ប្រែសម្រួលៈបំណង(ដេល្លីម៉េល)៖បណ្តាមេដឹកនាំអន្តរជាតិនៅថ្ងៃអាទិត្យនេះបានសម្តែងការចូលរួមមរណទុក្ខក្រោយពីជនបរទេស២២នាក់ទៅពី១២ប្រទេសបានស្ថិតចំណោមអ្នកស្លាប់១៥១នាក់ក្នុងការប្រជ្រៀតដួលជាន់លើគ្នានៅក្នុងសង្កាត់អ៊ីតេវ៉ុនក្នុងទីក្រុងសេអ៊ូលកាលពីយប់ថ្ងៃសៅរ៍។
ទង់ជាតិកូរ៉េខាងត្បូងត្រូវបង្ហូតពាក់កណ្តាលដងនៅអាគារសភាជាតិកាលពីថ្ងៃ៣០តុលា ក្រោយសោកនាដកម្មនៅសង្កាត់អ៊ីតេវ៉ុនក្នុងក្រុងសេអ៊ូល
ប្រធានាធិបតីកូរ៉េខាងត្បូងលោក យូន ស៊ុក-យ៉ូលកាលពីថ្ងៃអាទិត្យបានចុះទៅកាន់កន្លែងកើតហេតុនិងប្រកាសកាន់ទុក្ខថ្នាក់ជាតិ
ប្រធានាធិបតីកូរ៉េខាងត្បូងលោក យូន ស៊ុក-យ៉ូលកាលពីថ្ងៃអាទិត្យបានប្រកាសការកាន់ទុក្ខថ្នាក់ជាតិចាប់ពីថ្ងៃ៣០តុលាដល់០៥វិច្ឆិកាក្រោយពីការប្រជ្រៀតនិងដួលលើគ្នាដល់ថ្នាក់ថប់ដង្ហើមស្លាប់ក្នុងពិធីបុណ្យហាឡូវីននៅតំបន់កម្សាន្តរាត្រីដ៏តូចចង្អៀតនិងពេញនិយមមួយក្នុងរដ្ឋធានី។
ក្រសួងហិរញ្ញវត្ថុនៅថ្ងៃនេះបានលុបចោលសន្និសីទកាសែតតាមគំរោងមួយជាមួយសារព័ត៌មានបរទេស នៅពេលពួកមន្ត្រីប្រកាសលុបចោលព្រឹត្តិការណ៍នានារួមទាំងពិធីអបអរបុណ្យហាឡូវីននិងព្រឹត្តិការណ៍លក់ផលិតផលកូរ៉េធំផុតបំផុតមួយផង។
អាជ្ញាធរបាននិយាយថា អ្នកដែលស្លាប់កាលពីយប់ថ្ងៃសៅរ៍រួមមានអ្នកមកពីចិន អ៊ីរ៉ង់ រុស្ស៊ី អាម៉េរិក អូស្ត្រាលី អ៊ុយបេគីស្ថាន វៀតណាត កាហ្សាក់ស្ថាន អូទ្រីស ស្រីលង្កា ថៃនិងន័រវ៉េស។
ទីភ្នាក់ងារសារព័ត៌មានស៊ីនហួរបាននិយាយថាជនជាតិចិនបួននាក់បានស្ថិតចំណោមអ្នកស្លាប់។
យោងតាមស៊ីនហួរប្រធានាធិបតីចិន លោក ស៊ី ជីនភីង ក្នុងសារលិខិតមួយបានមានប្រសាសន៍ថា «តាងនាមរដ្ឋាភិបាលនិងប្រជាជនចិន ខ្ញុំសូមសម្តែងការចូលរួមមរណទុក្ខដ៏ជ្រាលជ្រៅចំពោះជនរងគ្រោះនិងចូលរួមសម្តែងសមានចិត្តដ៏ស្មោះដល់ក្រុមគ្រួសាររបស់គេ រួមទាំងអ្នករងរបួស»។
លោកស៊ី បានបន្តថា ឧបទ្ទវហេតុនេះក៏បណ្តាលអោយជនជាតិចិនរងរបួសនិងស្លាប់ហើយសង្ឃឹមថា កូរ៉េខាងត្បូងនឹងខិតខំព្យាបាលអ្នករបួសនិងដោះស្រាយបញ្ហាពេលបន្ទាប់មក។
ប្រធានាធិបតីអាម៉េរិកលោកចូ បៃដិន និងជំទាវទីមួយ ជីល បៃដិនក៏បានផ្ញើសារចូលរួមមរណទុក្ខ ដោយលោកបានសរសេរថា«យើងមានទុក្ខសោកជាមួយប្រជាជននៃសាធារណរដ្ឋកូរ៉េ និងសូមផ្ញើការជូនពររបស់យើងសូមអោយអ្នករងរបួសឆាប់ជា»។
នាយករដ្ឋមន្ត្រីអង់គ្លេសលោក រីស៊ី ស៊ូណាក់ បានសរសេរបង្ហោះថា« អារម្មណ៍និងចិត្តគំនិតរបស់យើងទាំងអស់ឥឡូវនៅជាមួយអ្នកឆ្លើយតបនិងប្រជាជនកូរ៉េខាងត្បូងនៅពេលដ៏ទុក្ខសោកខ្លាំងនេះ»។
ពលរដ្ឋន័រវ៉េសម្នាក់ក៏ត្រូវបានប្រកាសថាស្លាប់ក្នុងការដួលសង្កត់លើគ្នានេះ ហើយរដ្ឋមន្ត្រីការបរទេសន័រវ៉េសបាននិយាយថា« ខ្ញុំខូចចិត្តខ្លាំងណាស់ចំពោះដំណឹងនៃឧបទ្ទវហេតុដ៏រន្ធត់ពាក់ព័ន្ធនឹងការអបអរបុណ្យហាឡូវីននៅក្រុងសេអ៊ូល។ខ្ញុំសូមសម្តែងការចូលរួមមរណទុក្ខដល់ក្រុមគ្រួសារនិងមិត្តភ័ក្តិដែលបាត់បង់មនុស្សជាទីស្រឡាញ់របស់គេ…»។
នាយករដ្ឋមន្ត្រីកាណាដា ក៏បានសរសេរបង្ហោះថា« ខ្ញុំគិតថាគ្រប់ប៉ះពាល់អារម្មណ៍ពីសោកនាដកម្មនេះ ។ខ្ញុំជូនពរអោយអ្នករបួសឆាប់ជា..»៕