​ប្រែ​សម្រួលៈ​បំណង​(​ដេល្លី​ម៉េល​)៖​ដោយ​ចង់​មានន័យថា​រដ្ឋាភិបាល​ទីក្រុង​គៀវ​ត្រូវតែ​ធ្វើ​សម្បទាន​ដើម្បី​បញ្ចប់​សង្គ្រាម​ជាមួយ​រុស្ស៊ី សម្តេច​ប៉ាប​ហ្វ្រង់​ស៊ីស​បាន​មាន​សង្ឃដីកា​កាល​ពី​ថ្ងៃ​សុក្រ​ថា ក្រុម​មេដឹកនាំ​​អ៊ុយ​ក្រែ​ននឹង​ត្រូវតែ​«​សម្លឹង​មើល​អោយ​វែងឆ្ងាយ​»​ដើម្បី​ធានា​បាន​សន្តិភាព ។​

​សម្តេច​សង្ឃ​កា​តូ​លិច​អង្គ​នេះ​កាលពី​ពេលមុន​នេះ​ក្នុង​ខែវិច្ឆិកា ក៏បាន​អំពាវនាវ​អោយ​មាន​ការផ្អាក​ប្រយុទ្ធ​គ្នា​មួយ​ដើម្បី​កុំអោយ​ជម្លោះ​នេះ​កាន់តែ​អាក្រក់​ទៅ​និង​បាន​សុំ​អង្វរ​«​ព្រះ​អោយ​រួសរាន់​បញ្ចប់​វា​»​។​

​ក្នុង​លិខិត​ចំហ​មួយ​កាលពី​ថ្ងៃ​សុក្រ​ដើម្បី​កត់សំគាល់​ការឈ្លានពាន​របស់​រុស្ស៊ី​ចូល​ដល់​ខែ​ទី​ប្រាំបួន សម្តេច​សង្ឃ​ហ្វ្រង់​ស៊ីស បាន​សរសើរ​កម្លាំងរ​បស់​ប្រជាជន​អ៊ុយ​ក្រែន​នៅក្នុងការ​ប្រឈម​នឹង​ការវាយប្រហារ​។​

​ព្រះអង្គ​បានសរសេរថា​« ពិភពលោក​បាន​ទទួល​ស្គាល់​ប្រជាជន​មួយ​ដែល​រឹងមាំ​ មោះមុត ប្រជាជន​មួយ​ដែល​រង​ទុក្ខ អង្វរ​សុំ យំ​ ​តស៊ូ ជម្នះ​និង​មានសង្ឃឹម គឺ​ជា​ប្រជាជន​ធ្វើ​ទុក្ករកម្​ជាមួយនឹងសេចក្តីថ្លៃថ្នូរ​មួយ​»​។​

​ព្រះអង្គ​ក៏បាន​មាន​សង្ឃដីកា​ថា ទ្រង់​ក៏​បន់ស្រន់​ជូនពរ​ដល់​ក្រុម​មេដឹកនាំ​អ៊ុ​យក្រែន និង​ថា​ដោយសារ​ភារកិច្ច​ដឹកនាំ​ប្រទេស​ក្នុងពេល​សោកនាដកម្ម​នេះ ព្រះ​អង្គ​បាន​សុំ​អោយ​ពួកគេ​ធ្វើ​ការសំរេចចិត្ត​​ដោយ​សម្លឹង​វែងឆ្ងាយ​ដើម្បី​សន្តិភាព​និង​អភិវឌ្ឍ​សេដ្ឋកិច្ច​ក្នុង​អំឡុង​ពេល​ដែល​ហេដ្ឋារចនាសម្ពន្ធ​សំខាន់ៗជាច្រើន​របស់ប្រទេស​ត្រូវបាន​បំផ្លាញ​។​

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​ឡេន​ស្គី បាន​និយាយ​កាលពី​ថ្ងៃ​សប្តាហ៍​មុន​ថា​អ៊ុយ​ក្រែន​ត្រៀម​ចរចារ​កសន្តិភាព​តែ​ក្នុង​លក្ខខណ្ឌ​ដែល​រុស្ស៊ី​ផ្តល់​ទឹកដី​អ៊ុយ​ក្រែន​ដែល​ខ្លួន​កាន់កាប់​មកវិញ​​ទាំង​អស់​ប៉ុណ្ណោះ​។​

​ក្នុង​កិច្ចសម្ភាសន៍​មួយ​ជាមួយ​កាសែត​កាលពី​សប្តាហ៍​មុន សម្តេច​ប៉ាប​បាន​មាន​សង្ឃដីកា​ថា បុរី​វ៉ា​ទី​កង់​ត្រៀមខ្លួន​ធ្វើ​អ្វីមួយ​ដែល​អាច​ដើម្បី​សម្របសម្រួល​និង​បញ្ចប់​សង្គ្រាម​នេះ​៕

​សម្តេច​សង្ឃ​កា​តូ​លិច ប៉ាប​ហ្វ្រង់​ស៊ីស ចង់​ចូល​ខ្លួន​សម្របសម្រួល​ដើម្បី​បញ្ចប់​សង្គ្រាម​នៅ​អ៊ុ​យក្រែន​