ប្រែសម្រួល : កញ្ញាដាលីស (ដេល្លីម៉េល) ៖ មន្ត្រីកំពូលរបស់ FIFA បានជំរុញឱ្យក្រុមទាំង ៣២ ដែលកំពុងត្រៀមសម្រាប់ការប្រកួតវើលខាប់ដែលមានលក្ខណៈនយោបាយបំផុតក្នុងយុគសម័យទំនើបនេះ ផ្តោតតែលើការប្រកួតនៅប្រទេសកាតា និងចៀសវាងចែកចាយមេរៀនខាងសីលធម៌។
លិខិត ដែលជំរុញឱ្យក្រុមជម្រើសជាតិនានា “អនុញ្ញាតឱ្យបាល់ទាត់ស្ថិតនៅចំណុចកណ្តាល” ត្រូវបានផ្ញើដោយប្រធាន FIFA លោក ជីយ៉ាននី អ៊ីនហ្វាទីណូ (Gianni Infantino)និងអគ្គលេខាធិការលោក ហ្វាតម៉ា សាមូរ៉ា (Fatma Samoura) មុនពេលការផ្តោតសំខាន់របស់ប្រព័ន្ធផ្សព្វផ្សាយលើគ្រូបង្វឹកនិងកីឡាករ នៅពេលដែលក្រុមបាល់ទាត់វើលខាប់ត្រូវប្រកាសនៅសប្តាហ៍ក្រោយ។
លោកអ៊ីនហ្វាទីណូនិងលោកសាមូរ៉ាបានសរសេរថា “ឥឡូវនេះសូមយើងនាំគ្នាផ្តោតទៅលើបាល់ទាត់!” ដោយស្នើឱ្យសហព័ន្ធបាល់ទាត់ចំនួន ៣២”កុំអនុញ្ញាតឱ្យបាល់ទាត់ត្រូវបានអូសចូលទៅក្នុងគ្រប់សមរភូមិមនោគមវិជ្ជាឬនយោបាយដែលលេចឡើង”។
កាតា ដែលត្រូវបានជ្រើសរើសក្នុងឆ្នាំ ២០១០ ជាម្ចាស់ផ្ទះវើលខាប់ បានបង្កឱ្យមានការពិនិត្យពិច័យលើការប្រព្រឹត្តរបស់ខ្លួនលើពលករចំណាកស្រុកស៊ីប្រាក់ខែទាបដែលសាងសង់គម្រោងតម្លៃរាប់សិបពាន់លានដុល្លារ និងច្បាប់របស់ខ្លួន ដែលដាក់ទណ្ឌកម្មលើទំនាក់ទំនងផ្លូវភេទដូចគ្នា។
ការអត្ថាធិប្បាយរបស់ FIFA ក្នុងការការពារប្រទេសកាតាបានធ្វើឡើង បន្ទាប់ពីមានការរិះគន់កាន់តែខ្លាំងឡើងក្នុងប៉ុន្មានសប្តាហ៍ថ្មីៗនេះ ដោយមន្ត្រីសាធារណៈ រួមទាំង លោក សេក តាមីម ប៊ីន ហាម៉ាត អាល់ ថានី (Sheikh Tamim bin Hamad Al Thani) នៃប្រទេសកាតា ខណៈការប្រកួតនៅថ្ងៃទី ២០ ខែវិច្ឆិកាខិតជិតមកដល់។
កាលពីពីរសប្តាហ៍មុន លោកថានីបានបរិហារ “ការប្រឌិតនិងស្តង់ដារទ្វេ” នៅក្នុងអ្វីដែលគាត់បានហៅថា “យុទ្ធនាការមិនធ្លាប់មានពីមុនមក” ប្រឆាំងនឹងប្រទេសម្ចាស់ផ្ទះវើលខាប់។
ក្រុមអឺរ៉ុបចំនួនប្រាំបីបានប្តេជ្ញាឱ្យប្រធានក្រុមរបស់ពួកគេពាក់ខ្សែដៃរាងបេះដូង ដោយបំពានច្បាប់របស់ FIFAដើម្បីគាំទ្រយុទ្ធនាការប្រឆាំងនឹងការរើសអើងដែលបានចាប់ផ្តើមនៅក្នុងប្រទេសហូឡង់ ហើយកីឡាករអូស្ត្រាលីបានចូលរួមក្នុងការផ្សាយវីដេអូមួយដើម្បីសម្តែងការព្រួយបារម្ភអំពីកំណត់ត្រាសិទ្ធិមនុស្សរបស់កាតា។
គ្រូបង្វឹកនិងសហព័ន្ធជាច្រើន រួមទាំងសហរដ្ឋអាម៉េរិក បានគាំទ្រការអំពាវនាវឱ្យបង្កើតមូលនិធិសំណងសម្រាប់គ្រួសារពលករចំណាកស្រុក។ ក្រុមដាណឺម៉ាកនឹងពាក់ឈុតខ្មៅជាសញ្ញានៃការកាន់ទុក្ខចំពោះអ្នកដែលបានស្លាប់ក្នុងប្រទេសកាតា៕
ប្រធាន FIFA លោក ជីយ៉ាននី អ៊ីនហ្វាទីណូ ធ្វើកាយវិការពេលលោកនិយាយអំឡុងពេលចាប់ឆ្នោត FIFA Women’s World Cup 2023 នៅទីក្រុង Auckland ប្រទេសនូវែលសេឡង់ កាលពីថ្ងៃសៅរ៍ ថ្ងៃទី ២២ ឆ្នាំ ២០២២