ប្រែសម្រួលៈបំណង(ST)៖ នាវាចម្បាំងនៃកងទ័ពជើងទឹកអាម៉េរិកមួយគ្រឿងបូករួមទាំងនាវាហ្វ្រីហ្កាតរបស់កាណាដាមួយគ្រឿងបានបើកឆ្លងកាត់ច្រកសមុទ្រតៃវ៉ាន់កាលពីថ្ងៃអង្គារទី២០កញ្ញា ក្នុងបេសកកម្មមួយចំពេលមានភាពតាមតឹងរវាងរដ្ឋាភិបាលទីក្រុងវ៉ាស៊ីនតោននិងប៉េកាំង។
នៅប៉ុន្មានឆ្នាំថ្មីៗនេះ នាវាចម្បាំងអាម៉េរិក និងម្តងម្កាលនាវាទៅពីប្រទេសសម្ពន្ធមិត្ត ដូចជាអង់គ្លេសនិងកាណាដា បានបើកកាត់ផ្លូវទឹកដ៏រសើបមួយនេះ ដោយនាំអោយចិនប្រតិកម្មទាំងកំហឹង ដោយសារខ្លួនចាត់ទុកតៃវ៉ាន់ជាខេត្តផ្តាច់ខ្លួនមួយរបស់ខ្លួន ដែលនៅរង់ចាំពេលធ្វើការបង្រួបបង្រួមជាមួយមហាចិនដីគោកវិញតែប៉ុណ្ណោះ។
នៅក្នុងសេចក្តីថ្លែងការណ៍មួយ កងទ័ពជើងទឹកអាម៉េរិកបាននិយាយថានាវាពិឃាតបំពាក់កាំជ្រួចបញ្ជានាំផ្លូវHigginsនិងនាវាហ្វ្រីហ្កាតVancouverរបស់កាណាដា បានធ្វើការបើកឆ្លងកាត់ផ្លូវទឹកមួយនៅក្នុងច្រកសមុទ្រតៃវ៉ាន់ ដែលនៅហួសពីសមុទ្រនៃរដ្ឋណាមួយ។
វាបានបន្ថែមថា «កិច្ចសហការដូចនេះតំណាងអោយស្នូលនៃមធ្យោបាយរបស់យើងចំពោះតំបន់មានសន្តិសុខនិងចំរុងចំរើនមួយ»។
រដ្ឋមន្ត្រីការពារជាតិកាណាដា បាននិយាយថា ប្រទេសលោកស្រី ក្នុងនាមជាប្រជាជាតិប៉ាស៊ីហ្វិកមួយ ប្តេជ្ញារក្សាស្ថិរភាពសកលលោកនិងវិបុលភាពនៅក្នងតំបន់ឥណ្ឌូប៉ាស៊ីហ្វិក ហើយ«ការបើកឆ្លងកាត់នៅថ្ងៃនេះបង្ហាញការតាំងចិត្តរបស់យើងចំពោះតំបន់ឥណ្ឌូប៉ាស៊ីហ្វិកសេរីនិងបើកចំហមួយ»។
ក្នុងពេលជាមួយគ្នា ក្រសួងយោធាតៃវ៉ាន់បាននិយាថា នាវាទាំងពីរបានបើកទៅទិសខាងជើងកាត់ច្រកសមុទ្រនិងថាកងកម្លាំងរបស់ខ្លួនបានសង្កេតតាមដានដំណើររបស់ពួកវា តែថា«សភាពការណ៍ធម្មតា»។
វាជាលើកទីពីរនៅក្នុងខែនេះដែលនាវាអាម៉េរិកបើកកាត់ច្រកសមុទ្រតៃវ៉ាន់ក្រោយប្រធានសភាអាម៉េរិកទៅធ្វើទស្សនកិច្ចកោះតៃវ៉ាន់ដែលធ្វើអោយចិនខ្ញាល់ជាខ្លាំងដល់ថ្នាក់បញ្ចេញសមយុទ្ធយោធានៅជុំវិញកោះ៕
កងកម្លាំងកាណាដាបាននិយាយថា ក្នុងដំណើរទៅកាន់សមុទ្រចិនខាងកើត នាវាHMCS Vancouver រួមជាមួយនាវាអាម៉េរិកUSS Higginsបានបើកឆ្លងកាត់ច្រកសមុទ្រតៃវ៉ាន់