​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​ចិន​លោក​ស៊ី ជីន​ភីង បាន​ប្រាប់​មេដឹកនាំ​កូរ៉េខាងជើង គីម ជុង​អ៊ុន ថា​រដ្ឋាភិបាល​ទីក្រុង​ប៉េកាំង​នឹង​ធ្វើការ​ជាមួយ​រដ្ឋាភិបាល​ទីក្រុង​ព្យុង​យ៉ាង​សំរាប់​​សន្តិភាព​ពិភពលោក នេះ​បើ​តាម​ការផ្សាយ​របស់​សារព័ត៌មាន​កូរ៉េ​ខាងជើង​កាលពី​ថ្ងៃ​សៅរ៍​។​

​ការបញ្ជូនសារ​ពី​លោក​ស៊ី​ធ្វើឡើង​ប៉ុន្មាន​ថ្ងៃ​បន្ទាប់ពី​កូរ៉េខាងជើង​បាញ់​កាំជ្រួច​ឆ្លង​ទ្វីបក្នុង​ការសាកល្បង​កាំ​ជ្រួច​ដ៏​មាន​ឥទ្ធិពល​បំផុត​របស់​ខ្លួន​និង​ប្រកាស​ថា​វា​ជា​ការឆ្លើយតប​ទៅនឹង​ការ​គំរាម​ប្រើ​​នុយក្លេអ៊ែរ​ពី​សំណាក់​អាម៉េរិក​មកលើ​ខ្លួន​។​

​សូមបញ្ជាក់​ថា កូរ៉េ​ខាងជើង​បាន​ធ្វើកា​រ​សាកល្បង​កាំជ្រួច​ក្នុង​ចំនួន​ច្រើន​បំផុត​ក្នុង​ឆ្នាំនេះ ជាពិសេស​នៅ​ប៉ុន្មាន​សប្តាហ៍​ចុងក្រោយ​នេះ​ចំពេលមាន​ការបារម្ភ​ថា​ប្រទេស​នេះ​អាច​នឹង​ធ្វើ​ការសាកល្បង​នុយ​ក្លេ​​អ៊ែរ​លើក​ទី​ប្រាំពីរ​របស់ខ្លួន និង​លើក​ដំបូង​ចាប់តាំងពី​ឆ្នាំ​២០១៧​។​

​បើតាម​ទីភ្នាក់ងារ​សារព័ត៌មាន​កណ្តាល​កូរ៉េ​KCNA ក្នុង​សារ​ផ្ញើ​ទៅកាន់​លោក​គីម លោក​ស៊ី​បាន​និយាយថា រដ្ឋាភិបាល​ទីក្រុង​ប៉េកាំង​ត្រៀម​ធ្វើការ​ជាមួយ​កូរ៉េខាងជើង​ដើម្បី​«​សន្តិភាព ស្ថិរភាព ការអភិវឌ្ឍ​​និង​វិបុលភាព​របស់​តំបន់​និង​ពិភពលោក​»​។​

KCNA​បាន​និយាយថា លោក​ស៊ី មានបំណង​សហការ​ជាមួយ​រដ្ឋាភិបាល​ទីក្រុង​ព្យុង​យ៉ាង​នៅពេល​«​ការប្រែប្រួល​នៅក្នុង​លោក ពេលវេលានិង​ប្រវត្តិសាស្ត្រ កំពុង​កើតឡើង​ក្នុង​ផ្លូវ​ដែល​នឹក​មិន​ស្មាន​ដល់​»​។​

​ស៊ី ជួប គីម ជុង​អ៊ុន នៅ​ក្រុង​ព្យុង​យ៉ាង​កាលពី​ឆ្នាំ​២០១៩

​អាម៉េរិក​បាន​និយាយថា ខ្លួន​ចង់អោយ​ចិន​ដែល​ជា​សម្ពន្ធមិត្ត​ដ៏​មាន​ឥទ្ធិពល​របស់​កូរ៉េខាងជើង និង​ជា​អ្នកគាំទ្រ​ខាង​សេដ្ឋកិច្ច​ដ៏​សំខាន់​ផង ប្រើ​ឥទ្ធិពល​របស់​ខ្លួន​ដើម្បី​ទប់​ការរំលោភបំពាន​របស​កូរ៉េខាងជើង​។​​ការបាញ់​បង្ហោះ​កាំជ្រួច​កាលពី​ថ្ងៃ​១៨​វិច្ឆិកា​ទំនងជា​កាំជ្រួច​ផ្លោង​ឆ្លង​ទ្វីប​ថ្មី​បំផុត​របស់​រដ្ឋាភិបាល​ទីក្រុង​ព្យុងយ៉ាង ដែល​មាន​ចម្ងាយ​ហោះ​ដល់​អាម៉េរិក​ទាំងមូល​។​

​ក្រុមប្រឹក្សាសន្តិសុខ​អង្គការសហប្រជាជាតិ​បាន​កោះប្រជុំ​អំពី​បញ្ហា​បាញ់​កាំជ្រួច​នេះ ដោយ​អាម៉េរិក អង់គ្លេស បារាំង​និង​ឥណ្ឌា​ស្ថិត​ចំណោម​ប្រជាជាតិ​១៤​ដែល​ថ្កោលទោស​អំពើ​របស់​រដ្ឋាភិបាល​ទីក្រុង​ព្យុង​​យ៉ាង​។​តែ​ចិន​និង​រុស្ស៊ី​មិនបាន​ចូលរួម​ទេ ដោយ​មហាអំណាច​ទាំង​ពីរ​លើក​ហេតុផល​ផ្សេង​៕

​គីម ជុង​អ៊ុន នាំ​កូន​ស្រី ទៅ​មើល​ការបាញ់​បង្ហោះ​កាំជ្រួច​ផ្លោង​ជា​លើកដំបូង​កាលពី​ថ្ងៃ​១៨​វិច្ឆិកា​