកើតឡើងឆាប់ៗក៏ដោយ។
ក្រុមហ៊ុន Vanaram និយាយថា “វាមិនមែនជារឿងឆ្កួតទេដែលជឿថាបច្ចេកវិជ្ជានឹងឆ្លាតជាងមនុស្សក្នុងមួយជីវិតរបស់យើង។មីក្រូឈីបបច្ចុប្បន្នមានសមត្ថភាពដំណើរការដូចដែលខួរក្បាលដំណើរការដែរ ពីព្រោះអ្នកស្រាវជ្រាវបានបង្កើតបន្ទះឈីបដែលត្រូវបានបំផុសគំនិតដោយរបៀបដែលខួរក្បាលដំណើរការ”។
បន្ទះឈីបមុននេះ ដែលគេស្គាល់ថា Hardware 3 អាចគ្រប់គ្រងប្រតិបត្តិការបាន ១៤៤ ទ្រីលានក្នុងមួយវិនាទីក្នុងឆ្នាំ ២០១៩។ មុននោះ Hardware 2 អាចគ្រប់គ្រងប្រតិបត្តិការបាន ៧២ ទ្រីលាន។ មីក្រូឈីប D1 គឺខ្លាំងជាងឧបករណ៍ Nvidia ដែលគេប្រើកាលពីប្រាំមួយឆ្នាំមុន រហូត ៣០ ដង។
ដោយក្រឡេកមើលអត្រាកំណើនបែបនោះ ក្រុមហ៊ុន Vanarama បានពន្យល់ថា Tesla នឹងចំណាយពេលត្រឹមតែ ១៧ ឆ្នាំដើម្បីឈានដល់កម្រិតនៃខួរក្បាលមនុស្សចាស់ទុំ គិតចាប់ពីការចាប់ផ្តើមនៃការអភិវឌ្ឍរបស់ក្រុមហ៊ុន៕
ឡាន Tesla នឹងឆ្លាតជាងមនុស្សនៅត្រឹមឆ្នាំ ២០៣៣