ដោយៈសោម ប៊ុនថន/ភ្នំពេញ៖នៅវេលាព្រឹក ថ្ងៃទី១៦ ខែវិច្ឆិកា ឆ្នាំ២០២២ គណៈប្រតិភូស្រ្តីដែលតំណាងឱ្យប្រទេសកម្ពុជា ប្រទេសចិន ប្រទេសព្រុយណេ ប្រទេសម៉ាឡេស៊ី ប្រទេសឥណ្ឌូនេស៊ី ប្រទេសជប៉ុន និងប្រទេសកូរ៉េខាងត្បូង អញ្ជើញមកទស្សនកិច្ចពិព័រណ៍ “ក្តីសុបិនកម្ពុជា” នៅសាលមហោស្រពចតុមុខ ដែលរៀបចំដោយលោកស្រី ដារ៉ាវណ្ណ ដាវីត លុយ សហការជាមួយបណ្ណាល័យសម្តេចម៉ែ នៃមជ្ឈមណ្ឌលឯកសារកម្ពុជា។ គណ:ប្រតិភូដែលជាស្រ្តី ទទួលព្រះរាជស្វាគមន៍យ៉ាងកក់ក្តៅពីសម្តេចរាជបុត្រីព្រះអនុជ នរោត្តម អរុណរស្មី ឧត្ដមប្រឹក្សាផ្ទាល់ព្រះមហាក្សត្រ, , អ្នកស្រី សូ ហ្វារីណា នាយករងមជ្ឈមណ្ឌលឯកសារកម្ពុជា និងលោក ឆាំង យុ នាយកមជ្ឈមណ្ឌលឯកសារកម្ពុជា និងជាស្ថាបនិកវិទ្យាស្ថានស្លឹករឹត។

ពិព័រណ៍ “សុបិនកម្ពុជា” គឺជាផ្នែកមួយនៃព្រះរាជកម្មវិធី “១០០ព្រះវស្សានៃព្រះបិតាឯករាជ្យជាតិ” ឧទ្ទិសថ្វាយព្រះបរមរាជវិញ្ញាណក្ខន្ធ ព្រះបរមរតនកោដ្ឋ នរោត្តម សីហនុ។ ពិព័រណ៍”សុបិនកម្ពុជា”សម្ពោធនៅថ្ងៃទី៣១ខែតុលាឆ្នាំ២០២២ក្រោមព្រះរាជធិបតីដ៏ខ្ពង់ខ្ពស់បំផុតពីព្រះបាទនរោត្តម សីហមុនី និង សម្តេចព្រះមហាក្សត្រី នរោត្តម មុនិនាថ សីហនុ ព្រះញាតិវង្សានុវង្សព្រមទាំងឥស្សរជនជាន់ខ្ពស់នៃស្ថាប័នកំពូលៗរបស់ជាតិ។ ពិព័រណ៍នេះទទួលបានការសព្វព្រះរាជហឫទ័យយ៉ាងខ្លាំងពីព្រះមហាក្សត្រខ្មែរនិងរាជវង្សានុវង្ស។

ពិព័រណ៍ “សុបិនកម្ពុជា” បានដាក់តាំងបង្ហាញពីថ្ងៃទី៣១ ខែតុលា ដល់ថ្ងៃទី១៧ ខែវិច្ឆិកា និងបានទទួលសាធារណជន, គណៈប្រតិភូដែលជាស្រ្តី និងមេដឹកនាំបណ្តាប្រទេសអាស៊ាន និងប្រទេសមួយចំនួនទៀតដែលមកចូលរួមកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំពាក់ព័ន្ធនានានៅប្រទេសកម្ពុជា ចាប់តាំងពីថ្ងៃទី១១ ដល់ថ្ងៃទី១៣ ខែវិច្ឆិកា ឆ្នាំ២០២២ មានចំនួនសរុបប្រមាណ ៨០០ នាក់។

ដំណើរទស្សនកិច្ចរបស់គណៈប្រតិភូដែលជាស្រ្តីនៅថ្ងៃនេះ គឺជាដំណើរទស្សនកិច្ចចុងក្រោយដែលបង្ហាញពីការគាំទ្រ និងទទួលស្គាល់ស្នាដៃរបស់សម្តេចព្រះមហាក្សត្រី នរោត្តម មុនិនាថ សីហនុ និង សម្តេចព្រះបរមរតនកោដ្ឋ នរោត្តម សីហនុ ព្រមទាំងបានទាំងបង្ហាញអំពីតួនាទីស្រ្តីក្នុងការចូលរួមនៅក្នុងវិស័យសង្គម វប្បធម៌ សិល្បៈ ប្រវត្តិសាស្រ្ត ការអប់រំ និងនយោបាយ។ នៅក្នុងប្រទេសកម្ពុជាសម្តេចព្រះមហាក្សត្រី នរោត្តម មុនិនាថ សីហនុ ដែលតំណាងឲ្យស្រ្តីខ្មែរទាំងមូល ព្រះអង្គបានជម្នះរាល់ការលំបាក និងឧបសគ្គគ្រប់បែបយ៉ាងតាមដង្ហែព្រះរាជសកម្មភាពជាច្រើនជាមួយនឹងព្រះបរមរតនកោដ្ឋ នរោត្តម សីហនុ ដើម្បីបុព្វហេតុជាតិមាតុភូមិ។ ព្រះអង្គគឺជានិមិត្តរូបនៃភាពរឹងមាំរបស់ស្រ្តីខ្មែរទូទៅ និងជាម្លប់សម្រាប់កូនចៅ និងប្រជានុរាស្រ្តខ្មែរ។
គណ:ប្រតិភូសម្តែងការពេញចិត្តនឹងពិព័រណ៍ ដែលបានផ្តល់ការយល់ដឹងអំពីប្រវត្តិសាស្រ្តប្រទេសកម្ពុជា និងរាជវង្សានុវង្សខ្មែរ។ ពិព័រណ៍នេះនឹងផ្តល់ក្តីសង្ឃឹមដល់ប្រជាជនកម្ពុជា ដែលបានឆ្លងកាត់ដំណាក់កាលដ៏លំបាកកន្លងមក។ គណៈប្រតិភូក៏សំណូមពរឲ្យបន្តរក្សាពិព័រណ៍ «សុបិនកម្ពុជា» សម្រាប់សាធារណជន និងភ្ញៀវទូតចូលទស្សនា។

នៅចុងបញ្ចប់នៃដំណើរទស្សនកិច្ច លោក ឆាំង យុ ជូនសៀវភៅសាក្សីប្រវត្តិសាស្រ្តរបស់សម្តេចព្រះមហាក្សត្រី នរោត្តម មុនិនាថ សីហនុ, កុនឯកសារ​រយ:ពេល១៤នាទីដែលឆ្លុះបញ្ចាំងអំពីប្រវត្តិសាស្រ្តប្រទេសកម្ពុជា និងព្រះរាជវង្សានុវង្ស និងផ្ទាំងរូបថតរបស់ សម្តេចព្រះមហាក្សត្រី នរោត្តម មុនិនាថ សីហនុ ដល់គណៈប្រតិភូ៕សរន