ដោយ៖ រ៉ាម៉ន / ភ្នំពេញ៖ ក្រុមការងារនៃមន្ទីរសាធារណការ និងដឹកជញ្ជូនរាជធានីភ្នំពេញ អនុវត្តទៅតាមការណែនាំរបស់លោក ឃួង ស្រេង អភិបាលរាជធានីភ្នំពេញ បាននិងកំពុងជួសជុលគ្រឹះ និងអ៊ុតកៅស៊ូ AC កំណាត់ផ្លូវជាតិលេខ២ ប្រវែងជិត ៥ គីឡូម៉ែត្រ ដើម្បីសម្រួលការធ្វើចរាចរ របស់បងប្អូនប្រជាពលរដ្ឋ ខណៈកំណាត់ផ្លូវនេះ មានការខូចខាត ពិបាកក្នុងការធ្វើដំណើរ ហើយក៏ដើម្បីជាការលើកសោភ័ណភាព រាជធានីភ្នំពេញ ផងដែរ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹង នៅព្រឹកថ្ងៃទី១៦ កញ្ញានេះថាៈ អនុវត្តតាមការណែនាំពីលោក ឃួង ស្រេង អភិបាលរាជធានីភ្នំពេញ កាលពីពេលថ្មីៗនេះ ក្រុមការងារនៃមន្ទីរសាធារណការ និងដឹកជញ្ជូនរាជធានីភ្នំពេញ បាននិងកំពុងបើកការរដ្ឋានជួសជុលគ្រឹះ និងអ៊ុតកៅស៊ូ AC កំណាត់ផ្លូវជាតិលេខ២ ដែលមានប្រវែង ៤ គីឡូម៉ែត្រកន្លះ ទទឹង ១៨ ម៉ែត្រ ដោយចាប់ពីស្ពានអាកាសក្បាលថ្នល់ ដល់រង្វង់មូលព្រះនរាយណ៍ (ព្រំប្រទល់ភ្នំពេញ និងខេត្តកណ្ដាល)។
លោក សាំ ពិសិដ្ឋ បានបញ្ជាក់ថាៈ ការដ្ឋាននេះ បានចាប់ផ្តើមដំណើរការ កាលពីថ្ងៃទី១ ខែកញ្ញា ឆ្នាំ២០២២ ហើយគ្រោងនឹងបញ្ចប់នៅថ្ងៃទី៣០ កញ្ញា ឆ្នាំ២០២២ ពោលគឺ ប្រើប្រាស់ពេលវេលា ១ខែគត់ ដើម្បីធ្វើឱ្យកំណាត់ផ្លូវនេះ មានសោភ័ណភាព និងធ្វើឱ្យប្រជាពលយរដ្ឋ អាចធ្វើដំណើរទៅមកបានស្រួល។
គួររំលឹកផងដែរថា អភិបាលរាជធានីភ្នំពេញ លោក ឃួង ស្រេង កាលពីព្រឹកថ្ងៃទី២៩ សីហា ២០២២ កន្លងមកនេះ លោកបានដឹកនាំមន្ត្រីជំនាញ និងអាជ្ញាធរដែនដី ចុះរៀបចំសណ្តាប់ធ្នាប់សាធារណៈ និងពិនិត្យមើលស្ថានភាពផ្លូវជាតិលេខ២ ក្នុងសង្កាត់ចាក់អង្រែលើ និងចាក់អង្រែក្រោម ខណ្ឌមានន័យ ហើយកាលណោះ លោកអភិបាលរាជធានី បានណែនាំឱ្យមន្ត្រីជំនាញ និងអាជ្ញាធរដែនដី នៃខណ្ឌមានជ័យ រៀបចំសណ្តាប់ធ្នាប់សាធារណៈ ផ្លូវជាតិលេខ២ នេះ ឱ្យបានល្អ ដោយមិនឱ្យមាន ការលក់ដូររំលោភ យកចិញ្ចើមផ្លូវសាធារណៈ និងជួសជុលមើលថែផ្លូវ ក្រលុកសំបុកមាន់ ដើម្បីឱ្យបងប្អូនប្រជាពលរដ្ឋ អាចធ្វើដំណើរទៅមកបានស្រួល៕ V / N
